Search form

Markus 7

Jesus ma tangunitha ovalinomi

(Mat. 15:1-9)

1Ovafarisai novalongiveta vamo mboka mbava dha koJerusalem, va ongana puJesus. 2Iya va mona ovalongwa ve vamo amava li nomawoko ngaa sili, okutya ngahaa kohelwe.

3(Ovajuda avehe unene tuu Ovafarisai kava li háveye likoha komawoko, va kambulitha odhonteto dhowoihe nowoina. 4Kava li otjipuka hiva landa komalandethelo, tainkolo haveye tji koha, nodhonteto odhonkwawo ve dhi kambulitha ngahi tji li okukoha ovinwino, odhombiya nomalonga otjivela otjindumbu.)

5Ovafarisai novalongiveta ve mu pula hava tyaa: “Omena lyatji ovalongwa woye hihava kambulitha odhonteto dhowoihe nowoina, hiva lya ahave likohele komawoko?”

6Ye we ve yaka ha tyaa: “Valinomi n̯e, Jesaja we mu heela nawa ngahi kwa sonekwa haku tiwaa:

‘Ovantu hemba va ntumbaleka vala novinyo,

atjaa omitima vyawo vi li kokule naame.

7Va ndjundapela vala nyahinya,

mena lyokutya va longetha odhonteto dhovantu.’

8“Mu yetha ovitumino vyaKalunga, hamu kambulitha odhonteto dhovantu.”

9Ye we ve tima, ha tyaa: “Mu ninga nawa, himu yetha otjitumino tjaKalunga, n̯e hamu kambulitha odhonteto dhen̯i ovene. 10Iya Moses wa popya ha tyaa: ‘Tumbaleka iho nanyoko. Nguma popi navi ihe ne ina, nga dhipawe.’ 11Iya n̯e mu tyaa: ‘Nguma heele ihe ne ina ha tyaa: Himbe tje ku popila natjo, mbe tji pa Korban,’ matji tya, tja pewa Kalunga, 12okutya kamu mu itavelele uke a popile ihe ne ina. 13Hehi matji pengetha odhondaka dhaKalunga okupitila modhonteto dhen̯i ndhimu na dho. Ovipuka ovikwawo ngahembi ovyo mu ninga.”

Ovipuka mbii lundha omuntu

(Mat. 15:10-20)

14Ye wa ithana uke owingi wovantu, he u heele ha tyaa: “Nteelela ndjen̯i amuhe, mu koneke. 15Pondje kape na hitji dha po, hatji i momuntu, hatji mu lundha, iya hitji dha momuntu, otjo tji lundha omuntu. 16[Nguu na omatwi okutyaa, nga tyee.]”

17Iya hive liyapauka nowingi wovantu, wa ya konganda. Ovalongwa ve mu pula ouhunga weeli hendi. 18Ye we ve pula ha tyaa: “Nan̯i nan̯e wo tuu kamu yuvite? Kamu tji i okutya atjihe hitji dha pondje okuya momuntu katji mu lundha, 19mena lyokutya katji i momutima we, tji ya medhimo, hatji piti mo.” Jesus otjo a thitulula hinyahi okutya ovikulya avihe vya kohoka.

20We ve heela ha tyaa: “Hitji dha momuntu, otjo tji mu lundha. 21Iya momutima womuntu omo mu dha omalipulo omavi: Okuhula, oumpulu, okudhipaa, 22okulivaka, olwiho, ouputji, okulungamena, ountalu, onki, okupenya, okulinoma nowoova. 23Ovipuka avihe hembi ovivi vi dha momutima womuntu, havi mu lundha.”

Eitavelo lyomukadhintu Omukanana

(Mat. 15:21-28)

24Iya ye wa kulama, ha i kovit̯indwalongo vyaTiro naSidon. Iya wa ya monganda imo, ye kaa li ama hala tji kale atji iwe, atjaa tjo katja li amatji tjiiwa okuholekwa. 25Iya omukadhintu umo wa li nomuna omukadhona ngwaa li nombepo ombi, hiaa tee Jesus, we ya dhivadhiva, he lit̯imike po podhompadhi dhaJesus. 26Omukadhintu ngoka wa li Omugreka, ngwaa yumukilwa moFoinikia otjilongo tjomoSiria. Ye wa kumba Jesus a te mo ondemoni momuna omukadhona. 27Iya ye we mu heela ha tyaa: “Odhondele olutenga ngavetji kuta, mena lyokutya katji li nawa okwiitha po otjithima tjodhondele, ho tji yumbile odhombwa.”

28Iya ye we mu yaka ha tyaa: “Muhona, iinga, iya nodhombwa dhi lya ounyai wodhondele kohi yotjitaafula.”

29Iya wa heela omukadhintu ha tyaa: “Mena lyodhonda ndhiwa popi ndhoka tjili nawa, napano enda konganda, ondemoni momunoye ya dhi mo.”

30Ye hiee ya konganda, wa vadha omuna aa lala po komutala, ondemoni aya dhi mo muye.

Omulumentu ompolo ma velulwa

31Iya ye wa dha ko uke kovilongo vyaTiro, ha yatakana moSidon, iya ha i kelunga lyaGalilea, ama ende pokati kaDekapolis. 32Ve mu etela ompolo, ye nguhe tji i okupopya nawa, ve mu kumba e mu tendeke okuwoko. 33We mu itha po powingi wovantu, have ke likalela aveika, he mu twaa ominwe momakutwi, he litutike omate kominwe vye, he mu t̯in̯i kelaka. 34Okutya wa tala keulu, ha twala omudhima, he mu heele ha tyaa: “Efata!” Matji tyaa: Thituluka!

35Omatwi e a thituluka dhivadhiva, nelaka lye lya patuluka, ye ha popi nawa. 36Ye we ve anda okutya ahamave tji heele omuntu noumo, iya nandaku tiwa we ve anda nokwiilikin̯a wo ve tji hipulula. 37Ovengi va kuminwe unene hava tyaa: “Avihe u vi ninga nawa! Odhompolo dhi tyaa, ovahapopi va popya.”

Etestamende Epe Moludhimba

© 2012 Bible Society of Namibia

More Info | Version Index