Search form

Markus 8

Jesus ma kutitha ovalumentu omayovi ane

(Mat. 15:32-39)

1Pomatango ngenya engundwa enene lyovantu lye mu onganena uke, mena lyokutya kava li ave na ovikulya, Jesus wa ithana ovalongwa ve, ha tyaa: 2“Ovantu hemba mbe ve etethele mo onkenda, mena lyokutya va ningi omatango atatu pwaame, wo háve na himava li. 3Iya nge ve lekele, hava i kodhoyawo nondjala, mava ka thothaunukila mondjila, mena lyokutya vamo muwo va dha kokule.”

4Ovalongwa ve ve mu yaka hava tyaa: “Iya opi omuntu mpama ulu okumona ovikulya vyokukutitha ovantu hemba mokuti hemu kwanyahinya?”

5Jesus we ve pula ha tyaa: “Mu na po omingome vingapi?”

Ve mu yaka hava tyaa: “Epanduvali.”

6Jesus wa heela owingi wovantu u kale pohi. Iya wa itha po omingome mbyoka epanduvali. Iya hiaa pandula, we vi nyembula, he vi pa ovalongwa ve, opo ve vi yandjele ovantu. Iya wo va yandjela owingi wovantu. 7Wo va li po wo nouhi umo oununu. Jesus hiee u pandulile Kalunga, ha heele uke ovalongwa ve, ve u pe ovantu. 8Ovantu va lya, have kuta. Ovalongwa kon̯ima va ongedha ovinyembu mbyoka mbyaa hupu po, have yulitha odhombwe epanduvali. 9Pa li ovantu mbava li ave lithike pomayovi ane. Jesus wa lekela ovantu, 10okudha mpoka wa londa dhivadhiva novalongwa ve mowato, hava i kotjit̯indwalongo tjaDalmanuta.

Ovafarisai mava pula etangan̯eko

(Mat. 16:1-4)

11Ovafarisai ve ya, hava utu okutetha ombata Jesus. Ve mu lola, have mu pula etangan̯eko ndimali dhi meulu. 12Jesus wa twala omudhima olule, ha tyaa: “Omena lyatji ekula hendi mali taendha etangan̯eko? Me mu heele otjatjili, ekula hendi kaali pewa etangan̯eko.”

13Iya ye we ve thiaa po, ha londo uke mowato, ha yauka, ha i tjikoohehinya.

Ontathi yOvafarisai

(Mat. 16:5-12)

14Ovalongwa va li ava dhimbi okweetelela omingome, mowato va li vala ave na mo omungome umo. 15Jesus we ve ilikin̯a ha tyaa: “Lungamen̯i, n̯e mu tale nawa ontathi yOvafarisai noyaHerodes.”

16Wo ve lipula hava tyaa: “Ngweendele okuhatu na tja omingome.”

17Iya Jesus wa iwa omalipulo awo, ha tyaa: “Omena lyatji mamu popi okutya kamu na tja omingome? Nan̯i nanapano kamu tji lwete, n̯e kamu yuvite? Omitima vyen̯i vya kukuta? 18Omeho mu na o, atjaa kamu ku mono, omatwi mu na o, atjaa kamu tee? Iya kaamu thipaluka, 19himba pele ovalumentu mbenya omayovi atano omingome hembinya vitano, mwa ongedhele odhombwe ngapi ndhee yulile, himwa ongedha ovinyembu?”

Wo ve mu yaka hava tyaa: “Omulongo nambali.”

20“Iya himba pele ovantu mbenya omayovi ane omingome hembinya epanduvali, odhombwe ngapi ndhee yulile, himwa ongedha ovinyembu?”

Wo ve mu yaka hava tyaa: “Epanduvali.”

21Ye we ve heela ha tyaa: “Nan̯i nanapano kamu yuvite?”

Jesus ma twikulula omupot̯i moBetsaida

22Wo ve ya moBetsaida. Iya ovantu ve mu etela omupot̯i, have mu kumbu e mu t̯in̯e. 23Jesus wa kambula omupot̯i mokuwoko, he mu twala kokule nodhonganda. Jesus we mu tjakela pomeho, he mu tendeke okuwoko kwe, he mu pula ha tyaa: “U na hi u lwete?”

24Iya ye hiaa yele omeho, ha tyaa: “Ndji lwete ovantu, atjaa mava ngala omiti amavi ende.”

25Jesus wa t̯imika uke omupot̯i pomeho. Omupot̯i ha twikuluka, he ku mono nawa. Avihe wa li ae vi lwete nawa. 26Ye we mu lekela a ende konganda, he mu heele ha tyaa: “Vyuukilila konganda, hó ka pitapita uke.”

Petrus ma hipulula Jesus

(Mat. 16:13-20; Luk. 9:18-21)

27Jesus novalongwa ve va ya koulongo wokoKesarea-Filippi. Tainkolo va li mondjila, wa pula ovalongwa ve ha tyaa: “Ovantu va ntya, aame an̯i?”

28Wo ve mu yaka hava tyaa: “Ovantu vamo va tya oJohannes Omutjatji, iya vamo va tya oElia, navamo uke va tya yuumo owomovaprofeti.”

29Ye we ve pula ha tyaa: “N̯e mu ntya, aame an̯i?”

Petrus we mu yaka ha tyaa: “Oove Messias.”

30Jesus we ve ilikin̯a okutya háve mu popi komuntu noumo.

Jesus ma popi omatatetho e net̯o lye

(Mat. 16:21-28; Luk. 9:22-27)

31Ye wa uta oku ve longa okutya Omuna wOmuntu ma ka tatethwa unene, ha ka yekelwahi kovanene nokovayambethi ovanene nokovalongiveta. Ye ma ka dhipawa, iya kon̯ima yomatango atatu ma ka imunwa kout̯e. 32Jesus we tji popya movipathi vyawo. Iya Petrus we mu n̯anga, he mu twala pokampengi, ha utu oku mu anda. 33Iya Jesus wa piluluka, ha tala kovalongwa ve, wa anda Petrus ha tyaa: “Satana, dha po pwaame! Ove koo soko ovipuka vyaKalunga, iya nan̯i mo soko ovipuka vyountu.”

34Iya wa ithana owingi wovantu novalongwa ve, ve ye kuye, iya we ve heela ha tyaa: “Andaa pe na nguma hala okundandula, nge lidhimbe ye omwene, ye a tjinde omutjaakano we, a ndandule. 35Iya nguma hala okuhupitha omwenyo we, me u keketha, iya nguma keketha omwenyo we mena lyandje nomena lyondaka ombwa, me u hupitha. 36Matji popile tji omuntu okutumba ouye auhe, ye ha keketha omwenyo we? 37Ne omuntu ma yandja tji mpaeli, a yowole omwenyo we? 38Iya nguma nt̯a ohon̯i, ye ha t̯a ohon̯i odhondaka dhandje mekula hendi lyovayoni wolukupo nolyoulundhi, Omuna wOmuntu me ke mu t̯a ohon̯i, hime ya metumbalo lyaIhe pamo novaengeli ovadhilikwa.”

Etestamende Epe Moludhimba

© 2012 Bible Society of Namibia

More Info | Version Index