Search form

Mateus 10

Ovayapostoli omulongo navavali

(Mark. 3:13-19; Luk. 6:12-16)

1Jesus wa ithana ovalongwa ve omulongo navavali, he ve pa odhonkono okuta mo odhombepo odhombi, nokuvelula omutjithi auhe nouvela auhe. 2Iya omana ovayapostoli omulongo navavali hoonga: Omutenga oSimon nguu tiwa oPetrus, nomunitje Andreas, oJakob yaSebedeus nomunitje Johannes, 3oFilippus naBartolomeus, oTomas naMateus omuthendelethi, oJakob yaAlfeus naTaddeus, 4oSimon Omukanana naJudas Iskariot, ngoka wo ngwee mu weleleka.

Jesus ma tumu ovayapostoli

(Mark. 6:7-13; Luk. 9:1-6)

5Jesus wa tuma hemba omulongo navavali, ha tyaa: “Hámu i kovapaani, n̯e hámu hiti mondolopa yOvasamaria. 6Iya enden̯i kodhondhu ndhaa keka dhonganda yaIsrael. 7Iya apehe mpamamu ende, ve heelen̯i mu tyee: ‘Otjilongo tjeulu tji li popedhi.’ 8Velulen̯i ovavedhi, imunen̯i ovat̯e kout̯e, pangen̯i owovilundu, ten̯i mo odhondemoni. Mwa pewa otjali, nan̯e yandjen̯i otjali. 9Hámu i novipapo vyodhombongo dhotjingoldo nodhotjisilveri ne dhotjivela otjindumbu, 10handjato yomondjila, havikutu vivali ne odhongaku, hatjisawa. Iya omuundapi wa thele okupewa hima li.

11“Amwe ya mondolopa ne mokalongo kongandi, pulen̯i okutya aan̯i ngwee liun̯ikwa moka. Iya ngamo mu kala moka katee mamu dhi mo. 12Iya amwe ya monganda, tyen̯i ouwa ngau kale nawo. 13Onganda ndjoka andaa i tji i okuliun̯ikwa, ouwa wen̯i ngau kale mo. Iya andaa kai tji i okuliun̯ikwa, ouwa wen̯i ngau tjune nan̯e. 14Andaa pe na ngoka nguhame mu tambula ne nguhama teelele odhondaka dhen̯i, monganda moka ne mondolopa moka dhen̯i mo, n̯e mu lipupule ombuma kodhompadhi dhen̯i. 15Ame me mu heele otjatjili okutya otjilongo tjaSodom notjaGomorra mavi ka kala hahe okupon̯a ondolopa ndjoka metango lyekoyo.

Ovalongwa mava ka tewatewa

(Mark. 13:9-13; Luk. 21:12-17)

16“Taa tuutuu, ame me mu tumu ngodhondhu mokati komaungu. Iya kalen̯i amwa lungama ngodhonyoka, kalen̯i ovawa ngodhonguti. 17Lungamenen̯i ovantu, mave ke mu yandja kovyoongi vyovanene, have ke mu tonena modhosinagoga dhawo nodhosokoti. 18Iya mena lyokutya muvalongwa vandje mave ke mu twala kovatumini nokodhohamba, mu ninge odhombangi dhokuntjipulula kuwo nokoviwan̯a. 19Iya himave ke mu yandja kovatumini, hámu kala notjiho okutya mamu tya vi ne mamu popi vi, mena lyokutya mamu ka pewa powola yatjo ndjoka soka himwa thele okupopya. 20Han̯e mamu popi, iya Ombepo yaIho oyo mai popi mun̯e.

21“Ovalilanduli mava ka yandja ovakwawo, va dhipawe, naihe ma ka yandja ondele ye. Odhondele mava ka kondjetha ovanene vawo, have ve dhipaetha. 22Mamu ka kala amu yelwe kovantu avehe mena lyandje. Iya ngume likambulithile katee pehulilo, ma ka hupithwa. 23Iya andaa mave ke mu taata mondolopa imo, dhilukilen̯i kwiimo. Me mu heele otjatjili, odhondolopa dhomuIsrael kaamu ke dhi mana ko katee Omuna wOmuntu me ya.

24“Omulongwa ka pon̯ene omulongethi we, ye omupika ka pon̯ene omuhona we. 25Tji li nawa omulongwa okukala ngomulongethi we, nomupika okukala ngomuhona we. Andaa omwene wonganda mave mu ithana Belsebul, iya unene tuu ovantu wonganda ye otjo mava ithanwa.

Aan̯i ngwaa thele okutilwa

(Luk. 12:2-7)

26“Iya hámu tila ovantu, mena lyokutya kaku na tja hitja t̯imikwa, hihamatji ka holololwa, ko kaku na tja soka hitja holekwa, hihamatji ka kala atji iwe. 27Himbe mu heela met̯iku, tji popyen̯i poluhandja. Himwa nyongotolelwa pokutwi, tji popilen̯i pokati kovantu. 28Hámu tila mboka mbamava dhipaa olutu, wo hámava ulu okudhipaa omwenyo. Iya tilen̯i nguma ulu okuhan̯aunina moheli avyeevali, omwenyo nolutu. 29Odhontjo mbali kadhi landethwa epeni limo? Iya kape na tja noimo ndjimai wile pohi, Iho andaa kaa hala. 30Iya nodhondjutji dhokomitwe vyen̯i adhihe dha hawa. 31Iya hámu tila, n̯e mwa valela okupon̯a odhontjo odhingi.

Okuhipulula nokulitendela Kristus

(Luk. 12:8-9)

32“Iya auhe ngoka nguma ntjipulula movipathi vyovantu, naame wo me ke mu hipulula puTate nguu li meulu. 33Iya ngoka ngume lintendele movipathi vyovantu, naame me wo me ke litendela ye puTate nguu li meulu.

Hauwa, iya omukonda

(Luk. 12:51-53; 14:26-27)

34“Hámu lipula okutya ame mba eta ouwa kombanda yohi, hí etele ouwa, iya mba eta omukonda. 35Iya mbe ya okuhongaetha omuna omudhantu a kondjethe ihe, omuna omukadhona a kondjethe ina, omunaivi a kondjethe inaivi. 36Ovantu womonganda yomuntu ngoka mava kala odhondjedhi dhe.

37“Ngoka nguu hole ihe ne ina okupon̯a pwaame, kee nt̯evelwa. Nangoka nguu hole omuna omudhantu ne omuna omukadhona okupon̯a pwaame, kee nt̯evelwa. 38Iya nguhama tjindi omutjaakano we, ye ahama ndandula, kee nt̯evelwa. 39Ngoka nguma kondjele omwenyo we, me u keketha, nguma keketha omwenyo we mena lyandje, me ke u mona.

Ondjambi

(Mark. 9:41)

40“Ngoka ngume mu tambula, naye ma ntambula, nguma ntambula, naye ma tambula ngoka ngwaa ntuma. 41Ngoka nguma tambula omuprofeti mena lyokutya omuprofeti, ma mono ondjambi yomuprofeti. Nguma tambula omuvyuuki mena lyokutya omuvyuuki, ma mono ondjambi yomuvyuuki. 42Auhe ngoka nguma pa umo owomovantu hemba ovanunu okunwa oneka yomeva ngaa tende, mena lyokutya omulongwa wandje, me mu heele otjatjili okutya kaa kala háma mono ondjambi ye.”

Etestamende Epe Moludhimba

© 2012 Bible Society of Namibia

More Info | Version Index