Search form

Mateus 11

Jesus naJohannes Omutjatji

(Luk. 7:18-35)

1Iya Jesus hiaa mana okuheela ovalongwa ve omulongo navavali ovitumino hembi, wa dha po mpoka, ha ka longa, ye ha ka teetha modhondolopa dhawo.

2Iya Johannes mokaliwoso hiaa tee ovilinga vyaKristus, wa tuma ko ovalongwa ve, ve ke mu pule va tyee: 3“Ngukwa tiwa me ya, oove ne ngatu kevelele umo?”

4Iya Jesus we ve yaka ha tyaa: “Enden̯i mu ka hipululile Johannes mbimwa tee nambimwa mono okutya 5ovapot̯i va twikuluka, ovilema mavi ende, owovilundu va veluka, odhompolo dha thituluka, ovat̯e mava imunwa kout̯e, ovathona mava teethelwa ondaka ombwa. 6Iya omunalao onguhama ndimbililwa.”

7Iya ovalongwa vaJohannes hiva dhi po, Jesus wa uta okuhipululila owingi wovantu ouhunga naJohannes ha tyaa: “Mokuti mwa ile oku ka tala tji? Onenge ndjimai pukwapukwa kombepo? 8Iya mwa ka talele tji? Mwa ka talele omulumentu ngwaa dhala omidhalo omiwa vyomalesu? Taa tuutuu, mbava dhala omidhalo omiwa vyomalesu, va kala modhombala dhodhohamba. 9Iya mwa ka talele tji? Mwa ka talele omuprofeti? Iinga, me mu heele okutya ye wa pon̯a omuprofeti. 10Oye e li ye hengu ngwaa tiwaa:

‘Taa tuutuu, ame me ka tuma ontumwa yandje,

nguma tenge,

ye ngoka ngume ke ku longekedhela ondjila,

tainkolo ove hóye ya.’

11Me mu heele otjatjili okutya movantu mbava yumukwa kovakadhintu kamu na tja omunene ngwaa pon̯a Johannes Omutjatji, iya omununu kovakwawo avehe motjilongo tjeulu oye e mu pon̯a. 12Iya okudha pomatango aJohannes Omutjatji katee napano, otjilongo tjeulu tja monethwa ovihuna, tji kondjethwa okuhitwa kodhonkono. 13Iya nomathimbilo aehe ovaprofeti noveta vya hulila muJohannes Omutjatji. 14Iya andaa mamu hala oku tji itavela, oye e li Elia, omuprofeti ngwaa thimbilwa okutya me ya. 15Nguu na omatwi, nga tyee!

16“Iya ekula hendi me li yeleke natji? Li ngala odhondele mbava kala pohi pomalandethelo, amave liwololoka, 17hava tyaa: ‘Twe mu hakelele, n̯e kamu dhanene. Twa lili ngambatu li momukoti, n̯e kamu lilile.’ 18Iya Johannes hiee ya, ka lile, ye ka nwine, wo hava tyaa: ‘U na ondemoni.’ 19Omuna wOmuntu hiee ya, wa lya, ye ha nu, wo hava tyaa: ‘Taa tuutuu ngwaa tunda, onkolwe, epanga lyovathendelethi novalundhi.’ Iya ounongo waKalunga wa holololwa kovilinga vye.”

Odhondolopa ndhihadhi liteyululile

(Luk. 10:13-15)

20Iya Jesus wa uta okutangunitha odhondolopa mumwa ningilwa ovilingankono vye ovingi, mena lyokutya kave liteyululile. 21“Utatyei, ove Korasin! Utatyei, ove Betsaida! Iya ngaile moTiro nomoSidon omo mwa ningilwa ovilingankono mbyoka mbyaa ningilwa moyen̯i, mbenya ngai ve liteyulula ae lukulu, hava kala pohi modhosaku nomomuto. 22Iya me mu heele okutya Tiro naSidon mavi ka kala hahe oku mu pon̯a metango ndyoka lyekoyo. 23Naove, Kapernaum, mo tya pamo mo ka yelelwa meulu? Mo ka thothononenwa motjovat̯e. Iya ngaile moSodom omo mwa ningilwa ovilingankono mbyoka mbyaa ningilwa moyen̯i, ngai hinya katee ndino opo tji li. 24Iya me mu heele okutya otjilongo tjaSodom matji ka kala hahe oku mu pon̯a metango ndyoka lyekoyo.”

Jesus ma hivilike Ihe

(Luk. 10:21-22)

25Potembu ndjoka Jesus wa yaka ha tyaa: “Taa, Muhona weulu nowohi, me ku hivilike, mena lyokutya ovipuka hembi we vi holeka ovanongo novanadhondunge, ho vi holololele mboka mbava ngala odhondele. 26Iinga, Taa, hehi otjo tje ku thevelwa.

27“Ovipuka avihe mbe vi pewa kuTate. Kaku na tja nguu i Omuna kakele vala kaTate, ko kaku na tja nguu i Tate kakele vala kOmuna, nangoka Omuna nguma hala oku mu holololela ye.

Jesus ma ithana mbave ulwa

28“Indjen̯i kwaame amuhe mbamwe ulwa nambamwa tjinda omitenge mbyaa lema. Ame me mu thuvitha. 29Litween̯i okanga yandje, n̯e mu holele kwaame, mena lyokutya ndjimuntu omuwa, momutima mbe linunupika, nomienyo vyen̯i mavi ka thuva. 30Iya okanga yandje wa puvala, nomutenge wandje kau lemene.”

Etestamende Epe Moludhimba

© 2012 Bible Society of Namibia

More Info | Version Index