Search form

Mateus 14

Johannes Omutjatji ma dhipawa

(Mark. 6:14-29; Luk. 9:7-9)

1Iya potembu ndjoka Herodes, omutumini wotjityane tjotjilongo, wa tyaa etumbuko lyaJesus. 2Iya wa heela ovantu ve ha tyaa: “Omuntu hengu oJohannes Omutjatji, oye a imunwa kout̯e, iya odhonkono hendhi odho madhi undapa muye.”

3Iya Herodes wa kambulithile Johannes, he mu kutu, he mu yedhilile mokaliwoso mena lyaHerodias, omukadhintu womunitje, Filippus,4mena lyokutya Johannes we mu heela ha tyaa: “Tji huna okukupa omukadhintu womunitjoye.” 5Iya Herodes nandaku tiwa wa li ama hala okudhipaa Johannes, wa li ama tila owingi wovantu, mena lyokutya ovantu va itavela okutya Johannes omuprofeti.

6Motjipito tjokuthipaluka okuyumukwa kwaHerodes, omuna omukadhona waHerodias we ve dhanena po, iya tje hulukitha Herodes, 7Herodes hinde mu udhikile eano, e mu pe atjihe hima hala.

8Iya omukadhona wa popya ngahi a nyongotolelwa kwiina ha tyaa: “Mpa ndje napano omutwe waJohannes Omutjatji melonga.”

9Ohamba nandaku tiwa ya pongele, mena lyokwaana kwayo nolyovayenda vayo, ya tya omukadhona nge u pewe. 10Iya ya tuma okuteta ko omutwe waJohannes mokaliwoso. 11Iya omutwe we wa etwa melonga, hau pewa omukadhona, omukadhona he u twala kwiina. 12Iya ovalongwa vaJohannes ve ya, hava itha po otjivimbi tje, have mu paka. Iya va ya, have tji hipululile Jesus.

Jesus ma kutitha ovalumentu omayovi atano

(Mark. 6:30-44; Luk. 9:10-17; Joh. 6:1-14)

13Jesus hiee tji tee wa dha po nowato, ha i aika kompuka hukwe likalela. Owingi wovantu wa dha kodhondolopa, hau mu landula pohi. 14Iya Jesus hiee thiki kontyo, wa mona owingi wovantu. Ye wa li ae ve etethele mo onkenda, ha velula ovavedhi vawo.

15Iya okawiiwii hika wile pohi, ovalongwa ve ve ya kuye hava tyaa: “Pompuka hempa opokuti kwanyahinya, netango lya hiti. Lekela owingi wovantu, u ende koulongo, opo ve ke lilandele ovikulya.”

16Iya Jesus we ve yaka ha tyaa: “Kaava hepa okuya, ve pen̯i va lye.”

17Ve mu heela hava tyaa: “Nt̯e hempa katu na hitu na tjo, tu na po vala omingome vitano nodhohi mbali.”

18Jesus we ve heela ha tyaa: “Vi eten̯i huno kwaame.” 19Iya wa heela owingi wovantu u kale pohi mehodhi. Iya wa itha po omingome mbyoka vitano nodhohi ndhoka mbali, ha tala peulu, ha pandula. Ye wa nyembula omingome, he vi pa ovalongwa, ovalongwa have vi pa owingi wovantu. 20Wo avehe va lya, have kuta. Ovalongwa va ongedha ovinyembu mbyaa hupu po, odhombwe omulongo nambali hadhi yula. 21Iya mbava lya, va li ovalumentu omayovi atano, ovakadhintu nodhondele kava havelwe.

Jesus ma ende kombanda yomeva

(Mark. 6:45-52; Joh. 6:15-21)

22Iya Jesus wa ulumithile dhivadhiva ovalongwa ve, va ka londe mowato, va tenge tjikoohehinya tjelunga, tainkolo ye ma lekele owingi wovantu. 23Iya hiaa lekele owingi wovantu, wa londa kondundu aika oku ka kumba. Okawiiwii hika wile pohi, Jesus wa li ko aika hoka. 24Iya owato wa vadhwa awa i kokule okudha kontyo. Iya owato wa tonwa komakuthikuthi, mena lyokutya ombepo ye u tona motjipala.

25Momahuka Jesus we ya kuwo, ama ende kombanda yomeva. 26Iya ovalongwa hive mu mono ama ende kombanda yomeva, va tila, hava tyaa: “Otjilulu!” Iya va kwaa mena lyowoma.

27Iya Jesus we ve popitha dhivadhiva ha tyaa: “Koleken̯i, hámu tila, aame!”

28Iya Petrus we mu yaka ha tyaa: “Muhona, ntjeela ndje, andaa oove tjatjili, ndji ende kombanda yomeva, ndji ye kwoove.”

29Jesus we mu heela ha tyaa: “Indjo!”

Petrus wa dha mo mowato, ha ende kombanda yomeva, he ya kuJesus. 30Hiaa mono ombepo onene, wa li aa tila, ha utu okuhita, wa kwaa ha tyaa: “Muhona, ntjupitha ndje!”

31Jesus wa vyuukitha okuwoko kwe dhivadhiva, he mu kambula, ha tyaa: “Muntu ove wokaitavelo okanunu, wa limbililwa tji?”

32Iya wo hiva londa mowato, ombepo hai nyimi. 33Ovantu mbava vadhwa mowato, ve mu tumbaleka hava tyaa: “Otjatjili ove uMunwaKalunga.”

Jesus ma velula ovavedhi

(Mark. 6:53-56)

34Jesus novalongwa ve hiva yauka, ve ya koGenesaret. 35Iya ovantu wopompuka mpoka hiva dhimbuka Jesus, va tuma elaka motjit̯indwalongo soka atjihe. Wo va eta ovavedhi vawo avehe kuJesus. 36Ve mu kumba, opo ovavedhi va t̯in̯e vala nandaku tiwa okovilyo vyomudhalo we. Iya avehe mboka mbave mu t̯in̯a, va veluka.

Etestamende Epe Moludhimba

© 2012 Bible Society of Namibia

More Info | Version Index