Search form

Mateus 17

Jesus ma laimithwa

(Mark. 9:2-13; Luk. 9:28-36)

1Iya kon̯ima yomatango epandu Jesus wa itha po Petrus naJakob nomunitje Johannes, he ve twala kondundu onde, ve ke likalele. 2Olupe lwe lwa lunduluka movipathi vyawo. Otjipala tje tja laima ngetango, omidhalo vye vya pembana ngotjiten̯i. 3Iya ve liholololelwa kuMoses naElia, hava popi naJesus. 4Petrus wa heela Jesus ha tyaa: “Muhona, hempa opopawa nokukala. Andaa mo hala, me tungu po omasase atatu, limo olyoye, limo olyaMoses nalimo olyaElia.”

5Petrus tainkolo a li ama popi, pe ya ekaka ndimali laima, hali ve tjikile. Mekaka mwa dha ondaka hai tyaa: “Nguka Omunwandje omuhivilikwa, ngumba hopa, mu tyeen̯i.”

6Iya ovalongwa hiva tee ondaka ndjoka, va li ava tila unene, have lit̯imike po ovipala vyawo. 7Iya Jesus we ya kuwo, he ve t̯in̯i, ha tyaa: “Imuken̯i po, hámu tila.” 8Hiva yele omeho awo, kave na nguva mona po, kakele vala kaJesus aika.

9Iya hiva li amava heluka kondundu, Jesus we ve ilikin̯a, ha tyaa: “Emoneko hendi hámu li heele omuntu nokanunu, tainkolo Omuna wOmuntu héya imunwa kout̯e.”

10Iya ovalongwa ve mu pula hava tyaa: “Omena lyatji ovalongiveta hiva tya, Elia oye a thele okuya olutenga?”

11Jesus we ve yaka ha tyaa: “Iinga, Elia me ya, ha twaa ovipuka avihe pomalukalo. 12Iya me mu heele okutya Elia we ya ae lukulu, atjaa kave mu konekele, ve mu ninga ngahi mava hala, Omuna wOmuntu otjo ma ka tatethwa kuwo.”

13Ovalongwa va tyaa okutya me ve heele ouhunga naJohannes Omutjatji.

Jesus ma velula omudhantu ngwaa li novintonya

(Mark. 9:14-29; Luk. 9:37-43a)

14Iya hiva tjuna kowingi wovantu, omulumentu umo we ya kuJesus, ha twike odhongolo kotjipala tje, 15ha tyaa: “Muhona, t̯ila omunwandje omudhantu onkenda, u na ovintonya, mavi mu tatetha unene, mena lyokutya otwingi u wila momulilo nomomeva. 16Iya mbe mu eta kovalongwa woye, atjaa va anyenwa oku mu velula.”

17Jesus we ve yaka ha tyaa: “O, kula n̯e mbahamu na tja eitavelo, n̯e mbahamu tee. Me kala nan̯e katee nalun̯i? Me kala ame likambulithile n̯e katee nalun̯i? Mu eten̯i huno kwaame.” 18Jesus wa anda ondemoni, ondemoni hai dhi mo mondele, ondele wa veluka powola yatjo ndjoka.

19Iya ovalongwa ve ya kuJesus pokampengi, hava tyaa: “Omena lyatji twa anyenwa oku i ta mo?”

20Jesus we ve yaka ha tyaa: “Omena lyokaitavelo ken̯i okanunu. Iya me mu heele otjatjili okutya ngaile mu na eitavelo ndii lithike pombuto yotjitho tjosinapi, ngai mamu heele ondundu hendji hamu tyaa: ‘Hontoloka po hempa, enda hehwii,’ ngai mai lihontolola po, kape na tja himatji mu anyene. 21Iya ombepo hendji ombi kai tewa mo kotjipuka tjimo, i tewa mo vala kealikano nokokulitjaela ovikulya.”

Jesus ma popi uke et̯o lye

(Mark. 9:30-32; Luk. 9:43b-45)

22Jesus novalongwa ve hive ya pamo moGalilea, we ve heela ha tyaa: “Omuna wOmuntu ma ka yandjwa momawoko ovantu, 23mave ke mu dhipaa, iya metango etyatatu ma ka imunwa kout̯e.”

Iya ovalongwa va etetha onkenda unene.

Odhombongo dhotempeli

24Iya ovalongwa hive ya moKapernaum, ovaongi wodhombongo dhotempeli ve ya kuPetrus, hava tyaa: “Omulongethi wen̯i ka thutu odhombongo dhotempeli?”

25Petrus we mu yaka ha tyaa: “Aai, u thuta.”

Iya Petrus hiee ya monganda, Jesus wa tenga oku mu pula ha tyaa: “Simon, mo tya vi? Odhohamba dhokombanda yohi dhi pula kowaan̯i othuto nelilimo? Okovana ne okodhongendi?”

26Petrus wa yaka ha tyaa: “Okodhongendi.”

Jesus we mu heela ha tyaa: “Iya ovana kava thutu. 27Iya opo hátu ve yumanetha, enda kelunga, u ka yumbe ondjolo. Ohi ndjimo kambula olutenga, awe i yuhamuna, mo vadha mo ombongo yotjisilveri. I itha mo, u ye, u ve pe yo, i ninge elilimo lyetu naove.”

Etestamende Epe Moludhimba

© 2012 Bible Society of Namibia

More Info | Version Index