Search form

Mateus 19

Okuliyala

(Mark. 10:1-12)

1Jesus hiaa mana okupopya ovipuka hembi, wa dha koGalilea, ha i kotjit̯indwalongo tjaJudea tjikoohehinya tjaJordan. 2Engundwa enene lyovantu lye mu landula, iya ye oko e ve velulila hoka.

3Ovafarisai vamo ve ya kuJesus oku mu lola, ve mu pula hava tyaa: “Tja itavelwa tuu omulumentu okuyala omukadhintu we, ape na otjipuka hitji li po?”

4Iya ye we ve yaka ha tyaa: “Nan̯i kamu tangele okutya okudha pomautilo Omuuti we ve uta omulumentu nomukadhintu? 5Iya nyahoka matji tya omulumentu ma ka thiaa po ina naihe, he ke likuta komukadhintu we, iya hemba vavali mava ile omuntu umo. 6Iya kaava kala uke vavali, iya omuntu umo. Iya Kalunga soka hiaa twaa kumo, hátji ithwa kumo komuntu.”

7Wo ve mu pula hava tyaa: “Iya omena lyatji Moses hiee tu heela okutya omulumentu nga yandje omukanda wokuliyala, e mu yale?”

8Jesus we ve yaka ha tyaa: “Iya Moses we mu itavela mu yale ovakadhintu ven̯i, mena lyokutya omitima vyen̯i omikukutu. Iya tjo hatjo tja li nyahoka okudha pomautilo. 9Iya ame me mu heele okutya nguma yala omukadhintu we, hihatji thi mena lyovihulo, atjaa ye ha kupu umo, ma i movihulo.”

10Ovalongwa ve ve mu heela hava tyaa: “Nan̯i andaa olukupo otjo lu li nyahoka, hahe ahamaku likupwa.”

11Jesus we ve heela ha tyaa: “Hamuntu auhe e yuvite odhondaka hendhi, iya owomboka vala mbave tji pewa. 12Ovantu vamo otjo va yumukwa, kava kupu, vamo va thonwa kovakwawo. Vamo kava kupu, opo va undapele Kalunga nawa. Nguu tji yuvite, nge tji ninge.”

Jesus ma pa oulele elao

(Mark. 10:13-16; Luk. 18:15-17)

13Iya oulele wa etwa kuJesus, e u tendeke omawoko, ye e u kumbile. Iya ovalongwa va tjaela mboka mbava li amava eta oulele. 14Iya Jesus we ve heela ha tyaa: “Yethen̯i oulele, u ye kwaame, hámu u tjaele, mena lyokutya otjilongo tjeulu otjovantu mbava ngala oulele hembu.”

15We u tendeka omawoko, tjau ha dhi po.

Etele ehona

(Mark. 10:17-31; Luk. 18:18-30)

16Iya taa tuutuu, etele limo lye ya kuJesus, hali tyaa: “Mulongethi, mba thele okuninga tji otjiwa, ndji mone omwenyo waapehe?”

17Jesus we mu yaka ha tyaa: “Omena lyatji mo mpula okutya otjiwa otjitji? Omuwa yuumo vala. Iya andaa mo hala okuya momwenyo, takametha ovitumino.”

18Etele lye mu pula hali tyaa: “Ovitumino ovin̯i?”

Jesus we mu yaka ha tyaa: “Hoovyombi: Hó dhipaa, hó yono olukupo, hó vaka, hó kuminine, 19tumbaleka iho nanyoko, kala au hole omukwen̯i ngahi u lihole omwene.”

20Etele lya heela Jesus hali tyaa: “Ovipuka avihe hembi mbe vi takametha. Otjitji uke himba kambetha?”

21Jesus we mu yaka ha tyaa: “Andaa mo hala okukala awe lihu po nawa, enda, u ka landethe po emona lyoye, u li yandje kovathona, iya ove u kale nemona meulu, tjau ove u ye, u ndandule.”

22Etele hilya tee odhondaka ndhoka, lya dha po alya etetha onkenda, mena lyokutya lya li nemona en̯ingi.

23Iya Jesus wa heela ovalongwa ve ha tyaa: “Ame me mu heele otjatjili okutya omuhona u na oudheu okuya motjilongo tjeulu. 24Me mu heele uke okutya ongamelu okupitila meyulu lyonguya otjipu okupon̯a omuhona okuya motjilongo tjaKalunga.”

25Ovalongwa hiva tee odhondaka ndhoka, va li ave kumwa unene, hava tyaa: “Iya nan̯i nguma ulu okuhupithwa aan̯i?”

26Jesus we ve tala, he ve heele ha tyaa: “Komuntu kaatji tjiiwa, iya kuKalunga ovipuka avihe vi tjiiwa.”

Ondjambi yovalanduli vaJesus

27Petrus wa yaka Jesus ha tyaa: “Taa tuutuu, nt̯e twa thiaa po ovipuka avihe, hatu ku landula. Matu ka pewa tji?”

28Jesus we ve heela ha tyaa: “Ame me mu heele otjatjili okutya Omuna wOmuntu hima ka kala pohi kotjipunditumino tjetumbalo lye mouye mbumau ya, nan̯e wo mbamwa ndandula mamu ka kala pohi kovipunditumino omulongo navivali okukoya omaanda omulongo naavali aIsrael. 29Auhe ngwaa thiaa po onganda ne ovanitje novakulwe ovadhantu ne odhompandje ne ihe ne ina ne ovana ne ovyana mena lyandje, me ke vi pewa twethele, nomwenyo waapehe me ke u pingana. 30Iya ovantu ovengi napano mbave li owolutenga, mava ka kala owokon̯ima, ovengi mbave li owokon̯ima, mava ka kala owolutenga.

Etestamende Epe Moludhimba

© 2012 Bible Society of Namibia

More Info | Version Index