Search form

Mateus 20

Ovaundapi motjuundo tjomivinyu

1“Otjilongo tjeulu tji ngala omulumentu ngwaa pita omuhuka, a ka taendhe ovaundapi womotjuundo tje. 2Ve liitavela novaundapi, e ve thute ondenari metango limo. We ve tuma kotjuundo tje tjomivinyu. 3Pomoovi womuhuka wa ya komalandethelo, hamono ovantu mbava kulama vala, háve na himava ningi. 4We ve heela ha tyaa: ‘Nan̯e wo enden̯i kotjuundo tjandje tjomivinyu, me mu thutu hitje mu yeleke.’ 5Iya wo va ya. Wa ya uke powola omulongo nambali nopontyatatu, ha ningi ngahi a ombo aa ningi. 6Iya powola ontyatano wa pita mo, ha mono ovantu mbava kulama. We ve heela ha tyaa: ‘Iya omena lyatji mwa kulama vala hempa etango alihe, hámu na himamu undapa?’ 7Ve mu yaka hava tyaa: ‘Kape na ngwee tu kongo.’ Ye we ve heela ha tyaa: ‘Nan̯e wo enden̯i kotjuundo tjandje tjomivinyu.’

8“Iya okawiiwii hika wile pohi, omwene wotjuundo wa heela omuntu we, omuviyuli, ha tyaa: ‘Ithana ovaundapi, u ve pe othuto, uta nambave ya kon̯ima katee kumbave ya olutenga.’ 9Iya mbave ya pontano, hive ya, va pewa auhe ondenari imo. 10Iya mboka owolutenga hive ya, va li amava tya pamo mava pewa otjingi okupon̯a ovakwawo, iya auhe wa pewa wo ondenari imo. 11Iya hive dhi pewa, va ngongotela omulumentu ngoka, 12hava tyaa: ‘Ovantu mbava undapa owola imo, mbave ya kon̯ima, owo mo yeleke nant̯e mbatwa yuhala amatu undapa etango alihe momutenya mbwaa pupyala.’

13“Iya wa yaka umo owomuwo ha tyaa: ‘Mukwetu, ame hí ku ningile ovineya. Nan̯i katu popile ondenari imo. 14Itha po ondenari yoye, enda. Nguka ngwee ya kon̯ima, omwene aame me mu pa ngahi mbe ku pa wo. 15Ne nan̯i mba tjaelwa okuundapa ovipuka vyandje ngahi me hala? Ne u na onki, mena lyokutya ame ndjimuntu omuwa?’

16“Iya owokon̯ima mava ka kala komeho, nowokomeho mava ka kala owokon̯ima, mena lyokutya ovaithanwa ovengi, ovaholowolwa ovanunu.”

Jesus ma popi otjikando otjityatatu ouhunga net̯o lye

(Mark. 10:32-34; Luk. 18:31-34)

17Jesus hiaa li ama i kombanda koJerusalem, wa itha po ovalongwa omulongo navavali, ve ke likalele. Mondjila we ve heela ha tyaa: 18“Taa tuutuu, matu i kombanda koJerusalem, Omuna wOmuntu ma ka yandjwa momawoko ovayambethi ovanene novalongiveta, mave ke mu koyela et̯o. 19Mave ke mu yandja momawoko ovapaani, a penywe, a tonwe, a papelwe komutjaakano. Iya etango etyatatu ma ka imunwa kout̯e.”

Okukumba kwaina yoomunkwaSebedeus

(Mark. 10:35-45)

20Iya ina yoomunkwaSebedeus we ya novana ovalumentu kuJesus. Wa twika odhongolo, he mu kumbu, e mu ningile tja.

21Jesus we mu pula ha tyaa: “Mo hala tji?”

We mu yaka ha tyaa: “Itavela ovanwandje hemba vavali, va ka kale pohi, umo okokulyo kwoye, umo okokumbinda kwoye, motjilongo tjoye.”

22Jesus we ve yaka ha tyaa: “N̯e himamu kumbu, kamu tji i. Otjinwino hime ka nwa, mamu ulu oku ke tji nwa?”

Ve mu yaka hava tyaa: “Matu tji ulu.”

23We ve yaka ha tyaa: “Andaa otjinwino tjandje mamu tji ulu, iya okukala pohi kokulyo ne kokumbinda kwandje, haame me ku yandja, maku ka yandjwa kumbave ku longekedhelwa kuTate.”

24Iya omulongo hive tji tee, va yumaneka ovalilanduli mboka vavali. 25Jesus wa ithanena ovalongwa ve pamo, he ve heele ha tyaa: “Mu tji i okutya ovatumini woviwan̯a ve vi tumina, novanene vavyo ve vi tumina nodhonkono dhawo. 26Iya mokati ken̯i hámu kala nyahoka. Iya mokati ken̯i nguma hala a kale omunene, nge mu undapele. 27Iya mokati ken̯i nguma hala a kale omunakomeho, nga kale omupika wen̯i, 28nOmuna wOmuntu ke dhile okuundapelwa, iya okuundapa nokuyandja omwenyo we, u ninge ondjowo yovantu ovengi.”

Ovapot̯i vavali

(Mark. 10:46-52; Luk. 18:35-43)

29Iya Jesus novalongwa ve hiva dhi moJeriko, owingi wovantu we mu landula. 30Ovapot̯i vavali va li ava kala pohi pontyo yondjila, hiva tee Jesus hima ende po, va wololoka hava tyaa: “Muhona, MunwaDavid, tu t̯ila onkenda!”

31Iya owingi wovantu we ve anda, va nyime, iya mbenya va kambulitha vala okuwololoka, hava tyaa: “Muhona, MunwaDavid, tu t̯ila onkenda!”

32Iya Jesus wa kulama, he ve ithana ha tyaa: “Mamu hala ndji mu ningile tji?”

33Ve mu yaka hava tyaa: “Muhona, matu hala tu twikululwe.”

34Iya Jesus we ve etethela mo onkenda, ha t̯in̯i omeho awo, dhivadhiva va twikuluka, hava landula Jesus.

Etestamende Epe Moludhimba

© 2012 Bible Society of Namibia

More Info | Version Index