Search form

Mateus 22

Eeli lyotjipito otjolukupo

(Luk. 14:15-24)

1Iya Jesus we ve heela uke omaeli ha tyaa: 2“Otjilongo tjeulu tji ngala ohamba ndjaa ningila omuna omudhantu otjipito tjolukupo. 3Ohamba ya tuma ovapika vayo oku ka ithana ovakongwa, ve ye kotjipito tjolukupo. Iya mbenya kava li amava hala okuya. 4Ohamba ya tuma ko uke ovapika vamo, hai tyaa: ‘Ka heelen̯i ovakongwa okutya ame mba longekedha otjipito, odhondumentu nodhontandona dhandje ndhaa n̯ina dha dhipawa. Iya ovipuka avihe vya longekedhwa, indjen̯i kolukupo.’ 5Iya kava li ave na ko natja, va dha po, umo wa ya kotjana tje, omukwawo wa ka tjingitha ovipuka vye. 6Mbave thiwa po va kambula ovapika wohamba, ve ve tatetha, have ve dhipaa. 7Iya ohamba ya li aya yumana, hai tumu ko ovakwavita vayo. Ya han̯auna po ovadhipai mboka, notjitungwalongo tjawo ye tji hika po. 8Iya ya heela ovapika vayo hai tyaa: ‘Otjipito tjolukupo tja pu okulongekedhwa, atjaa ovakongwa katji ve thevelelwe. 9Enden̯i komawaneneno omivanda, auhe ngumamu mono, mu kongen̯i kotjipito tjolukupo.’ 10Ovapika mboka va ya kodhondjila, hava ongo omuntu auhe nguva mono, omuwa nomuvi. Iya otjipito tjolukupo tje yulile ovayenda.

11“Ohamba hiye ya okutala ovayenda himava li, ya mona mo umo nguhaa li nomudhalo wotjipito tjolukupo. 12Ohamba ye mu heela hai tyaa: ‘Ove, we ya mo vi hemu, ove aho na tja omudhalo wotjipito?’ Omuyenda wa li vala aa nyimi. 13Iya ya heela ovantu vayo hai tyaa: ‘Mu kuten̯i komawoko nokomakulu, n̯e mu mu yumbe kotjila met̯iku, moka mumamu ka kala otjililo nelikweyo lyomayoo!’

14“Iya ovengi va ithanwa, atjaa mbava holowolwa ovanunu.”

Okuyandja elilimo komukesari

(Mark. 12:13-17; Luk. 20:20-26)

15Iya Ovafarisai va pita mo, va ka tompole okutya mave tjiiwa vi okutela Jesus modhondaka. 16Iya ve mu tumina ovalongwa vawo pamo namboka mbava ama kuHerodes, hava tyaa: “Mulongethi, tu tji i okutya oove owatjatjili, ove u longa ondjila yaKalunga otjatjili, ku na tja nomuntu, mena lyokutya ove ku tala otjipala tjomuntu. 17Iya tu heela okutya ove mo tya vi? Tja vyuuka tuu okuyandja elilimo komukesari ne katji vyuukile?”

18Iya Jesus hiaa iwa ovineya vyawo, we ve heela ha tyaa: “Valinomi n̯e, omena lyatji mamu hala okundola? 19Ndjulikila ndjen̯i ombongo yelilimo!”

20Iya Jesus we ve pula ha tyaa: “Ethano nesoneko hendi ndii li ko, olyaan̯i?”

21Wo ve mu yaka hava tyaa: “Olyomukesari.”

Iya Jesus we ve heela ha tyaa: “Ovipuka vyomukesari vi pen̯i omukesari, ovyaKalunga vi pen̯i Kalunga.”

22Iya hive tji tee, va li ave kumwa, have mu thii po, hava i.

Olukupo peimuko kout̯e

(Mark. 12:18-27; Luk. 20:27-40)

23Etango ndyoka Ovasadukai, mboka mbava tya kaku na tja eimuko kout̯e, ve ya kuJesus, have mu pula, 24hava tyaa: “Mulongethi, Moses we tu heela okutyaa: ‘Andaa omulumentu wa t̯i, atjaa ahama thii po odhondele, omukulwe ne omunitje nga kupe omuhepe womukulwe ne womunitje, e mu yumukile oluyumuko.’ 25Iya punt̯e pa li ovalumentu ovalilanduli epanduvali. Owolutenga wa kupile, ha t̯i, ahama thii po oluyumuko, iya omuhepe wa kupwa komunitje. 26Otjo tja ningwa wo komutyavali nomutyatatu katee naa avehe epanduvali va pu po. 27Iya omuhepe wa ka t̯a kon̯ima. 28Iya peimuko kout̯e, ma ka kala omukadhintu waan̯i, mena lyokutya avehe epanduvali ve mu kupile?”

29Jesus we ve heela ha tyaa: “Mwa puka, mena lyokutya omisonekwa kamu vi i, nodhonkono dhaKalunga kamu dhi i. 30Iya peimuko kout̯e, kaava ka kupa, wo kaava ka kupwa, iya mava ka ngala ovaengeli meulu. 31Iya kombinga yeimuko kout̯e lyovat̯e, kamu tangele nan̯i odhondaka ndhimwa heelwa kuKalunga, hiaa popya ha tyaa: 32‘Aame Kalunga kaAbraham naKalunga kaIsak naKalunga kaJakob?’ Ye háKalunga kovat̯e, iya okovanamwenyo.”

33Ovantu hive tji tee, ve kuminwa elongo lye.

Otjitumino otjinene

(Mark. 12:28-34; Luk. 10:25-28)

34Iya Ovafarisai hiva tee okutya Jesus wa yaka Ovasadukai, Ovasadukai hava nyimi, Ovafarisai va ongana pamo. 35Omulongiveta umo owomuwo wa lola Jesus, he mu pula ha tyaa: 36“Mulongethi, otjitumino otjinene moveta otjin̯i?”

37Jesus we mu yaka ha tyaa: “ ‘Kala au hole Muhona Kalunga koye komutima woye auhe nokomwenyo woye auhe nokodhondunge dhoye adhihe.’ 38Hehi otjo tji li otjitumino otjinene tjolutenga. 39Notjityavali hitji lithike pusoka, hootjohi himatji tyaa: ‘Kala au hole omukwen̯i ngahi u lihole omwene.’ 40Oveta aihe novaprofeti ya kambulilwa movitumino hembi vivali.”

Kristus omunwaan̯i?

(Mark. 12:35-37; Luk. 20:41-44)

41Iya Ovafarisai tainkolo va vadhwa ava ongana, Jesus we ve pula ha tyaa: 42“Mamu tya vi ouhunga naMessias? Omunwaan̯i?”

Ve mu yaka hava tyaa: “OmunwaDavid.”

43Jesus we ve heela ha tyaa: “Iya nan̯i ovi David hiaa viyulwa kOmbepo, he mu ithana ‘Muhona’? Wa popya ha tyaa: 44‘Muhona wa heela Muhona wandje ha tyaa: Kala pohi kokulyo kwandje katee me twaa odhondjedhi dhoye kohi yodhompadhi dhoye.’ 45Iya andaa David me mu ithana ‘Muhona,’ iya ma ile vi uke omuna?”

46Kape na tja ngwaa li ama ulu okuyaka Jesus. Iya okudha ketango ndyoka, kapa li noumo ngwaa li ama hala oku mu pula uke omapulo.

Etestamende Epe Moludhimba

© 2012 Bible Society of Namibia

More Info | Version Index