Search form

Mateus 23

Lungamenen̯i Ovalongiveta nOvafarisai

(Mark. 12:38-40; Luk. 11:37-52; 20:45-47)

1Iya Jesus wa heela owingi wovantu novalongwa ve, 2ha tyaa: “Ovalongiveta nOvafarisai va kala pohi kotjipundi tjaMoses. 3Iya atjihe soka himave mu heele, tji ningen̯i, n̯e mu tji kambulithe, atjaa hámu holele ovilinga vyawo. Iya hiva popya, hatjo va undapa. 4Va kuta omitenge mbyaa lema, have vi twaa komapepe ovantu. Iya wo ovene kava hala okut̯in̯a ko omunwe nokanunu. 5Ovilinga vyawo avihe ve vi undapa, opo va moneke kovantu. Iya oupapa wawo mumu na omatumbulo omOmbimbeli, ve u ninga ounene, nodhondjambwila dhomidhalo dhawo odhonde. 6Movipito ve hole pomalukalo ngaa tumbala nokovipundi vyokomeho modhosinagoga. 7Ve hole okupopithilwa pomalandethelo nokwiithanwa ‘Rabbi’ kovantu. 8Iya n̯e hámu ithanwa Rabbi, mena lyokutya omulongethi wen̯i yuumo, n̯e amuhe mu lilandula. 9Hámu ithana omuntu noumo kombanda yohi noumo iho mena lyokutya Iho yuumo meulu. 10Hámu ithanwa ovaviyuli, mena lyokutya omuviyuli wen̯i yuumo, oMessias. 11Omunene mokati ken̯i ngwaa pon̯a ovakwawo nga kale omuundapeli wen̯i. 12Iya ngume linenepeke, ma nunupikwa, ngume linunupike, ma nenepekwa.

Jesus ma yumaneke Ovafarisai novalongiveta

(Mark. 12:40; Luk. 11:39,44-52; 20:47)

13“Utatyei, n̯e ovalongiveta nOvafarisai, valinomi n̯e! Ovantu mu ve yedhilila pondje yotjilongo tjeulu, iya n̯e ovene kaamu hiti mo, mu tjaela mboka mbamava hala okuhita mo. 14[Utatyei, n̯e ovalongiveta nOvafarisai, valinomi n̯e! Mu nyeka ovahepe odhonganda dhawo, n̯e hamu ningi omaalikano omale okulimoneketha vala! Iya mamu ka pewa onkali onene.]

15“Utatyei, n̯e ovalongiveta nOvafarisai, valinomi n̯e! Mu kambakana elunga nohi, mu mone omulongwa umo. Iya andaa tja ningwa, mu mu ninga omuna woheli, ngwee mu pon̯a tuvali.

16“Utatyei, n̯e ovaviyuli ovapot̯i, mbamu popya hamu tyaa: ‘Andaa pe na nguma ana otempeli, eano lye kali na tjilinga, iya andaa pe na nguma ana otjingoldo tjotempeli, nga kambulithe eano lye.’ 17Vahima novapot̯i! Otjin̯i hitja pon̯a otjikwawo, otjingoldo ne otempeli ndjii ningitha otjingoldo tji kale otjidhilikwa. 18N̯e mu tyaa: ‘Andaa pe na nguma ana otjiyambelo, eano lye kali na tjilinga, iya nguma ana otjali hitji li kotjiyambelo, nga kambulithe eano lye.’ 19Vapot̯i n̯e! Otjin̯i hitja pon̯a otjikwawo, otjali ne otjiyambelo hitji ningitha otjali tji kale otjidhilikwa? 20Iya nguma ana otjiyambelo, ma ana otjiyambelo novipuka avihe mbii li ko. 21Iya nguma ana otempeli, ma ana otempeli, ha ana nguu kala mo. 22Nguma ana eulu, ma ana otjipunditumino tjaKalunga, ha ana nguu kala ko.

23“Utatyei, n̯e ovalongiveta nOvafarisai, valinomi n̯e! Mu yandja otjityamulongo tjondundukadhe notjodili notjokumina. Iya mu yetha ovinenepuka vyomoveta, ouvyuuki, onkenda neitavelo. Iya ovipuka mbyoka ovyo vya thele okuundapwa nahembinya kavya thele okuyethwa. 24Vaviyuli ovapot̯i! Omwi mu i kenga ko, n̯e hamu n̯in̯a ongamelu!

25“Utatyei, n̯e ovalongiveta nOvafarisai, valinomi n̯e! Mu koha oneka nelonga kombanda, iya mokati mwe yula enyeko nothin̯a. 26Mufarisai ove omupot̯i, olutenga koha oneka mokati, opo i kale wo aya kohoka nokombanda.

27“Utatyei, n̯e ovalongiveta nOvafarisai, valinomi n̯e! Mu ngala odhombila ndhaa hotwa, ndhee thewa kombanda, iya mokati dhe yula omat̯ipa ovat̯e noluwolela aluhe. 28Iya nan̯e wo movipathi vyovantu mu ngala ovavyuuki, iya modhontulo dhen̯i mwe yula elinomo noulundhi.

Ovalinomi mava koywa

(Luk. 11:47-51)

29“Utatyei, n̯e ovalongiveta nOvafarisai, valinomi n̯e! Mu tunga odhombila dhovaprofeti, hamu thevetha omawe okodhombila dhovavyuuki, 30iya mu tyaa: ‘Ngaile twa li pomatango ootateombwale, ngai nt̯e katu yembele kumboka mbava dhipaa ovaprofeti.’ 31Iya nyahoka mwe lihipulula okutya muvana wovantu mboka mbava dhipaa ovaprofeti. 32Iya hwithilen̯i po okuundapa atjihe owoihoombwale hiva undapa. 33Dhonyoka n̯e, luyumuko n̯e lwodhonyoka. Mamu ulu vi okwiinkola ekoyo lyoheli. 34Taa tuutuu, iya mena lyanyahi ame me mu tumine ovaprofeti novanadhondunge novalongiveta. Vamo owomuwo mamu ke ve dhipaa, hamu ke ve papela komutjaakano, vamo mamu ke ve tona nodhosokoti modhosinagoga dhen̯i, hamu ke ve taata modhondolopa nodhondolopa. 35Iya ombindhi ombyuuki aihe ndjaa tilwahi kombanda yohi, mai ke ya kombanda yen̯i okudha kombindhi yaAbel omuvyuuki katee kombindhi yaSakaria, munkwaBarakia ngumwa dhipaela pokati kotempeli notjiyambelo. 36Otjatjili me mu heele okutya avihe hembi mavi ya kombanda yekula hendi.

Jesus ma yumaneke Jerusalem

(Luk. 13:34-35)

37“Jerusalem, Jerusalem, ove nguu dhipaa ovaprofeti, u dhipaa nomawe mboka mbawa tuminwa. Itungapi ndji hala okwoongedha ovanoye ngohuhwa hii ongedha oupiyona wayo kohi yomavava ayo, atjaa ove ku hala! 38Iya taa tuutuu, napano onganda yen̯i mai kala etuntu. 39Iya me mu heele okutya kaamu ka mbona uke, katee mamu tyaa: ‘Nga tumbalekwe hengu ngume ya mena lyaMuhona!’ ”

Etestamende Epe Moludhimba

© 2012 Bible Society of Namibia

More Info | Version Index