Search form

Mateus 27

Jesus ma yandjwa

(Mark. 15:1; Luk. 23:1-2; Joh. 18:28-32)

1Iya omuhuka omunene hikwa tji, ovayambethi ovanene avehe novanene wotjiwan̯a va ongana okutompola ouhunga naJesus, opo ve mu dhipae. 2Ve mu kuta, have mu itha po, have mu yandja kuPilatus, omutumini wotjilongo.

Et̯o lyaJudas

(Ovil. 1:18-19)

3Iya Judas, omuweleleki wa Jesus, hiaa mono okutya Jesus ma koywa, we liteyulula, ha tjun̯a odhombongo omilongo vitatu dhotjisilveri kovayambethi ovanene nokovanene, 4ha tyaa: “Ame mba lundha, himba weleleke ombindhi ndjihai na tja ombedhi.”

Mbenya ve mu yaka hava tyaa: “Tu na tji naove? Lipopila omwene!”

5Judas wa yekelahi odhombongo dhotjisilveri motempeli, ha dhi mo, he ke likuta.

6Ovayambethi ovanene va nyanga po odhombongo dhotjisilveri, hava tyaa: “Ndhika kaadhi ulu okutuwa modhombongo dhotempeli, mena lyokutya othuto yombindhi.” 7Iya va tompola, have dhi landa otjana tjomume wodhombiya, tji ninge oluvedhe lwokupaka odhongendi. 8Iya otjana soka tee kundino hendi tji tiwa otjana tjombindhi.

9Iya tja hwithilwa po soka hitja popiwa komuprofeti Jeremia, hiaa popya ha tyaa: “Va tambula odhombongo omilongo vitatu dhotjisilveri, othuto yomuntu ngwaa yelekwa, ngahi ve mu yeleka novanwaIsrael. 10Iya ve dhi yandja kotjana tjomume wodhombiya, Muhona ngahi a ntjeela.”

Jesus kotjipala tjaPilatus

(Mark. 15:2-5; Luk. 23:3-5; Joh. 18:33-38)

11Jesus wa kulama kotjipala tjomutumini. Omutumini we mu pula ha tyaa: “Oove ohamba yOvajuda?”

Jesus we mu yaka ha tyaa: “Iinga, otjo ngahi wa popi.” 12Iya hiaa li ama pewa onkali kovayambethi ovanene nokovanene wotjiwan̯a, ke na hiaa yaka.

13Pilatus we mu heela ha tyaa: “Ku yuvite himave ku popi navi?” 14Iya Jesus ke mu yakele nokanunu, iya tja kumitha unene omutumini.

Jesus ma koyelwa et̯o

(Mark. 15:6-15; Luk. 23:13-25; Joh. 18:39—19:16)

15Pomatango otjipito tjOpaasa pa li onkalo omutumini ndjaa kutululila ovantu onkwatwa imo ndjimava hala. 16Iya va li nonkwatwa imo ndjaa li ai iwe nawa ndjii tiwa oBarabas. 17Iya hiva ongana, Pilatus we ve pula ha tyaa: “Oun̯i po ngumamu hala ndji mu kutululile, oBarabas ne oJesus nguu tiwa oMessias?” 18Iya Pilatus wa li ae tji i okutya ovantu Jesus ve mu yandja kuye mena lyonki.

19Iya tainkolo Pilatus a li kotjipunditumino, omukadhe we mu tumina elaka ha tyaa: “Omulumentu hengu omuvyuuki. Hó mu ningile ouvi, mena lyokutya otjit̯iku tjandino mba loto ondjodhi ombi ouhunga naye.”

20Iya ovayambethi ovanene novanene wotjiwan̯a va hekela owingi wovantu okutya ngava kumbe Barabas, iya Jesus nga dhipawe. 21Pilatus we ve pula ha tyaa: “Oun̯i po puhemba vavali ngumamu hala ndji mu kutululile?”

Ve mu yaka hava tyaa: “OBarabas!”

22Pilatus we ve pula ha tyaa: “Iya hengu Jesus nguu tiwa oMessias, nge mu ninge vi?”

Avehe va yaka hava tyaa: “Mu papela komutjaakano!”

23Iya Pilatus we ve pula ha tyaa: “Omena lyatji, ouvi mbwaa ningi owatji?”

Iya wo va wololoka vala otjo mava tyaa: “Mu papela komutjaakano!”

24Pilatus hiaa mono okutya ke na hima ulu, otjuuyila tja ningi otjinene, wa itha omeva, he likoho komawoko movipathi vyowingi wovantu, ha tyaa: “Ame hí na tja ombedhi yombindhi yomulumentu hengu, hehi otjipuka tjen̯i.”

25Iya ovantu avehe va yaka hava tyaa: “Ombindhi ye ngai ye kombanda yetu nokombanda yodhondele dhetu!” 26Iya we ve kutululila Barabas, atjaa ha tonetha Jesus nodhosokoti, he mu yandja, a ka papelwe komutjaakano.

Ovakwavita mava penye Jesus

(Mark. 15:16-20; Joh. 19:2-3)

27Ovakwavita womutumini va twala Jesus mombala, hava ongedhele ovakwavita avehe puJesus. 28Ve mu dhula omidhalo vye, have mu dhaleke omudhalo omunene omuthilantu. 29Va manga ohala yomakuya, have mu dhaleke yo komutwe. Ve mu pa otjingenge mokuwoko kwe kwokokulyo, have mu twikile odhongolo, have mu penye, hava tyaa: “Lyepeko, ohamba yOvajuda!” 30Ve mu tjakela omate, hava itha otjingenge, otjo va kala amave mu tono natjo momutwe. 31Hiva dhi poku mu penya, ve mu dhula omudhalo omunene, have mu dhaleke omidhalo vye. Iya ve mu twala, a ka papelwe komutjaakano.

Jesus ma papelwa komutjaakano

(Mark. 15:21-32; Luk. 23:26-43; Joh. 19:17-27)

32Hiva li amava piti mo, va mona omulumentu Omukireni nguu tiwa oSimon. Ve mu tumin̯in̯a e mu tjindile ko omutjaakano we. 33Iya hive ya koluvedhe nduu tiwa oGolgata, matji tya kOkalundu kOtjoolotwe, 34Jesus ve mu pa a nwe ovinyu mbyaa lumbwalumbwa mumo nonyango, hiee vi lolo, ahama hala oku vi nwa.

35Hive mu papele komutjaakano, ve liyandjela omidhalo vye, amava undapetha otjiholowoletho.36Wo va kala pohi hoka, have mu yungu. 37Va twaa kombanda yomutwe we esoneko lyonkali ndjaa sonekwa hinyahi: “Hengu oJesus, Ohamba yOvajuda.” 38Iya odhomputji mbali dha papelwa komutjaakano pamo naye, imo okokulyo nonkwawo okokumbinda kwe.

39Mbava li amava ende po, va penya Jesus, otjo mava pukapuka komitwe.40Va popya hava tyaa: “Atjaa oove mo han̯auna otempeli, ove ho i tungulula moule womatango atatu. Lihupitha iya ove omwene, andaa oove MunwaKalunga, ove u dhe ko komutjaakano!”

41Ovayambethi ovanene novalongiveta novanene wotjiwan̯a nawo wo ve mu penya hava tyaa: 42“Nahi oye a hupitha ovantu, napano wa anyenwa okulihupitha. Oye e li ohamba yaIsrael, nga dhe ko napano komutjaakano, nt̯e tu mu itavele. 43Ye we liun̯ika muKalunga, iya Kalunga napano nge mu hupithe, andaa u mu hole, mena lyokutya ye omwene wa tile: ‘Aame MunwaKalunga.’ ”

44Iya nodhomputji ndhaa papelwa pamo naye nadho wo dhe mu penya.

Okut̯a kwaJesus

(Mark. 15:33-41; Luk. 23:44-49; Joh. 19:28-30)

45Iya owola omulongo nambali yokomutenya kwe ya et̯iku motjilongo atjihe, lyo hali kala ko katee owola ontyatatu yokomutenya. 46Mondatu yokomutenya Jesus wa ithana nondaka onene ha tyaa: “Eli, Eli, lama sabakatani?” Matji tyaa: “Kalunga kandje, Kalunga kandje, omena lyatji wa ndjekelehi?”

47Iya vamo owomumboka mbava li ava kulama mpoka, hive tji tee, va popya hava tyaa: “Ma ithana Elia.” 48Umo owomuwo wa dhamuka dhivadhiva, ha itha po otjitjawo, he tji tjava movinyu mbyaa lula, he tji nwitha Jesus.

49Iya ovakwawo ve mu heele hava tyaa: “Mu yetha, tu tale, andaa Elia me ya oku mu hupitha.”

50Iya Jesus wa popya uke nondaka yopeulu, tjau ha t̯i.

51Iya taa tuutuu, otjitopa hitji yuvikila motempeli tja tauka okudha peulu katee pohi, ohi ya teketa, nomawe okodhondundu a tanduka, 52nodhombila dha patuluka, omalutu ovadhilikwa ovengi mbava t̯a, a imunwa kout̯e. 53Wo va dha mo modhombila, Jesus hiaa imuka kout̯e, have ya kotjitungwalongo otjidhilikwa, have lihololele ovengi.

54Omunene wovakwavita namboka mbava li amava yungu pamo naye, hiva mono eteketo lyohi novipuka avihe mbyaa ningwa po, va li ava tila unene, hava tyaa: “Omuntu hengu otjatjili wa li OmunwaKalunga.”

55Iya kompuka hoka kwa li ovakadhintu ovengi mbava dhile koGalilea, mbava landulile Jesus, ve mu popile. Va li amava talele kokule.56Muwo mwa li Maria Magdalena naMaria, ina yaJakob naJosef, naina yoomunkwaSebedeus.

Jesus ma pakwa

(Mark. 15:42-47; Luk. 23:50-56; Joh. 19:38-42)

57Iya okawiiwii hika wile pohi, pe ya omulumentu omuhona Omwaarimatia nguu tiwa oJosef, ngoka wo ngwaa li omulongwa waJesus. 58We ya kuPilatus, he mu kumbu otjivimbi tjaJesus. Iya Pilatus wa popya okutya nge tji pewe. 59Josef wa itha otjivimbi, he tji dhingile motjitopa tjoliina otjiwa hitja kohoka. 60We mu paka mombila ye ompe, ndjaa hokolele mewe. Iya wa alangatethela po ewe enene potjivelo tjombila, tjau ha dhi po. 61Iya hoka kwa li Maria Magdalena naMaria omukwawo, va li ava kala pohi, ava pilukile kombila.

Ombila mai yungwa

62Iya ngamuhuka etango ndyaa landula etango lyokulilongekedha, ovayambethi ovanene nOvafarisai va ongana puPilatus, 63hava tyaa: “Taa, twa thipaluka, omupukithi ngunya tainkolo aa li nomwenyo, wa tile: ‘Andaa pa piti omatango atatu, me ka imunwa kout̯e.’ 64Iya popya okutya ombila ngai yungwe katee etango etyatatu, ovalongwa ve opo háve ya oku mu vaka mo, va heele ovantu, va tyee: ‘Jesus wa imunwa kout̯e.’ Omapukitho okon̯ima maa ningi omavi okupon̯a oolutenga.”

65Pilatus we ve heela ha tyaa: “Ovayungi hoowomba, iya enden̯i, n̯e mu ka yunge nawa ngahi mu tji i.”

66Iya wo va ya, hava yedhile po ewe, hava twaa ko otjihako, nopombila hava twaa po ovayungi.

Etestamende Epe Moludhimba

© 2012 Bible Society of Namibia

More Info | Version Index