Search form

Mateus 28

Eimuko lyaJesus kout̯e neliholololo lye

(Mark. 16:1-10; Luk. 24:1-12; Joh. 20:1-10)

1Iya kon̯ima yEsabati, ombimba hiya vete yetango lyolutenga lyotjivike, Maria Magdalena naMaria omukwawo va ya, va ka tale kombila. 2Iya taa tuutuu, pa ningwa eteketo enene lyohi, mena lyokutya omweengeli waMuhona wa dha meulu, he ya po, ha alangatetha po ewe, ye hako a kala. 3Olupe lwe lwa li amalu ngala olukeno lwombula, nomidhalo vye vya li avya pembana twee, havi ngala odhompawe. 4Iya ovayungi va li amave mu tila, va teketa, hava ngala mbava t̯i.

5Omweengeli wa popitha ovakadhintu ha tyaa: “Hámu tila, mena lyokutya ndji tji i okutya mamu taendha Jesus, ngwaa papelwa komutjaakano. 6Ke mo hemu, mena lyokutya wa imunwa kout̯e, ngahi a popile. Indjen̯i mu tale pompuka mpaa li aa lala po. 7Iya enden̯i, kanyauken̯i ka heelen̯i ovalongwa ve okutya Jesus wa imunwa kout̯e. Iya taa tuutuu, ma ka tenga okuya koGalilea, oko mamu ke mu mona. Taa tuutuu, ame mbe mu heele tjo.”

8Iya pombila va dha po amava kanyauka, va li nowoma nehuluko enene, hava ka heela ovalongwa ve.

9Iya Jesus wa wanena nawo ha tyaa: “Okamenen̯i!” Va hweena kuye, have mu kambula kodhompadhi, have liyongamene kuye. 10Jesus we ve heela ha tyaa: “Hámu tila, enden̯i mu ka heele ovakwetu, va ende koGalilea, hoka oko mava ka mbona.”

Ovayungi mava papwa

11Tainkolo ovakadhintu va li mondjila yawo oku ka heela ovalongwa, ovayungi vamo ve ya kotjitungwalongo, hava hipululile ovayambethi ovanene ovipuka avihe mbyoka mbyaa ningwa ko. 12Iya wo va ongana pamo novanene, va tompola, hava papa ovakwavita nodhombongo odhingi, 13hava tyaa: “Tyen̯i, ovalongwa ve ve ya out̯iku, have mu vaka mo, tainkolo twa lala. 14Iya andaa tja teeka komutumini, nt̯e matu ke mu hekela, nan̯e matu ke mu itha moudheu.”

15Iya va tambula odhombongo, hava ningi ngahi va longwa. Otjipuka hehi tji hipululwa mokati kOvajuda, katee ndino hendi.

Otjitumino tjathiinina tjaJesus

(Mark. 16:14-18; Luk. 24:36-49; Joh. 20:19-23; Ovil. 1:6-8)

16Iya napano ovalongwa omulongo naumo va ya koGalilea kondundu ndjoka Jesus ndjee ve heelele. 17Iya hive mu mono, ve liyongamena kuye, vamo va li ava limbililwa. 18Jesus we ya kuwo, he ve heele ha tyaa: “Ame mba pewa etumino alihe meulu nokombanda yohi. 19Iya enden̯i ka ningen̯i ovantu avehe ovalongwa vandje, mu ve tjatjele mena lyaIhe nolyOmuna nolyOmbepo Ondhilikwa, 20n̯e mu ve longe okutakametha ovipuka avihe mbimbe mu longa. Iya taa tuutuu, ame ndji li pamo nan̯e omatango aehe katee pehulilo lyouye.”

Etestamende Epe Moludhimba

© 2012 Bible Society of Namibia

More Info | Version Index