Search form

Mateus 3

Johannes ma teetha, ye ha tjatja

(Mark. 1:1-8; Luk. 3:1-18; Joh. 1:19-28)

1Pomatango ngenya Johannes Omutjatji we ya, ha teethele mokuti kwaJudea 2ha tyaa: “Liteyululen̯i, mena lyokutya otjilongo tjeulu tje ya popedhi.” 3Johannes oye e li ye nawanawa ngwaa popiwa komuprofeti Jesaja hiaa popya ha tyaa:

“Ondaka yomuwololoki mokuti mai tyaa:

‘Undapelen̯i Muhona ondjila,

mu vyuukililithilen̯i ovilila!’ ”

4Iya Johannes wa dhalele omudhalo mbwaa undapwa nomaenya odhongamelu nomuvya wotjipa motjivya tje. Ovikulya vye vya li otjimbonde noutji. 5Iya okutya ovantu womoJerusalem nowomoulaanganda auhe waJudea nowomoulongo auhe waJordan, va ya kuJohannes, 6wo hava tjatjwa kuye momulonga waJordan, hiva hipulula odhonkali dhawo.

7Iya Johannes hiaa mono Ovafarisai nOvasadukai ovengi mbamave ya okutjatjwa, we ve heela ha tyaa: “Luyumuko n̯e lwodhonyoka, aan̯i ngwee mu londola okutya ka inkolen̯i oluyuma lwaKalunga ndumalu ya? 8Iya undapen̯i ovipuka mbimavi yulike okutya mwe liteyulula. 9Hámu soko okutya mamu ulu okulipopila mu tyee: ‘Tu na tate Abraham.’ Iya me mu heele okutya Kalunga ma ulu okutjitukitha omawe henga, he e ningi oluyumuko lwaAbraham. 10Onkava ya tuwa ae pethina lyomuti. Omuti auhe mbuhau ma ovinyango oviwa, mau kewa po, hau yumbwa momulilo. 11Ame me mu tjatja nomeva himwe liteyulula, iya ngume ya kon̯ima yandje omunene kwaame, ame híme tji ulu nangahi tji li oku mu tjindila odhongaku dhe, ye me ke mu tjatja nOmbepo Ondhilikwa nomulilo. 12Ye u na otjiyeletho mokuwoko kwe, ma kombo otjiwaa tje, ovilya vye me vi ungula motjindhi, iya olungu me lu hike po nomulilo mbuhau dhimi.”

Jesus ma tjatjwa

(Mark. 1:9-11; Luk. 3:21-22)

13Iya Jesus wa dha koGalilea, he ya komulonga waJordan kuJohannes a tjatjwe kuye. 14Iya Johannes we mu anya ha tyaa: “Aame me hepwa okutjatjwa kwoove, ove nkee mo ya kwaame?”

15Jesus we mu yaka ha tyaa: “Iya napano ndjitavela ndje, ouvyuuki auhe u hwithilwe po.” Tjau, he mu itavele.

16Jesus hiaa tjatjwa, wa dha mo dhiva momeva, eulu lye liyapuka, iya taa tuutuu, wa mono Ombepo yaKalunga amai lauka ngonguti, hai mu wilile. 17Iya ondaka ya dha meulu hai tyaa: “Nguka Omunwandje omuhivilikwa, ngumba hopa.”

Etestamende Epe Moludhimba

© 2012 Bible Society of Namibia

More Info | Version Index