Search form

Mateus 5

Eteetho lyokondundu

5:1--7:29

1Jesus hiaa mono owingi wovantu, wa londa kondundu. Iya hiaa kala pohi, ovalongwa ve ve ya kuye. 2Jesus wa uta okupopya, he ve longo ha tyaa:

Ovanalao

(Luk. 6:20-23)

3“Ovanalao ombave li ovathona mombepo,

mena lyokutya otjilongo tjeulu otjawo.

4Ovanalao ombava etetha onkenda,

mena lyokutya mava ka ingwaingwa.

5Ovanalao ovalinunupiki,

mena lyokutya mava ka pingana otjilongo.

6Ovanalao ombava t̯a ondjala nonyota youvyuuki,

mena lyokutya mava ka kutithwa.

7Ovanalao ovanankenda,

mena lyokutya mava ka t̯ilwa onkenda.

8Ovanalao ombave na omitima mbyaa kohoka,

mena lyokutya mava ka mona Kalunga.

9Ovanalao ombava kondjela ouwa,

mena lyokutya mava ka ithanwa ovanwaKalunga.

10Ovanalao ombava tatethelwa ouvyuuki,

mena lyokutya otjilongo tjeulu otjawo.

11“N̯e muvanalao, andaa ovantu mave mu lalula, have mu tatetha, have mu popile mouvi auhe nokukemba, mena lyokutya muvalongwa vandje. 12Linyandaelen̯i, mu hulukwe, mena lyokutya ondjambi yen̯i onene meulu, iya otjo va tatethele ovaprofeti mbava tengele komeho yen̯i.

Omungwa notjiten̯i

(Mark. 9:50; Luk. 14:34-35)

13“On̯e omungwa wouye, iya andaa omungwa wa hahuka, mau tovalethwa natji? Kau na uke otjilinga, mau yekelwahi, hau lyatwa kovantu.

14“On̯e otjiten̯i tjouye. Otjitungwalongo hitja tungilwa kondundu kaatji ulu okuholama. 15Olamba kai ten̯wa, yo hai tuwa kohi yotjihayo, iya i tulikwa kotjituliko, yo hai tungatele ovantu avehe mbave li monganda. 16Iya otjiten̯i tjen̯i ngatji tungatele movipathi vyovantu, opo va mone ovilinga vyen̯i oviwa, wo va hivilike Iho owomeulu.

Jesus ma thitulula oveta

17“Hámu soko okutya ame mbe ya okwiitha po oveta yaMoses ne elongo lyovaprofeti, ame hí dhile oku i itha po, iya oku i hwithila po. 18Iya me mu heele otjatjili okutya tainkolo eulu nohi háviya hula, moveta kaamu keka ondanda noimo ne okankwanyu, tainkolo avihe háviya hwithilwa po. 19Iya andaa pe na nguma itha mo tjimo tjomovitumino hembi ovinunu, atjaa ha longo hinyahi ovantu, ma ka ithanwa omununu kovakwawo motjilongo tjeulu. Iya ngume vi takametha, ha longo ovakwawo nyahi, ma ka ithanwa omunene motjilongo tjeulu. 20Iya ame me mu heele okutya ouvyuuki wen̯i andaa kau pon̯ene owovalongiveta nowOvafarisai, kaamu i motjilongo tjeulu.

Oluyuma

21“N̯e mwe tji tyaa hitja heelwa ovakulu okutyaa: ‘Hó dhipaa,’ haku tiwa uke: ‘Nguma dhipaa, we litaendhele oku ka koywa.’ 22Iya ame me mu heele okutya omuntu auhe nguma yumaneke omukwawo, we liundapele okukoywa. Nanguma heele omukwawo ha tyaa: ‘Tjintu ove,’ we liundapele oluyuma lwOtjoongi tjOvanene. Nanguma tyaa: ‘Tjilai ove,’ we liundapele omulilo woheli. 23Iya andaa mo yandja otjali kotjiyambelo, atjaa hako u thipalukila omukwen̯i okutya u na hiee ku ningi, 24thiaa ko otjali tjoye kotjiyambelo, u tji ye olutenga, mu lipe ouwa nomukwen̯i, ove u tjune, u ka yandje otjali tjoye.

25“Itavela dhiva, mu lipe ouwa nangume ku kondjetha, tainkolo amu li naye mondjila, ngume ku kondjetha, ahame ku yandja komukoyi, omukoyi e ku yandje komuyungi, ove u yedhililwe mokaliwoso. 26Ame me mu heele otjatjili okutya ove koo dhi mo, tainkolo hóya thuta okapeni kathiinina.

Okuyona olukupo

27“N̯e mwe tji tyaa hikwa tiwaa: ‘Hó yono olukupo.’ 28Iya ame me mu heele okutya nguma tala omukadhintu notjihulo, we mu lesa ae momutima we. 29Eho lyoye lyokokulyo andaa mali ku tyoletha, li dhoola mo, ove u li yekelehi, mena lyokutya okukeketha otjin̯ipo tjoye tjimo hahe okupon̯a olutu lwoye aluhe okuyumbwa moheli. 30Okuwoko kwoye kwokokulyo andaa maku ku tyoletha, ku teta ko, ove u ku yekelehi, mena lyokutya okukeketha otjin̯ipo tjoye tjimo hahe okupon̯a olutu lwoye aluhe okuyumbwa moheli.

Okuliyala

(Mat. 19:9; Mark. 10:11-12; Luk. 16:18)

31“Iya kwa popiwa wo okutyaa: ‘Nguma yala omukadhintu we, nge mu pe omukanda wokuliyala.’ 32Iya ame me mu heele okutya omuntu auhe nguma yala omukadhintu mena lyotjipuka tjimo hihatji thi ovihulo, me mu hulithitha. Nguma kupu ngwaa yalwa, ma i movihulo.

Okwaana

33“Otjikwawo uke, mwe tji tyaa hitja heelwa ovakulu okutyaa: ‘Hó ana ovithithi, iya eano lyoye li hwithila po Muhona.’ 34Iya ame me mu heele okutya hámu ana nokanunu, hámu ana eulu, mena lyokutya lyo otjipundi tjaKalunga, 35hámu ana pohi, mena lyokutya ohi otjilyatelo tjodhompadhi dhe, hámu ana Jerusalem, mena lyokutya tjo otjitungwalongo tjOhamba onene. 36Hó ana omutwe woye, mena lyokutya koo ulu okutjitukitha ondjutji imo i ninge ompembadhi ne ondholodhi. 37Odhondaka dhen̯i ngadhi tyee: ‘Iinga, iinga’ ne ‘Aai, aai.’ Ndhimadhi wedhwa ko, odhombi.

Hámu litjun̯ine ouvi

(Luk. 6:29-30)

38“N̯e mwe tji tyaa hitja popiwa okutyaa: ‘Eho okeho, eyoo okeyoo.’ 39Iya ame me mu heele okutya hámu tjun̯ine omuntu ouvi ngume mu ningile ouvi. Iya ngume ku tono koluyewo lwokokulyo, mu pa olukwawo. 40Nguma hala oku ku twala kovikoya, e ku nyeke otjikutu tjoye tjokohi, nekapote lyatjo mu pa lyo wo. 41Ngume ku n̯in̯ikidha, u mu thindikile popedhi, mu thindikila kokule. 42Ngume ku kumbu, mu pa. Hó lwaapele ngume ku li ongele.

Kalen̯i amu hole odhondjedhi dhen̯i

(Luk. 6:27-28,32-36)

43“N̯e mwe tji tyaa hitja popiwa okutyaa: ‘Kala au hole omukwen̯i, kala au yele ondjedhi yoye.’ 44Iya ame me mu heele okutya kalen̯i amu hole odhondjedhi dhen̯i, kumbilen̯i mbave mu tatetha, 45opo mu ninge odhondele dhaIho owomeulu. Iya etango lye u li tumbithila ovawa novavi, nombula u i lokethela ovavyuuki nambahave thi ovavyuuki. 46Iya andaa mu hole mboka mbave mu hole, mamu pewa ondjambi yatji? Novathendelethi wo otjo va ninga. 47Iya andaa mu popitha omapanga en̯i vala, mamu tya pamo mu ninga otjipuka otjinene? Ovapaani kave tji ningi wo? 48Iya hwilen̯i po ngaIho owomeulu hiaa hwila po.

Etestamende Epe Moludhimba

© 2012 Bible Society of Namibia

More Info | Version Index