Search form

Mateus 7

Okulikoya

(Luk. 6:37-38,41-42)

1“Hámu koyo, nan̯e opo hámu koywa, 2mena lyokutya ekoyo ndimamu koyo, nan̯e olyo mamu ka koywa, himamu yeleke natjo, nan̯e otjo mamu ka yelekwa natjo. 3Iya omena lyatji mo mono okatodhi hake li meho lyomukwen̯i, ove aho lwete omundangala mbuu li meho lyoye omwene? 4Ne omukwen̯i mo mu heele vi okutyaa: ‘Opomeya ndji ku toole okatodhi meho lyoye,’ iya nan̯i ove au na omundangala meho lyoye omwene. 5Mulinomi, litoola olutenga omundangala meho lyoye omwene, opo u tjiiwe nawa okumona okatodhi hake li meho lyomukwen̯i, u mu toole.

6“Otjidhilikwa hámu tji yandja kodhombwa, madhi piluluka hadhi mu lumata. Omakwalali en̯i ouwe wokalu hámu e yumbile ovingulu, mavi e lyata nomakoti avyo.

Okukumba

(Luk. 11:9-13)

7“Kumben̯i, mamu pewa; taendhen̯i, mamu mono; popithen̯i, mamu itavelwa. 8Iya omuntu auhe nguma kumbu, ma pewa; nguma taendha, ma mono; nanguma popitha, ma itavelwa. 9Ne mu na omuntu mun̯e, andaa omuna me mu kumbu omungome, u mu pa ewe? 10Ne andaa me mu kumbu ohi, u mu pa onyoka? 11Iya n̯e mbamu li ovavi, andaa mu tji i okuyandja ovipuka oviwa kovanwen̯i, unene tuu Iho owomeulu ma yandja ouwa kovantu mbamave mu kumbu.

12“Iya atjihe himamu hala ovantu ve mu ningile, nan̯e wo ngatjo mu ve ningila, mena lyokutya hehi otjo tji li oveta yaMoses nelongo lyovaprofeti.

Ondjila yet̯o noyomwenyo

(Luk. 13:24)

13“Enden̯i mo, mu pitile potjivelo hitja thin̯a, mena lyokutya otjivelo otjinene, nondjila ndjaa handjuka mai twala mekeko, mbamava ende mo ovengi. 14Iya otjivelo otjinunu nondjila ndjaa thin̯a mai twala momwenyo, ovanunu vala mbamave i mono.

Ovaprofeti wovithithi

(Luk. 6:43-44)

15“Lungamenen̯i ovaprofeti wovithithi, mboka mbave ya kun̯e movipa vyodhondhu, iya nan̯i mokati omaungu ngaa tunda. 16Iya mamu ve tangan̯ekele kovilinga vyawo. Odhombe dhi nyangwa komulodhi ne omakuyu a nyangwa komunkondo? 17Iya omuti omuwa auhe u ma ovinyango oviwa, iya omuti omuvi u ma ovinyango ovivi. 18Omuti omuwa kaau ulu okuma ovinyango ovivi, wo omuti omuvi kaau ulu okuma ovinyango oviwa. 19Omuti auhe mbuhamau ma ovinyango oviwa, mau tetwa po, hau yumbwa momulilo. 20Iya ovaprofeti mamu ve tangan̯ekele kovilinga vyawo.

Ehwithilopo lyehalo lyaKalunga

(Luk. 13:25-27)

21“Hamuntu auhe nguma ntyaa: ‘Muhona, Muhona,’ ma ulu okuya motjilongo tjeulu, iya onguma undapa ehalo lyaTate owomeulu. 22Metango ndyoka ovengi mava ka ntjeela amava tyaa: ‘Muhona, Muhona, hant̯e twa teethele mena lyoye, twa ta mo odhondemoni mena lyoye, hatu undapa ovilingankono ovingi mena lyoye?’ 23Iya ame me ke ve heela he tyaa: ‘Ame hí mu i nokanunu, dhen̯i po pwaame, mwa pengetha oveta yaKalunga!’

Ovatungi vavali

(Luk. 6:47-49)

24“Iya omuntu auhe nguma tee odhondaka dhandje hendhi, ye he dhi hwithile po, ma yelekwa nomulumentu omunadhondunge, ngwaa tungila ondjuwo ye yekuma koluwaa. 25Iya ombula ya loka, ethundja hali ya, nombepo hai pepe, hai litono mondjuwo ndjoka, iya ahamai kumauka po, mena lyokutya ya tungilwa koluwaa.

26“Iya omuntu auhe nguma tee odhondaka dhandje hendhi, ye ahame dhi hwithile po, ma yelekwa nomulumentu omuhima, ngwaa tungila ondjuwo ye yekuma moluheke. 27Iya ombula ya loka, ethundja hali ya, nombepo hai pepe, hai litono mondjuwo ndjoka, hai kumauka po, nekumaukopo lyatjo lya li enene.”

28Iya Jesus hiaa mana okupopya odhondaka hendhi, owingi wovantu we kuminwa elongo lye, 29mena lyokutya we ve longa nganguu na odhonkono, hatjo ngovalongiveta vawo.

Etestamende Epe Moludhimba

© 2012 Bible Society of Namibia

More Info | Version Index