Search form

Mateus 9

Jesus ma velula omulumentu wotjinteya

(Mark. 2:1-12; Luk. 5:17-26)

1Jesus wa londa mowato, ha yauka, he ya kondolopa yokoyawo. 2Iya taa tuutuu, ovantu ve mu etela omulumentu nguu na otjinteya, aa lalekwa po kotjintali. Jesus hiaa mono eitavelo lyawo, wa heela omuvedhi wotjinteya ha tyaa: “Likolethela, ndele yandje, odhonkali dhoye dha ithwa po.”

3Iya vamo owomovalongiveta ve lipopila hava tyaa: “Omuntu hengu ma penye Kalunga.”

4Jesus hiaa mono omalipulo awo, we ve heela ha tyaa: “Omena lyatji mamu lipula ovipuka hembi ovivi momitima vyen̯i? 5Hitja puvala otjin̯i, okutya: ‘Odhonkali dhoye dha ithwa po,’ ne okutya: ‘Kulama, enda’? 6Iya opo mu kale amu tji i okutya Omuna wOmuntu u na odhonkono kombanda yohi okwiitha po odhonkali,” Jesus wa heela omuvedhi wotjinteya ha tyaa: “Kulama, itha po otjintali tjoye, enda konganda.”

7Omuvedhi wotjinteya wa kulama, ha i konganda. 8Iya owingi wovantu hiwe tji mono, wa li awa tila, hava hivilike Kalunga, ngwaa yandja odhonkono ndhii lithike hempa kovantu.

Jesus ma ithana Mateus

(Mark. 2:13-17; Luk. 5:27-32)

9Jesus hiaa dhi hoka, wa mona omuntu nguu tiwa oMateus, aa kala pohi pombonge yokuthendelela elilimo. Jesus we mu heela ha tyaa: “Ndandula ndje.”

Mateus wa kulama, he mu landula.

10Jesus tainkolo a li monganda yaMateus ama li, ovathendelethi ovengi novalundhi ve ya, hava li pamo naye novalongwa ve.11Ovafarisai hive tji mono, va pula ovalongwa ve hava tyaa: “Omena lyatji omulongethi wen̯i hima li pamo novathendelethi novalundhi?”

12Iya Jesus hiee tji tee, we ve heela ha tyaa: “Mbave li nawa kava hepa otjimbanda, iya ovavedhi owo vala aveika mava hepa otjimbanda. 13Iya enden̯i mu ke lilonge otjipuka hehi okutya matji tya vi: ‘Onkenda me hala, hamayambo.’ Ame hí dhile okwiithana ovavyuuki, iya mbe ya okwiithana ovalundhi.”

Okulitjaela ovikulya

(Mark. 2:18-22; Luk. 5:33-39)

14Ovalongwa vaJohannes ve ya kuJesus hava tyaa: “Nt̯e nOvafarisai tu litjaela otwingi ovikulya, iya omena lyatji ovalongwa woye hihave litjaele ovikulya?”

15Jesus we ve yaka ha tyaa: “Ngundhe ovakongwa womukupi kaava ulu okweetetha onkenda, andaa nguma kupu ve li naye? Iya katango omukupi mave ke mu nyekwa, opo mave ke litjaela ovikulya.

16“Kape na tja omuntu nguma pampa omudhalo omukulu nelimendu epe ndihaliya kohwa, andaa me tji ningi, elimendu epe mali uthula omudhalo, nontovi mai ningi onene okupon̯a onkulu. 17Iya kape na tja omuntu nguma dhili ovinyu ovipe modhosaku dhotjipa odhonkulu. Iya andaa me tji ningi, ovinyu mavi uthula odhosaku. Ovinyu ovipe vi dhilwa modhosaku odhompe, avyeevali opo vi hupe.”

Jesus ma velula omukadhintu, ye ha imuna kout̯e ondele yomunene wosinagoga

(Mark. 5:21-43; Luk. 8:40-56)

18Jesus tainkolo a li ame ve heele ovipuka hembi, pe ya omunene wosinagoga, he liyongamene kuye, ha tyaa: “Omunwandje omukadhona wa t̯i, indjo u mu tendeke okuwoko a hupe.”

19Jesus wa kulama, he mu landula, novalongwa ve va ya wo pamo naye.

20Iya kwa li omukadhintu ngwaa velele olulala odhombula omulongo nambali, we ya kon̯ima yaJesus, ha t̯in̯i kotjilyo tjomudhalo we. 21Omukadhintu we lipopila ha tyaa: “Andaa mba t̯in̯i vala komudhalo we, me veluka.”

22Iya Jesus wa piluluka, he mu mono, ha tyaa: “Likolethela, mukadhona wandje, eitavelo lyoye lye ku velula.” Iya poluvedhe lwatjo vala mpoka omukadhintu wa veluka.

23Jesus hiee ya monganda yomunene wosinagoga, wa mona mo ovahiki wodhofilita dhomukoti notjuuyila tjowingi wovantu. 24We ve heela ha tyaa: “Dhen̯i mo amuhe, mena lyokutya okakadhona kaka t̯ile, ka lala.” Iya ovantu ve mu yola. 25Iya owingi wovantu hiwa lambwa mo, Jesus wa ya mo, he mu kambula mokuwoko, ha imuka po. 26Odhondaka ndhika dha ya motjit̯indwalongo atjihe.

Jesus ma velula ovapot̯i vavali

27Jesus hiaa dhi hoka, ovapot̯i vavali ve mu landula, hava wololoka, hava tyaa: “MunwaDavid, tu t̯ila onkenda!”

28Hiee ya monganda, have ya kuye. We ve pula ha tyaa: “Mwa itavele tuu okutya me ulu oku tji ninga?”

Ve mu yaka hava tyaa: “Iinga, Muhona.”

29Iya Jesus wa t̯in̯a omeho awo ha tyaa: “Ningilwen̯i ngahi mwa itavele.” 30Omeho awo a twikuluka. Jesus we ve londola nodhonkono ha tyaa: “Lungamen̯i, hápa kala noumo ngume tji iwa.”

31Iya hiva i, va ka hipulula Jesus motjit̯indwalongo hehinya atjihe.

Jesus ma thitulula omuhapopi

32Iya ovapot̯i hiva i, Jesus wa etelwa omulumentu nguha popi, ye ngwaa li nondemoni. 33Ondemoni hiya tewa mo, omuhapopi wa popya. Owingi wovantu we kumwa hau tyaa: “Otjipuka ngahehi katjiya moneka mo nokanunu moIsrael.”

34Iya Ovafarisai va popya hava tyaa: “Odhondemoni me dhi ta mo kodhonkono dhomunene wodhondemoni.”

Jesus ma teetha, ye ha velula

35Jesus wa endaenda modhondolopa adhihe nomoulongo auhe. Wa longa ovantu modhosinagoga dhawo, ha teetha ondaka ombwa yotjilongo tjaKalunga. Wa velula omutjithi auhe nouvela auhe. 36Iya hiaa mono owingi wovantu, we ve etethela mo onkenda, mena lyokutya va mona ovihuna, ve ulwa, va ngala odhondhu ndhihadhi na omut̯ita. 37Iya wa heela ovalongwa ve ha tyaa: “Ovilya ovingi, atjaa ovaundapi ovanunu. 38Iya kumben̯i, omwene wovilya a tume ovaundapi keteyo lyovilya vye.”

Etestamende Epe Moludhimba

© 2012 Bible Society of Namibia

More Info | Version Index