Search form

Lok fɔlɔ 16

1Dawuda tun ye fanibugu min lɔ kɛsu nin kosɔn, u nana don ka kɛsu nin bila o kɔnɔ. O kɔ, u ye saraka jɛnitaw ni jɛnɲɔgɔnya taw bɔ Ala ɲakɔrɔ. 2Dawuda ye saraka nunu bɔ ka ban tuma min na, a ye duba kɛ jama ye ni Masaba tɔgɔ ye. 3O kɔ, a ye burukun kelen kelen, ni tamaro ŋɔmi, ani *ɛrɛzɛn ŋɔmi kelen kelen di Isirayɛlidenw kelen kelen bɛɛ ma, muso fara cɛɛ kan.

Levi kɔmɔgɔw be Masaba tanu

(Dal 105.1-15; 96; 106.1,47-48)

4Dawuda ye Levi kɔmɔgɔ dɔw sigi Masaba ka layidu taamasiɲɛ kɛsu kɔrɔ k'olu ka to ka Masaba, Isirayɛli ka Ala bato, ani k'a tanu, k'a boɲa. 5Azafu le tun ye u kuntigi ye, Zakari ka sɔrɔ ka tugu. Ale kɔ, Aziyɛlil ni Semiramɔti, ani Yeyɛli ni Matitiya, ani Eliyabu ni Benayawu, ni Obɛdi Edɔmu, ani Yeyɛli. Kolonjow ni gɔniw tun b'u fɛ. Azafu tun be nigɛw gosira. 6Sarakalasebaga Benayawu ni Yaaziyɛli tun be to ka buruw fiyɛ tuma bɛɛ kɛsu nin kɔrɔ.

7O le kɛr'a siɲɛ fɔlɔ ye o loon na, Dawuda y'a latigɛ ko Azafu n'a balimaw ka to ka Masaba tanu.

8Aw ka Masaba tanu, k'a daali!

Aw k'a ka kɛwaliw fɔ siya wɛrɛw cɛma.

9Aw ka dɔnkili la a ye, k'a boɲa,

aw k'a ka kɛwaliɲumanw bɛɛ koo fɔ.

10Aw ka wasa a tɔgɔ senuman kosɔn.

Aw minw be Masaba ɲinina, aw ka nisɔndiya.

11Aw ka Masaba n'a ka fanga ɲini,

aw k'a ɲini tuma bɛɛ.

12Aw k'aw hakili jigi a ka kabakow la.

Aw k'aw hakili to a ka kobabaw n'a ka kitiw la.

13Aw minw ye a ka baarakɛla Isirayɛli kɔmɔgɔw ye,

a y'aw minw woloma, aw Yakuba deenw.

14Ale lo ye Masaba an ka Ala ye,

ale lo be dugukolo bɛɛ mara.

15Aw hakili ka to a ka layidu la tuma bɛɛ.

A ka kuma ye waati bɛɛ ta ye.

16- A y'o layidu nin ta Ibrayima ye,

ka n'a daa di Isiyaka ma.

17- A ka kolatigɛnin lo, a ye min kɛ Yakuba ye.

A ka layidu cɛnbali lo Isirayɛli fɛ,

18a y'a fɔ tuma min na ko:

«Ne be Kanaan jamana d'i ma,

o ye aw niyɔrɔ ye!»

19O tuma nin na, mɔgɔ tun be se k'aw daa jati.

Aw natuma na jamana kɔnɔ, aw tun ka dɔgɔ.

20Aw tun be yaalayaala siyaw cɛma,

ka bɔ masacɛ dɔ fɛ ka taga dɔ wɛrɛ fɛ.

21- Ala ma sɔn mɔgɔ k'aw tɔɔrɔ.

A ye masacɛw ɲaa gwan aw kosɔn.

22K'u kana maga a ka mɔgɔ wolomaninw na,

k'u kana kojugu kɛ a ka kiraw la.

23Diɲɛ mɔgɔw bɛɛ, aw ka dɔnkili la Masaba ye,

aw k'a fɔ loon o loon ko Kisibaga lo.

24Aw k'a boɲa siya wɛrɛw cɛma,

k'a ka kɛwaliɲumanw fɔ mɔgɔw bɛɛ ɲana.

25Bari Masaba ka bon, a ka kan ka tanu kosɔbɛ,

siranyafɛn lo ka tɛmɛ batofɛnw bɛɛ kan.

26Siya wɛrɛw ka batofɛn si te foyi ye,

Masaba le ye sankolo dan.

27Boɲa ni kuntigiya le b'a fɛ.

Sebagaya ni nisɔndiya le b'a sigiyɔrɔ la.

28Jamanaw bɛɛ siyaw, aw ka Masaba boɲa,

aw k'a ka boɲa n'a ka sebagaya fɔ.

29Aw ka Masaba tɔgɔ boɲa.

Aw ka na n'aw ka boɲafɛnw ye a ɲakɔrɔ.

Aw k'aw kunbiri gwan a ɲakɔrɔ

n'a b'a ka ɲumanya yira tuma min na.

30Diɲɛ mɔgɔw bɛɛ, aw ka yɛrɛyɛrɛ a ɲakɔrɔ.

Diɲɛ b'a lɔyɔrɔ la, a tena bɔ a nɔɔ na.

31Sankolo ni dugukolo ka nisɔndiya.

Aw k'a fɔ siya wɛrɛw ɲana ko Masaba le ye masa ye.

32Kɔgɔji n'a kɔnɔnafɛnw ka mankan kɛ!

Kongo n'a kɔnɔ fɛɛnw bɛɛ ka nisɔndiya!

33Tuuw kɔnɔ yiriw ka nisɔndiya

ka mankan kɛ Masaba ɲakɔrɔ!

Bari a be nana diɲɛ mara.

34- Aw ka Masaba tanu, bari a ka ɲi,

a ka ɲumanya te ban abada.

35Aw k'a fɔ ko: «An Kisibaga Ala, an kisi,

an bɔsi ka bɔ siya wɛrɛ nunu cɛma,

an lajɛn janko an ka se ka barika la i ye,

ani k'i tɔgɔ senuman tanu.»

36Masaba, Isirayɛli ka Ala ka tanu tuma bɛɛ!

Jama bɛɛ y'a jaabi ko: «Amiina. Aw ka Masaba tanu!»

37Dawuda ye Azafu n'a balimaw to Masaba ka layidu taamasiɲɛ kɛsu kɔrɔ ka baara kɛ yen tuma bɛɛ, ka kɛɲɛ n'a koo latigɛcogo ye loon o loon. 38A ye Obɛdi Edɔmu n'a balima mɔgɔ bi wɔɔrɔ ni seegi le kɛ daa kɔlɔsibagaw ye, ka Yeditun dencɛ Obɛdi Edɔmu ani Oza fara olu kan.

39Dawuda ko sarakalasebaga Sadɔki n'a balima sarakalasebagaw ka to Masaba ka fanibugu ɲafɛ, Gabaŋɔn batolikɛyɔrɔ la 40janko ka to ka saraka jɛnitaw lase Masaba ma tuma bɛɛ a bɔyɔrɔ la, sɔgɔma ni wulafɛ, ani min bɛɛ fɔra sariyasɛbɛ kɔnɔ, Masaba tun ye min di Isirayɛlidenw ma, u k'o bɛɛ bato. 41Ka fara olu kan, Eman ni Yedutun tun be yen, ani mɔgɔ tɔ minw tun wolomana ni u tun y'u tɔgɔ wele janko u ka Masaba tanu. Bari Masaba ka ɲumanya te ban abada. 42Eman ni Yedutun tun b'u gɛrɛfɛ ni buru fiyɛtaw ye ani nigɛ gositaw, ani fɔlikɛminan wɛrɛw, janko k'u fɔ ni dɔnkiliw ye Ala ma. Yedutun deenw le tun be daa kɔlɔsi.

43- O kɔ, jama bɛɛ segira ka taga u ka soow kɔnɔ. Dawuda kɔsegira ka na duba kɛ a ka somɔgɔw ye.

ALA KA KUMA

© 2008 Alliance Biblique du Burkina Faso

More Info | Version Index