Search form

Mas fɔlɔ 2

Dawuda ka ladili laban

1Dawuda satuma tun sera, o la, a ye ladili di a dencɛ Solomani ma ko: 2«Diɲɛmɔgɔw bɛɛ be taga yɔrɔ min na, ne fana be tagara o yɔrɔ la. I ka barika don i yɛrɛ la, k'i yɛrɛ kɛ cɛɛ ye. 3Banba ka tilen Masaba i ka Ala ye, ka mɛnni kɛ a fɛ, k'a ka sariyaw bato, ka taama ka kɛɲɛ n'a ka fɔta bɛɛ ye, k'a ka koo latigɛninw bato, ka sɔn a sago ma, ka kɛɲɛ ni Musa ka sariyasɛbɛ kɔnɔnakuma ye. O la, i bena see sɔrɔ i ka kokɛtaw bɛɛ la, an'i taayɔrɔw bɛɛ la. 4O la, Masaba ye kuma min fɔ ne ye, o bena kɛ. A ko: ‹N'i kɔmɔgɔw ye ne sago kɛ, ka taama tilenninya la ne ɲakɔrɔ, n'u dusu bɛɛ ye, i tena fɔn kɔmɔgɔ la Isirayɛli ka masasigilan kan.› »

5- «Ayiwa, Seruya dencɛ Zowabu ye fɛɛn min kɛ ne la, i b'o lɔn, tuma min na a ye kɛlɛkuntigi fila nunu faga, minw ye Nɛri dencɛ Abinɛri ni Yetɛri dencɛ Amaza ye, hɛrɛ tuma na, k'u joli bɔn k'o doni la a yɛrɛ kun. 6I bena o koo minɛ ni hakilitigiya ye. Kan'a to a be cɛkɔrɔbaya ka sa hɛrɛ la. 7- Banba ka Galaadika Barizilayi deenw minɛ ka ɲa, u ka to ka dumuni kɛ n'i ye. Bari, a tun ye ne dɛmɛ ten fana n bolituma na i kɔrɔcɛ Abisalɔn ɲa. 8- I hakili to Bɛnzamɛn kɔmɔgɔ Gera dencɛ Simeyi la fana ka bɔ Bawurimu. A tun ye ne danga kosɔbɛ ni dangajugu ye, ne taalon Maanayimu. O kɔ, a nana ne kunbɛn Zurudɛn baji daa la. Ne kalil'a ye ni Masaba tɔgɔ ye ko ne ten'a faga tugu. 9Nga sisan, kan'a to n'i m'o juru sara. Bari e ye hakilitigi ye. I bena min kɛ a la, e yɛrɛ b'o lɔn. E k'a cɛkɔrɔbalaman faga.»

Dawuda sara, Solomani be sigi a nɔɔ na

(Lok fɔlɔ 29.26-28)

10Dawuda sara, u y'a suu don a yɛrɛ ka ciin kɔnɔ. 11- Dawuda tun ye saan bi naani kɛ masaya la Isirayɛlidenw kunna. A ye saan wolonwula kɛ Eburɔn, ka saan bi saba ni saba kɛ Zeruzalɛmu.

12- O kɔ, Solomani sigir'a facɛ Dawuda ka masasigilan kan, a ka masaya sabatira kosɔbɛ.

Solomani be Adoniya faga

13O kɔ, Dawuda muso Agiti dencɛ Adoniya tagara Solomani bamuso Batiseba fɛ. Batiseba y'a ɲininga ko: «A ka di i nana wa?» A y'a jaabi ko ɔnhɔn. 14O kɔ, a ko: «N b'a fɛ ka kuma i fɛ.» Muso nin ko: «A fɔ kɛ!» 15A ko: «I y'a lɔn ko masaya nin tun ye ne ta ye. Isirayɛlidenw bɛɛ ɲaa tun be ne le kan, u tun b'a fɛ ka ne le kɛ masacɛ ye. Nga masaya nin yɛlɛmana ka kɛ n dɔgɔnin ta ye, bari Masaba le y'a d'a ma. 16Ne bena fɛɛn kelen ɲini i fɛ, kana ban o la.» Muso nin ko: «A fɔ.» 17- A ko: «N b'i daali ko i ka ta'a fɔ masacɛ Solomani ye, ko ne ko a ka Sunɛmuka Abisagi di ne ma n k'a furu. A tena ban k'o kɛ.» 18Batiseba k'o ɲɛna, ko ale ben'a ka kuma fɔ masacɛ ye.

19Batiseba wilila ka taga masacɛ Solomani fɛ, janko ka kuma a fɛ Adoniya ka koo la. Masacɛ wilila k'a kunbɛn, k'a kunbiri gwan a ɲakɔrɔ. O kɔ, masacɛ sigir'a ka sigilan kan. U nana masasigilan dɔ wɛrɛ bila masacɛ bamuso ye, a sigira masacɛ kinibolo la. 20O kɔ, a y'a fɔ masacɛ ye ko ale bena kofitini kelen ɲini a fɛ, ko a kana ban o la. Masacɛ ko: «A daali, n baa, ne tena ban.» 21A ko: «Sunɛmuka Abisagi d'i kɔrɔcɛ Adoniya ma a k'a furu.» 22Masacɛ Solomani y'a fɔ a bamuso ye ko: «Mun na i be Sunɛmuka Abisagi daali Adoniya ye? I te masaya daali a ye kelen? Bari ale ye ne kɔrɔcɛ ye. I ka masaya daali k'a d'a ma, ale ni sarakalasebaga Abiyatari ni Seruya dencɛ Zowabu!»

23Masacɛ Solomani kalila ni Masaba tɔgɔ ye ko: «Ala kana ne to, ni ne ma Adoniya faga kuma nin kama!» 24A ko: «Sisan kɔni, Masaba min ye barika don ne la ani k'a kɛ n sigira n faa Dawuda ka masasigilan kan, ale min ye masaya di ne ni n kɔmɔgɔw ma ka kɛɲɛ n'a ka layidu ye, ale kosɔn, bii yɛrɛ Adoniya be faga!» 25O kɔ, masacɛ Solomani ye Yoyada dencɛ Benayawu ci, ale tagar'a faga.

Solomani be Abiyatari gwɛn

26- Masacɛ y'a fɔ sarakalasebaga Abiyatari ye ko: «Bɔ ka taga Anatɔti, i ka yɔrɔ la, bari, i ka kan ka faga yɛrɛ le. Nga, i ye Matigi, Masaba ka layidu taamasiɲɛ kɛsu ta ne facɛ Dawuda ka waati la minkɛ, an'i sigɛnna fana ni ne facɛ ye, o kama n b'i to.» 27- A kɛra ten, Solomani ye Abiyatari gwɛn ka bɔ a ka sarakalasebaara la a tun be min kɛra Masaba tɔgɔ la, janko Masaba tun ye kuma min fɔ Eli ka soo kama Silo, o ka dafa.

Solomani be Zowabu faga

28O kibaru tagara se Zowabu ma, ale min tun farala Adoniya kan, a tun ma sɔn ka fara Abisalɔn kan. A wilila ka taga Masaba ka fanibugu faan fɛ ka sarakabɔyɔrɔ nɔnkɔnw minɛ ka lɔ. 29U nan'a fɔ Solomani ye ko Zowabu bolila ka taga Masaba ka fanibugu faan fɛ, ko a be sarakabɔyɔrɔ gɛrɛfɛ. Solomani ye Yoyada dencɛ Benayawu ci ko a ka ta'a faga. 30Benayawu tagara se Masaba ka fanibugu daa la, k'a fɔ Zowabu ye ko a ka bɔ yan, ko masacɛ le ko ten. Zowabu y'a jaabi ko: «Ayi, ne b'a fɛ ka sa yan le.» O la, Benayawu kɔsegira ka taga o jaabi fɔ masacɛ ye. 31Masacɛ y'a fɔ Benayawu ye ko: «Zowabu ye min fɔ, taga o kɛ. A faga k'a suu don, o la, a bena kɛ sababu ye Zowabu ye mɔgɔ minw faga gwansan, olu kunko be bɔ ne masacɛ kunna, ani n facɛ ka soo kunna. 32Masaba ben'a ka kunko to a yɛrɛ kun ten. Bari a ye mɔgɔ fila faga ni murujan ye, minw tun tilennin lo ka tɛmɛ a yɛrɛ kan, n'u tun ka fisa n'a yɛrɛ ye, ne facɛ Dawuda tun t'o kala ma. O mɔgɔ nunu ye Nɛri dencɛ Abinɛri ye, Isirayɛli mara kɛlɛkuntigi, ani Yetɛri dencɛ Amasa, Zuda mara ta. 33O mɔgɔ nunu fagako kunko ka to Zowabu n'a kɔmɔgɔw kan tuma bɛɛ, nga Masaba ka hɛrɛ kɛ Dawuda n'a kɔmɔgɔw ye, ani a ka soo, n'a ka masasigilan ye tuma bɛɛ.»

34Yoyada dencɛ Benayawu tagara Zowabu faga, u y'a suu don a ka soo, kongokolon kɔnɔ. 35Masacɛ ye Yoyada dencɛ Benayawu sigi kɛlɛdenw kunna Zowabu nɔɔ na, ka sarakalasebaga Sadɔki bila Abiyatari nɔɔ na.

Solomani be Simeyi faga

36Masacɛ Solomani ye Simeyi wele k'a fɔ a ye ko: «Soo dɔ lɔ i yɛrɛ ye Zeruzalɛmu. I bena to o yɔrɔ la, i tena bɔ ka taga yɔrɔ si. 37I ka l'a la, ko n'i bɔra loon min na ka Sedirɔn kɔɔ tigɛ, i be faga o loon, i hakɛ be ben i yɛrɛ kan.» 38Simeyi y'a fɔ masacɛ ye ko: «O ka ɲi, masacɛ, ne matigi. I ye min fɔ, i ka baaraden bena o kɛ.» Simeyi tora Zeruzalɛmu dugu kɔnɔ fɔɔ ka mɛn.

39Nga saan saba tɛmɛnin kɔ, Simeyi ka jɔɔn fila bolila ka taga Gati masacɛ Akisi fɛ, n'ale ye Maaka deen ye. U nana o fɔ a ye ko a ka jɔɔnw be Gati. 40Simeyi wilila k'a ka fali labɛn ka taga u kɔ Akisi fɛ Gati, waasa ka kɔsegi n'u ye. A tagara ka kɔsegi n'u ye.

41U y'a fɔ Solomani ye ko Simeyi tun bɔra Zeruzalɛmu ka taga Gati, ko a kɔsegira ka ban. 42Masacɛ ye Simeyi wele k'a fɔ a ye ko: «Ne tun m'a kɛ i kalila Masaba tɔgɔ la wa? Ne tun m'a fɔ k'a gwɛlɛya i ye ko i ka l'a la ko n'i y'i seen ta ka bɔ yan ka taga yan, walima yanfɛ, ko i be faga o loon na wa? I y'a fɔ k'o ɲɛna, ko i y'a mɛn. 43E kalila ni Masaba tɔgɔ ye koo min na, mun na i m'o bato, ani ne ye fɛɛn min ɲini i fɛ, i m'o kɛ?» 44O kɔ, a y'a fɔ Simeyi ye tugu ko: «I ye kojugu min bɛɛ kɛ ne faa Dawuda la, i hakili b'o la kɛ! Masaba b'i ka juguya juru sara i yɛrɛ la. 45Nga ne masacɛ Solomani ta bena ɲa, ani Masaba bena Dawuda ka masasigilan sabati tuma bɛɛ.»

46Masacɛ y'a fɔ Yoyada dencɛ Benayawu ye ko a ka Simeyi faga. Ale bɔra ka ta'a faga.

A kɛra ten, masaya nin sera ka sabati Solomani bolo.

ALA KA KUMA

© 2008 Alliance Biblique du Burkina Faso

More Info | Version Index