Search form

MAKABEW FƆLƆ 14

Demetiriyusi filanan ka saya

1Girɛkiw ka masaya saan 172nan na, masacɛ Demetiriyusi filanan y'a ka kɛlɛdenw lajɛn ka Mɛdi jamana sira minɛ ko a be taga dɛmɛ ɲini waasa ka se ka Tirifɔn kɛlɛ. 2Pɛrɛsi ni Mɛdi masacɛ Arisasi y'a mɛn ko Demetiriyusi donn'a ka mara kɔnɔ tuma min na, a y'a ka kɛlɛkuntigiw dɔ ci ko ale ka ta'a minɛ. 3Ale tagara, a sera Demetiriyusi ka kɛlɛdenw kɔrɔ, ka Demetiriyusi minɛ ka na n'a ye Arisasi fɛ. Arisasi y'a bila kaso la.

Simɔn tanuli

4Jamana tun be hɛrɛ la Simɔn sii bɛɛ la.

A tun b'a ka siya ka hɛrɛ le fɛ.

A ka mɔgɔw sɔnn'a ka fanga ma.

A ye boɲa sɔrɔ u fɛ a sii bɛɛ la.

5A ye tɔgɔba sɔrɔ Zope minɛko la.

A ye Zope kɛ a ka kurunlɔyɔrɔ ye.

Dugukolodennin minw be kɔgɔji cɛma,

a ye olu sira dayɛlɛ a ka mɔgɔw ye.

6A y'a ka siya ka mara boɲa,

a y'a ka fanga sabati jamana kɔnɔ.

7A ye mɔgɔ caaman minɛ kɛlɛ la ka segi n'u ye.

A sera Gazara ni Bɛtisuri, ani Zeruzalɛmu dugu yɔrɔ barikaman kɔrɔ.

Fɛɛn min tun be dugu yɔrɔ barikaman nɔgɔ Ala ɲana,

a y'o bɛɛ bɔ a kɔnɔ.

8Mɔgɔw tun b'u ka dugukolo sɛnɛ hɛrɛ la,

suman tun be sɔrɔ forow kɔnɔ,

yiriw tun be den kɛnɛyɔrɔw la.

9Mɔgɔkɔrɔbaw tun be sigi forobayɔrɔw la,

u bɛɛ tun be hɛrɛ koo fɔ.

Kɛlɛkɛfani ni kɛlɛkɛminan ɲanamanw tun be kanbelenw kaan na.

10A ye dumuni di duguw ma,

a ye kɛlɛkɛminanw d'u ma,

u be se k'u yɛrɛ tanga ni minw ye.

A tɔgɔɲuman bɔra fɔɔ dugukolo daan na.

11A ye kɛlɛ ban ka bɔ jamana kɔnɔ,

Isirayɛlidenw nisɔndiyanin tun lo kosɔbɛ.

12Mɔgɔ kelen kelen bɛɛ tun siginin be a ka *ɛrɛzɛnsun n'a ka torosun kɔrɔ,

mɔgɔ si tun te yen k'u jaa tigɛ.

13U kɛlɛbagaw bɛɛ tun bɔra jamana kɔnɔ,

u tun sera siya wɛrɛw ka masacɛw kɔrɔ.

14A y'a ka siya fantanw bɛɛ dɛmɛ.

A ye Musa ka sariya bato,

ka Alaɲasiranbaliw ni mɔgɔjuguw bɛɛ tunu ka bɔ yen.

15A ye boɲa la Alabatosoba kan.

A ye minan caaman di ka fara Alabatosoba nafolo kan.

Siparitakaw ka bataki

16Ɔrɔmukaw ni Siparitakaw y'a mɛn ko Zonatan sara, u dusu kasira kosɔbɛ. 17Nga u nan'a mɛn fana ko a baden Simɔn kɛra sarakalasebagaw kuntigi ye a nɔɔ na, n'a be Zude mara n'a duguw kunna. 18O la, bɛɛn ni teriya min tun be olu n'a baden Zuda ni Zonatan cɛ, u y'o lakurayako sɛbɛn walaka ziralaman kan k'o ci Simɔn ma. 19U ye walaka nunu kalan jama ɲana Zeruzalɛmu. 20Siparitakaw ye bataki min ci, o filɛ nin ye:

«Siparitakaw n'u ka dugu ɲamɔgɔw be sarakalasebagaw kuntigi Simɔn fo ka zuwifuw ka cɛkɔrɔbaw ni sarakalasebagaw, ani zuwifuw tɔw bɛɛ fo. 21Aw ye mɔgɔ minw ci ka na anw fɛ, aw ye tɔgɔba min sɔrɔ, n'aw jatinin be cogo min na, olu y'o fɔ an ye. U na diyara an ye. 22An y'u ka kuma sɛbɛn jama ka kolatigɛninw sɛbɛ kɔnɔ ko: Zuwifuw ye cidenw bila ka na an fɛ, Antiyokusi dencɛ Numeniyusi ni Zasɔn dencɛ Antipatɛri fɛ, ko u b'u ka teriya lakuraya n'an ye. 23A diyara jama ye k'u minɛ ka ɲa, k'u ka kuma sɛbɛn k'o mara jama ka sɛbɛmarayɔrɔ la, janko Siparitakaw hakili ka to a la. U y'o sɛbɛ ɲɔgɔn kelen sɛbɛn k'a ci sarakalasebagaw kuntigi Simɔn ma fana.»

24Waati dɔ tɛmɛnin kɔ, Simɔn ye Numeniyusi ci Ɔrɔmu ni nigɛkunbɛnnan sanulaman belebele ye, janko k'a yira k'ale sɔnna bɛɛn nin na ni Ɔrɔmukaw ye. A gwiliya tun ye kilo kɛmɛ duuru ye.

Simɔn be kɛ sarakalasebagaw kuntigi ye

25Zuwifuw ye koo nunu mɛn tuma min na, u ko: «An bena mun le kɛ Simɔn n'a deenw ye k'u fo? 26Bari ale n'a badenw, an'a facɛ ka somɔgɔw bɛɛ tora kelen kan. U ye Isirayɛli juguw kɛlɛ k'u gwɛn, k'an ka siya hɔrɔnya.»

O la, u ye sɛbɛnni kɛ walaka ziralamanw kan, k'u nɔrɔ kabakuruw la k'u tutu Siyɔn kulu kan. 27U ye min sɛbɛn, o filɛ nin ye ko:

«Girɛkiw ka masaya saan 172nan na, *Eluli kalo tile tan ni seeginan loon, min ye sarakalasebagaw kuntigi Simɔn ka saan sabanan ye fanga la, ale min kɛra mɔgɔbaba ye Azaramɛli, 28sarakalasebagaw ni jama, ni zuwifuw kuntigiw, ani cɛkɔrɔbaw ye ɲɔgɔnyeba kɛ. K'an to o yɔrɔ la, u y'an hakili jigi koo dɔw la. U ko: 29Kɛlɛ caaman kɛra an ka mara kɔnɔ. Ni kɛlɛ wilila tuma o tuma, Matatiyasi deen Simɔn, Yoyaribu kɔmɔgɔw dɔ, ale n'a badenw sɔnna faratiko ma, ka wili u ka siya juguw kama. U tun b'a fɛ Alabatosoba, ani Musa ka sariya ka to seen kan. U ye boɲaba lase an ka siya ma. 30Zonatan y'an ka siya ka jɛnɲɔgɔnya sabati, a kɛra u ka sarakalasebagaw kuntigi ye, sanni a ka sa. 31Zuwifuw juguw tun b'a fɛ ka don Zude mara la ka cɛnni kɛ, ani ka Alabatosoba halaki. 32O la, Simɔn wilila ka kɛlɛ kɛ a ka siya ye. A y'a yɛrɛ bololafɛn caaman don kɛlɛkɛminanw na k'o di jamana kɛlɛdenw ma, ani ka kɛlɛdenw sara. 33A ye barika don Zude mara duguw la, ani Bɛtisuri, min be jamana daan na, zuwifuw juguw tun b'u ka kɛlɛkɛminanw mara yɔrɔ min na ka kɔrɔ. A ye zuwifuw ka kɛlɛden dɔw to o yɔrɔ la. 34A ye barika don Zope la, min be kɔgɔjida la, ni Gazara, min be Azɔti mara kɔnɔ, u juguw tun siginin be o yɔrɔ min na ka kɔrɔ. A ye zuwifu dɔw sigi o dugu nunu kɔnɔ. U mako tun be fɛɛn o fɛɛn na, k'o bɛɛ mara u kɔnɔ. 35Jama ye Simɔn ka mɔgɔtilenninya ye, o ni a b'a fɛ ka boɲa min lase a ka siya ma. A tun ye min bɛɛ kɛ, o kosɔn, u y'a kɛ u ɲamɔgɔ, ni u ka sarakalasebagaw kuntigi ye, ani a ka tilenninya ni mɔgɔsɔbɛya kosɔn, a ye min yira a ka siya faan fɛ, bari a ka siya ka kunkɔrɔta tun y'a haminako ye tuma bɛɛ. 36A ka tile la, a sera ka siya tɔw gwɛn ka bɔ Zude mara kɔnɔ, ni minw tun be Dawuda ka ciin kɔnɔ Zeruzalɛmu, minw tun ye dugu yɔrɔ barikaman nin lɔ u yɛrɛ ye. U tun be to ka bɔ yen ka taga Alabatosoba lamini nɔgɔ, k'a ka senumanya cɛn sɔbɛ la. 37Simɔn ye zuwifu kɛlɛden dɔw to o yɔrɔ la, ka barika don a la jamana ni dugu ka hɛrɛ kosɔn. A ye dɔ fara Zeruzalɛmu laminikogo jaɲa kan fana.

38O kɔ, masacɛ Demetiriyusi filanan y'a yira ko a sɔnna Simɔn ka kuntigiya ma sarakalasebagaw kunna. 39A y'a kɛ masacɛ ka mɔgɔsɔbɛw dɔ ye, k'a boɲa kosɔbɛ. 40A tun y'a mɛn ko Ɔrɔmukaw be zuwifuw minɛ i n'a fɔ u teriw, n'u jɛnɲɔgɔnw n'u balimaw. K'u tun ye Simɔn ka cidenw minɛ ka ɲa fana. 41Ko sarakalasebagaw ni zuwifu tɔw tun sɔnna Simɔn n'a ka soo ka kɛ u ɲamɔgɔ ni sarakalasebagaw kuntigi ye kudayi fɔɔ kirasɔbɛ ka sɔrɔ. 42U ye Simɔn kɛ u ka kɛlɛkuntigi ye, ni Alabatosoba ɲamɔgɔ ye. Ale tun ka kan ka Alabatosoba baarakuntigiw woloma, ani jamana ɲamɔgɔw, ni kɛlɛkɛminanw ɲamɔgɔw, ni dugu barikamanw taw. 43O la, Simɔn kɛra Alabatosoba ɲamɔgɔ ye. Bɛɛ tun ka kan ka mɛnni kɛ a fɛ, jamana ka sɛbɛw bɛɛ tun ka kan ka labɛn a tɔgɔ la. A tun be se ka faniwulen don, ka masirifɛn sanulamanw nɔrɔ a ka fani kan. 44Jama cɛma, ni sarakalasebagaw cɛma, mɔgɔ si tun te se ka koo nunu si ban, walima k'a ka fɔta sɔsɔ, walima ka ɲɔgɔnye kɛ jamana kɔnɔ n'a ma o sira di. U tun man kan ka faniwulen don, walima ka masirifɛn sanulaman don u kaan na. 45Ni mɔgɔ o mɔgɔ ma koo nunu bato, u ka kan k'o tigi ɲaa gwan. 46Jama bɛɛ sɔnna k'o see di Simɔn ma. 47Simɔn sɔnna ka kɛ sarakalasebagaw kuntigi ye, ni kɛlɛkuntigi, ni sarakalasebagaw ni zuwifu tɔw ɲamɔgɔ ye, ka bila jama bɛɛ kunna.

48Zuwifuw y'a latigɛ ka kuma nin sɛbɛn walaka ziralamanw kan, k'u bila Alabatosoba luu kɔnɔ, u be se ka ye yɔrɔ min na. 49Ko u bena kuma nin sɛbɛn tugu siɲɛ damani k'o sɛbɛnni mara Alabatosoba nafolo marayɔrɔ la Simɔn n'a deenw bolo kɔrɔ.»

ALA KA KUMA

© 2008 Alliance Biblique du Burkina Faso

More Info | Version Index