Search form

MAKABEW FƆLƆ 5

Zuda be taga amoniw kama

(Mak 2nan 10.14-33)

1Zuwifuw lamini siyaw y'a mɛn tuma min na ko sarakabɔyɔrɔ lɔra kura ye, ani ko Alabatosoba lalagara i n'a fɔ a tun be cogo min na fɔlɔ la, 2u dimina kosɔbɛ. Isirayɛliden minw tun b'u cɛma, u y'a latigɛ k'u bena u faga. U y'a daminɛ ka olu faga, k'u halaki. 3Zuda ye kɛlɛ kɛ ni edɔmuw ye Akarabatɛni, Idume mara la, bari u tun ye Isirayɛlidenw datugu. A ye cɛnniba kɛ u cɛma, a y'u gwɛn, k'u bololafɛnw minɛ.

4O kɔ, a hakili jigira Bayan kɔmɔgɔw ka juguya la. U tun be to ka dogo siraw kan, ka siraw datugu janko ka Isirayɛlidenw minɛ. 5Zuda y'u datugu k'u to u ka sangasow kɔnɔ. A ye yɔrɔ datugu ka kali k'u bena u faga. A y'u ka sangasow jɛni n'a kɔnɔ mɔgɔw bɛɛ. 6O kɔ, a tɛmɛna ka taga amoniw ka mara la. A ye kɛlɛden barikaman caaman kunbɛn o yɔrɔ la. Timote le tun b'u kunna. 7A ye kɛlɛ kɛ n'u ye siɲɛ caaman. A sera u kɔrɔ k'u halaki. 8A ye Yazɛri dugu n'a maraw minɛ ka sɔrɔ ka kɔsegi Zude mara la.

Zuwifuw ka tɔɔrɔ

9Isirayɛliden minw siginin tun be Galaadi mara la, o mara siyaw farala ɲɔgɔn kan ka wili u kama janko k'u faga. Nga Isirayɛlidenw tagara dogo Datema dugu barikaman kɔnɔ. 10U ye batakiw ci Zuda n'a badenw ma ko: «Siya wɛrɛw jɛnna an kama janko k'an faga. 11An dogonin be dugu barikaman min kɔnɔ, u ka kɛlɛdenw b'u yɛrɛ labɛnna ka na o minɛ. Timote le b'u kunna. 12Na sisan k'an bɔsi u bolo, u y'an ka mɔgɔ caaman faga ka ban. 13An balima minw siginin tun be Tobi mara la, o bɛɛ fagara, u y'u ka musow n'u ka denmisɛnw minɛ ka taga n'u ye jɔnya la, k'u bololafɛnw bɔsi. Mɔgɔ waa kelen ɲɔgɔn fagara o yɔrɔ la.»

14K'u to bataki nin kalan na, ciden wɛrɛw nana ka bɔ Galile mara la n'o kibaruya kelen nin ɲɔgɔn ye, u ka faniw faranfarannin. 15Olu ko: «Siya wɛrɛ minw be Potolemayisi ni Tiri ani Sidɔn, ni lonanmara Galilei faan bɛɛ, olu bɛɛ farala ɲɔgɔn kan ka wili an kama janko k'an faga.» 16Zuda ni jama ye kibaruya nin mɛn tuma min na, u ye jama wele ɲɔgɔnyeba la. U ka kan ka koo min kɛ k'u balimaw dɛmɛ, u juguw be minw tɔɔrɔla ka to k'u kɛlɛ, u kumana ɲɔgɔn fɛ. 17Zuda y'a fɔ a baden Simɔn ye ko a ka mɔgɔ dɔw woloma ka taga u balimaw kisi Galile mara la. Ko ale n'u baden Zonatan bena taga Galaadi mara la. 18A ye Zakari deen Yusufu ni Azariya to Zude mara la, u ka kɛ jama ɲamɔgɔw ye. Olu ni kɛlɛden tɔw tun ka kan ka yɔrɔ kɔlɔsi. 19A y'a fɔ u ye k'u ka jama mara, k'u kana kɛlɛ kɛ ni siya wɛrɛw ye fɔɔ olu ka kɔsegi. 20Mɔgɔ waa saba (3 000) farala Simɔn kan ka taga n'a ye Galile. Mɔgɔ waa seegi (8 000) farala Zuda kan ka taga n'a ye Galaadi mara la.

Simɔn ni Zuda be se u juguw kɔrɔ

(Mak 2nan 12.10-31)

21Simɔn tagara Galile mara la ka kɛlɛ caaman kɛ ni siya wɛrɛw ye. A sera u kɔrɔ, k'u gwɛn. 22A tugura u kɔ fɔɔ ka se Potolemayisi dugu donda la. Isirayɛlidenw ye mɔgɔ waa saba ɲɔgɔn faga siya wɛrɛw cɛma k'u bololafɛnw cɛ. 23O kɔ, Simɔn ye Galile ni Aribata mara zuwifuw lajɛn, olu n'u musow, n'u ka denmisɛnw, ani u bololafɛnw bɛɛ, ka na n'u ye Zude mara la ni nisɔndiya ye.

24Zuda Makabe n'a baden Zonatan ye Zurudɛn baji tigɛ ka tile saba taama kɛ kongokolon kɔnɔ. 25U ye nabatiwj kunbɛn, olu y'u minɛ ka ɲa. Koo min kɛra u balimaw la Galaadi mara la, u y'o fɔ u ye. 26Ko u juguw y'u caaman datugu duguba barikamanw kɔnɔ: Bozora, ni Alema, ani Kasafo, ni Makɛdi ani Karinayin. 27Ko dɔw fana datugunin lo Galaadi mara dugu wɛrɛw la, ko u juguw tun y'a latigɛ ka dugu barikaman nunu kɛlɛ sini, k'u minɛ ani k'u kɔnɔ mɔgɔw bɛɛ faga loon kelen na. 28Zuda y'o mɛn dɔrɔn, a n'a ka kɛlɛdenw y'u ɲaa yɛlɛma ka kongokolon sira minɛ ka taga Bozora. U ye dugu nin minɛ, k'a kɔnɔ cɛɛw bɛɛ faga, k'a nafolo cɛ, ka dugu jɛni.

29U bɔra o yɔrɔ la sufɛ ka taama fɔɔ ka taga se Datema dugu barikaman na. 30Dugu gwɛra tuma min na, k'u to yɔrɔjan, u ye kɛlɛden caaman ye, u daa yɛrɛ te lɔn, n'u be yɛlɛyɛlɛnanw lɔra, ka to ka gwɛrɛ ni kɛlɛkɛwotorow ye janko ka dugu minɛ. U tun ye kɛlɛ daminɛ ka ban. 31Zuda y'a ye ko kɛlɛ daminɛna ka ban, mankan be bɔra dugu kɔnɔ, ani buruw fiyɛkan ni kulekanw, fɔɔ ka se sankolo la. 32A y'a fɔ a ka kɛlɛdenw ye ko: «Aw ka kɛlɛ kɛ an balimaw ye bii.» 33A y'u tilan saba. A y'a fɔ k'u ka gwɛrɛ u juguw kɔfɛ. U ye buru fiyɛ k'u kaan kɔrɔta kosɔbɛ ka Ala dali. 34Timote ka kɛlɛdenw y'a ye ko Zuda Makabe le be gwɛrɛla dɔrɔn, u ye boli ta. Zuda sera u kɔrɔ kosɔbɛ, u ka mɔgɔ waa seegi (8 000) ɲɔgɔn fagara kɛlɛ la o loon na. 35O kɔ, a y'a ɲaa sin Alema faan fɛ. A tagara o dugu nin kɛlɛ k'a minɛ k'a kɔnɔ cɛɛw bɛɛ faga, ka nafolo cɛ, ka dugu jɛni. 36A bɔra o yɔrɔ la ka taga Kasafo ni Makɛdi ani Bozora minɛ, ni Galaadi mara dugu tɔw.

37O koo nunu tɛmɛnin kɔ, Timote ye kɛlɛbolo wɛrɛ lajɛn ka taga sigi Arafɔn gɛrɛfɛ, kɔɔ faan dɔ nin na. 38Zuda ye mɔgɔw ci ka taga u ka sigiyɔrɔ kɔlɔsi dogo la. Olu segira ka n'a fɔ a ye ko: «Siya minw b'an lamini na, u bɛɛ lajɛnnin be Timote kɔrɔ, kɛlɛden nunu ka ca kosɔbɛ. 39U ye kɛlɛden dɔw ta arabuw cɛma, janko k'u dɛmɛ. U siginin tun be kɔɔ kɔfɛ, u labɛnnin lo ka na i kɛlɛ.» Zuda tagara u kunbɛn. 40A n'a ka kɛlɛdenw gwɛrɛla kɔɔ la. O la, Timote y'a fɔ a ka kɛlɛkuntigiw ye ko: «Ni Zuda le kɔnna ka kɔɔ tigɛ, an tena se ka lɔ a ɲa, siga t'a la, a bena se an kɔrɔ. 41Nga n'a siranna, ka lɔ kɔɔ kɔfɛ, an bena kɔɔ tigɛ k'a kɛlɛ, an bena se a kɔrɔ.» 42Zuda sera jida la tuma min na, a ye kɛlɛkuntigiw to kɔda la k'a fɔ u ye ko u kan'a to mɔgɔ si ka to o yɔrɔ la, ko bɛɛ ka taga kɛlɛ la. 43Zuda le kɔnna ka kɔɔ tigɛ ka taga u juguw faan fɛ, a ka kɛlɛdenw bɛɛ sɔrɔla ka tugu a kɔ. A ye siya wɛrɛw kɛlɛ k'u ɲɔti ka taga kɔfɛ. U y'u ka kɛlɛkɛminanw fili, ka sɔrɔ ka boli ka taga Karinayin jobon kɔnɔ. 44Zuda ka mɔgɔw ye dugu minɛ, ka sɔrɔ ka jobon nin jɛni, ni mɔgɔ minw tun b'a kɔnɔ. U sera Karinayin kɔrɔ. Kabini o waati la, mɔgɔ si ma se ka lɔ Zuda ɲa tugu.

45O kɔ, Isirayɛliden minw bɛɛ tun be Galaadi mara la, Zuda ye olu lajɛn, a faama fara fantanw kan, musow, ni denmisɛnw, ani u ka bololafɛnw, janko ka taga n'u ye Zuda mara la. Jamaba tun lo. 46U tagara se Efurɔn, min tun be u ka sira kan. Duguba tun lo, barika tun b'a la. U tun te se ka munumunu ka tɛmɛ dugu kinibolo ɲafan fɛ, walima numanbolo fɛ, fɔɔ u k'a cɛtigɛ. 47Nga dugu mɔgɔw ma sɔn u ka don dugu kɔnɔ, u y'a dondaw tugu ni kabakuruw ye. 48Zuda ye kumaɲuman fɔ u ye ko: «An ka kan k'aw ka mara cɛtigɛ ka se ka taga an ka jamana na. Mɔgɔ si tena kojugu kɛ aw la, an bena tɛmɛ sira fɛ dɔrɔn.» Nga dugu mɔgɔw ma sɔn ka daa yɛlɛ a ye. 49O la, a ko u k'a fɔ kɛlɛdenw cɛma ko u kelen kelen bɛɛ ka to a ka yɔrɔ la. 50Kɛlɛdenw y'u yɛrɛ labɛn kɛlɛ kama. U ye suu ko ka dugu gwɛ dugu mɔgɔw kɛlɛ la. A laban, u sɔrɔla k'o dugu minɛ. 51U ye cɛɛw bɛɛ faga, ka dugu nafolo cɛ, ka dugu halaki pepewu, ka taama suuw kan ka dugu cɛtigɛ. 52U ye Zurudɛn baji tigɛ ka se kɛnɛbayɔrɔ la Bɛtiseyan gɛrɛfɛ. 53Mɔgɔ minw tora kɔfɛ, Zuda tun be to k'olu lajɛn, ani ka to ka jama jaa gwɛlɛya sira kan fɔɔ ka taga se Zuda mara la. 54U nisɔndiyaninba yɛlɛla Siyɔn kulu kan. U ye saraka jɛnitaw bɔ, bari u ɲuman segira, u ka mɔgɔ si ma faga.

Juguw be se Yusufu ni Azariya kɔrɔ

(Mak 2nan 12.32-45)

55Ka Zuda ni Zonatan to Galaadi mara la, n'a baden Simɔn be Potolemayisi gɛrɛfɛ Galile mara la, 56Zakari deen Yusufu ni Azariya, minw ye kɛlɛkuntigiw ye, olu y'a mɛn k'u ye cɛfariyakow kɛ kɛlɛ la. 57U y'a fɔ ɲɔgɔn ye ko: «An fana ka tɔgɔ ɲini an yɛrɛ ye. An ka taga an lamini siyaw kɛlɛ.» 58U tun be kɛlɛden minw kunna, u kumana olu fɛ ka sɔrɔ ka taga Zamuniya. 59Gɔriziyasi n'a ka mɔgɔw bɔra dugu kɔnɔ k'u be kɛlɛ daminɛ. 60U sera Yusufu ni Azariya kɔrɔ, ka tugu u kɔ fɔɔ Zude mara daan na. Isirayɛlidenw mɔgɔ waa fila (2 000) ɲɔgɔn fagara o loon na. 61O kɛra jama ka dɛsɛkojugu ye, bari Yusufu ni Azariya tun ma mɛnni kɛ Zuda n'a badenw fɛ. U tun be miiri k'olu fana bena se ka cɛfariya kɛ. 62Nga Ala tun ye see di mɔgɔ minw ma Isirayɛlidenw kisi la, olu tun te o dɔw ye.

Zuda be se a juguw kɔrɔ

63Cɛfari Zuda n'a badenw ye tɔgɔba sɔrɔ Isirayɛlidenw bɛɛ fɛ, ni siyaw bɛɛ fɛ u tɔgɔ fɔra minw cɛma. 64Mɔgɔw tun be boli u nɔfɛ janko k'u fo. 65Zuda n'a badenw tagara worodugu ɲafan fɛ, ka edɔmuw kɛlɛ. U ye Eburɔn n'a maraw minɛ, ka dugu yɔrɔ barikamanw ci, k'a lamini sangasow jɛni. 66O kɔ, u ye sira minɛ k'u ɲaa sin filisiw ka jamana faan fɛ, ka taga Mariza cɛtigɛ. 67O loon na, sarakalasebaga minw tun b'a fɛ ka taga kɛlɛ la k'u yɛrɛ yira cɛɛw ye, k'a sɔrɔ u ma miiri ka ɲa, olu fagara kɛlɛ la. 68O kɔ, Zuda y'a ɲaa sin Asidɔdi faan fɛ, min be filisiw ka mara la. A y'u ka sarakabɔyɔrɔw ci k'u ka joow jɛni, k'u ka duguw nafolo cɛ ka sɔrɔ ka kɔsegi Zuda mara la.

ALA KA KUMA

© 2008 Alliance Biblique du Burkina Faso

More Info | Version Index