Search form

Sam fɔlɔ 20

Zonatan be Dawuda lasɔmi

1Dawuda bɔra Nayɔti, Arama gɛrɛfɛ ka boli ka taga Zonatan fɛ, k'a fɔ a ye ko: «Ne ye mun kɛ? Ne ye mun le cɛn, walima ne y'i facɛ hakɛ ta koo jumɛn le la, n'a be ne fagayɔrɔ ɲinina?» 2Zonatan y'a fɔ a ye ko: «O te se ka kɛ, i tena sa. Bari ne facɛ te koo si kɛ n'a m'a sara ne la, a koba fara a fitini kan. Mun na ne faa bena nin dogo ne la? O te se ka kɛ.» 3Dawuda kalila k'a fɔ Zonatan ye ko: «I faa y'a lɔn tiɲɛ na ko ne koo ka d'i ye. O la, a y'a fɔ a yɛrɛ kɔnɔ ko e man kan ka nin mɛn, bari a bena i hakili ɲagami. Nga Masaba kosɔn, ani ele fana be yen! Ne b'a fɔ ko a tora dɔɔni dɔrɔn ne be sa.» 4Zonatan y'a fɔ Dawuda ye ko: «I be fɛɛn min fɛ, ne bena o kɛ i ye.» 5- Dawuda y'a fɔ Zonatan ye ko: «Sini le bena kɛ kalokura ɲanagwɛ ye. Ne do ka kan ka taga sigi ka dumuni kɛ ni masacɛ ye. N b'a ɲini i fɛ i ka ne to n be taga dogo foro kɔnɔ, fɔɔ ka taga se sinikɛnɛ wulafɛ ma. 6N'i facɛ y'a ye ko n te yen, i b'a fɔ ko ne y'i daali kosɔbɛ ko i ka sira di n be boli ka taga n ka dugu la Bɛtilehɛmu, bari n ka fadenyabolo mɔgɔw bɛɛ bena sanyɛlɛma saraka dɔ bɔ. 7N'a y'a fɔ k'o ɲana, o tuma na, kojugu si te i ka baarakɛla ɲa. Nga n'a dimina, i k'a lɔn ko a y'a latigɛ ka kojugu kɛ ne la. 8I k'i ka mɔgɔsɔbɛya yira i ka baarakɛla la, bari i y'a kɛ an ye layidu ta ɲɔgɔn ye Masaba tɔgɔ la. Ni ne ye kojugu dɔ kɛ, e yɛrɛ ka n faga. Mun na i be taga ni n ye i facɛ fɛ?»

9Zonatan y'a jaabi ko: «O tena kɛ fewu. Ni ne y'a ye ko ne facɛ ye kojugu labɛn i kama, ne ten'a to ni n m'o fɔ i ye.» 10Dawuda y'a fɔ Zonatan ye ko: «N'i facɛ nana i jaabi ni kuma gwɛlɛman ye, jɔn le bena ne lasɔmi?» 11Zonatan y'a fɔ Dawuda ye ko: «Na an be bɔ ka taga foro kɔnɔ.» U bɔra ka taga foro kɔnɔ ɲɔgɔn fɛ.

12Zonatan y'a fɔ Dawuda ye ko: «Masaba, Isirayɛli ka Ala kosɔn ne b'a fɔ i ye ko ne bena jija sini yɛrɛ, walima sinikɛnɛ, nin waati ɲɔgɔn na, ka n facɛ sɛgɛsɛgɛ k'a kɔnɔnako lɔn. N'a sɔrɔla ko n facɛ diminin tɛ i kɔrɔ, ni ne ma sɔn ka mɔgɔ ci i fɛ k'o fɔ i ye, 13Masaba kana yafa n ma! N'a fana sɔrɔla ko ne facɛ ye kojugu labɛn i kama, ne bena o fɔ i ye ani k'i to i be taga hɛrɛ la. Masaba ka to i fɛ i n'a fɔ a tora ne facɛ fɛ cogo min na. 14Hali ni waati dɔ nana se ni ne be sii la, Masaba be ɲumanya min fɛ, i k'o kɛ ne ye janko ne kana sa. 15- To ka koɲuman kɛ n ka somɔgɔw ye, hali ni Masaba y'i juguw kelen kelen bɛɛ halaki ka bɔ dugukolo kan tuma min na.»

16Zonatan bɛnna ni Dawuda ka somɔgɔw ye. A ko: «Masaba ka Dawuda mɔnɛ bɔ a juguw la.» 17O waati la tugu, Zonatan y'a kɛ Dawuda kalil'a ka teriya kosɔn, bari Dawuda koo tun ka d'a ye i n'a fɔ a yɛrɛ.

18Zonatan y'a fɔ a ye ko: «Sini kɔni le ye kalokura ɲanagwɛ ye. U ben'a lɔn ko i te yen, bari i ka sigiyɔrɔ bena to lakolon. 19Sinikɛnɛ, i be taga dogo fɔɔ i tun dogora yɔrɔ min na o loon na. I be to kabakuru nin kɔfɛ min be wele Ezɛli. 20Ne bena biɲɛ saba bon o kabakuru nin gɛrɛfɛ, k'a kɛ i n'a fɔ n tun be fɛɛn le bonna n'u ye. 21O kɔ, n bena kanbelennin dɔ ci ka taga u ta. Ni n y'a fɔ a ye ko: ‹I ma biɲɛ nunu tɛmɛ wa? U ta ka na,› o tuma na, i ka na bari hɛrɛ ye i ta ye. Masaba kosɔn, foyi tena kɛ. 22Nga ni n y'a fɔ kanbelennin nin ye ko: ‹A filɛ, u be ɲafɛ halibi,› o tuma i ka taga, bari Masaba b'a fɛ i ka taga le. 23Masaba le ye an seere ye an ka kuma nunu la, an ye minw fɔ ɲɔgɔn ye.» 24O la, Dawuda dogora foro kɔnɔ.

Sayuli be Dawuda kɔniya

Kalokura ɲanagwɛ sera, masacɛ sigira dumuni kunna. 25A sigir'a ka sigilan kan i n'a fɔ a tun be to k'a kɛ cogo min na ka kɔrɔ kogo kɔrɔ. Zonatan sigir'a ɲafɛ, Abinɛri sigira Sayuli gɛrɛfɛ, Dawuda ka sigiyɔrɔ tora lakolon. 26Sayuli ma foyi fɔ o loon na. A tun b'a miiri ko balinako dɔ le y'a sɔrɔ, ko siga t'a la, a saniyanin tɛ. 27O dugusagwɛ, min ye kalokura tile filanan ye, Dawuda ka sigiyɔrɔ tora lakolon tugu. O la, Sayuli y'a deen Zonatan ɲininga ko: «Mun na Zese dencɛ ma na kunun ani bii dumuni kɛyɔrɔ la?» 28Zonatan y'a jaabi ko: «Dawuda ye sira ɲini ne fɛ ko a be taga Bɛtilehɛmu. 29A tun ko ne ma ko n k'a to a be taga, ko a ka somɔgɔw ka kan ka saraka dɔ bɔ dugu kɔnɔ, ko a kɔrɔcɛ le y'a fɔ a ye ko a ka na. Ko n'a koo ka di ne ye, ne ka sɔn a be ta'a balimaw ye. O le y'a to a ma se ka na masacɛ ka dumuni na.» 30Sayuli dimina Zonatan kɔrɔ kosɔbɛ k'a fɔ a ye ko: «E ye denkolon le ye! I m'a lɔn ko ne b'a kala ma ko ele ni Zese dencɛ ye teriw ye wa? I b'o kɛ i yɛrɛ ka maloya kama, an'i bamuso ta kama! 31Ka Zese dencɛ to sii la diɲɛ kɔnɔ, i m'a lɔn ko e tena se ka kɛ masa ye wa? O la, mɔgɔw bila u be ta'a minɛ ka na n'a ye sisan, bari a ka kan ka faga.» 32Zonatan y'a facɛ jaabi ko: «Mun na a bena faga do? A ye mun le kɛ?» 33Sayuli y'a ka taman ta ko a be Zonatan faga. O la, Zonatan y'a faamu ko a facɛ tun y'a latigɛ sɔbɛ la ko a be Dawuda faga. 34A dimininba wilila ka bɔ dumuni kunna, a ma foyi dumu kalokura tile filanan na, bari a dusu tun cɛnna Dawuda kosɔn a facɛ ka nɛnili kosɔn.

Zonatan be Dawuda lasɔmina

35O dugusagwɛ, Zonatan tagara foro kɔnɔ ani Dawuda tun bɛnna yɔrɔ min la, kanbelennin dɔ tagara n'a ye. 36Zonatan y'a fɔ o kanbelennin nin ye ko: «N bena biɲɛ minw bon, boli ka taga u ta.» Kanbelennin ye boli ta, Zonatan ye biɲɛ bon, a tagara ben a ɲafɛ. 37Kanbelennin nin sera biɲɛ nin benyɔrɔ la tuma min na, Zonatan pɛrɛnna ko: «Biɲɛ nin t'i ɲafɛ wa?» 38O kɔ, a pɛrɛnna tugu ko: «A kɛ joona joona, kana mɛn yen, kana lɔ!» Kanbelennin nin ye biɲɛ nin ta ka kɔsegi ka n'a kuntigi fɛ. 39Kanbelennin nin tun te foyi kala ma, Zonatan ni Dawuda le tun b'o koo kala ma.

40O kɔ, a ye kala n'a biɲɛw di kanbelennin ma ko a ka taga n'u ye dugu kɔnɔ. 41Kanbelennin nin taanin kɔ, Dawuda wilila ka bɔ worodugu ɲafan na, k'a kunbiri gwan Zonatan ɲakɔrɔ k'a ɲaa biri duguma siɲɛ saba. Teri mɔgɔ fila nunu y'u bolo meleke ɲɔgɔn na ka kasi. Dawuda kɔni, ale ta tun ye ɲaji ye dɔrɔn. 42O kɔ, Zonatan y'a fɔ Dawuda ye ko a ka taga hɛrɛ la, k'olu do kalila ka ban ni Masaba tɔgɔ ye ɲɔgɔn ye, ko Masaba le ka kɛ u ni ɲɔgɔn cɛ, ani u kɔmɔgɔw ni ɲɔgɔn cɛ tuma bɛɛ.

ALA KA KUMA

© 2008 Alliance Biblique du Burkina Faso

More Info | Version Index