Search form

MAKABEW FILANAN 10

Alabatosoba saniyako

(Mak fɔlɔ 4.36-61)

1Matigi ye Makabe n'a tɔɲɔgɔnw dɛmɛ, u sera ka Alabatosoba ni dugu minɛ tugu. 2Lonanw tun ye sarakabɔyɔrɔ minw lɔ forobayɔrɔ la, a ye olu ci, ani sɔnnikɛyɔrɔw. 3U ye Alabatosoba saniya ka ban tuma min na, u ye sarakabɔyɔrɔ wɛrɛ lɔ. U ye tabɛrɛ kɛ ka tasuma mana, ani ka saraka bɔ, min tun ma se ka kɛ saan fila tɛmɛnin kɔnɔ. U ye wusulan jɛni, ka fitinɛw mana, ani ka burukunw bila. 4Landa nunu kɛnin kɔ, u lara ka biri ka Matigi dali ko a kana o kojugu nunu ɲɔgɔn la u kan tugu, ko n'a sɔrɔla ko u ye hakɛ dɔ kɛ, a k'u ladi cogo nɔgɔman na, ko a kana u don siya wɛrɛw bolo, a tɔgɔ cɛnbaga, banbagatɔ mɔgɔjugu nunu bolo. 5Alabatosoba nin saniyalon tun bɛnn'a nɔgɔlon ɲɔgɔn ma siya wɛrɛw fɛ, o kɔrɔ *Kisilewu kalo tile mugan ni duurunan loon. 6U ye tile seegi kɛ ni nisɔndiya ye Gwatakɔrɔsigi ɲanagwɛ kɛcogo la, k'u hakili to a la ko a ma mɛn u ye Gwatakɔrɔsigi ɲanagwɛ loonw kɛ k'u to kuluw kan, ani kuluwow kɔnɔ i n'a fɔ kongosogow. 7O le kosɔn, u ye furaburuw ta, ni yiribolokɛnɛw, ani tenfuraburuw, ka Ala tanu ni dɔnkiliw ye, ale min y'a kɛ a batoso saniyako kɛra ka dafa. 8U y'a latigɛ ka bɛɛn a la ko saan o saan, zuwifuw bɛɛ bena loon nunu bato.

Antiyokusi Epatɔri ka tile koow

9Ayiwa, Antiyokusi ka sayako kɛra ten, u tun be min wele fana ko Epifani. 10Sisan an bena dɔ fɔ Alaɲasiranbali nin dencɛ Antiyokusi Epatɔri ka koo la. A ka kɛlɛw ye bɔnɛ minw lase, k'o kumababaw fɔ. 11A ye fanga ta dɔrɔn, a ye Liziyasi tɔgɔla dɔ bila a ka koow kunna. Liziyasi nin tun ye Siriba ni Fenisi maraw kuntigiba ye. 12Min ye Potoleme ka koo ye, n'u b'a wele fana ko Makirɔn, ale lo kɔnna ka kotilennin kɛ zuwifuw ye. Bari, u tun bagara u ma. Ale jijara k'u mara hɛrɛ la. 13O la, masacɛ ka mɔgɔsɔbɛw tagar'a jalaki Epatɔri ɲafɛ. Tuma caaman yɛrɛ, u tun b'a wele ko janfamɔgɔ. Bari, Filometɔri tun ye Sipɔrɔ jamana kalifa a ma, nga a y'o yɔrɔ to ka taga fara Antiyokusi Epifani kan. A tun te sera k'o lɔyɔrɔba nin koo ɲa tugu ni kunkɔrɔta ye minkɛ, a y'a yɛrɛ faga ni fura ye ka diɲɛ to.

Gɔriziyasi ni Idumekaw ka dugu yɔrɔ barikamanw

(Mak fɔlɔ 5.1-8)

14Gɔriziyasi kɛra Idume mara kuntigi ye tuma min na, a ye kɛlɛdenw ta baara la. A tun be zuwifuw kɛlɛ ni kuun bɛrɛ t'a la. 15O waati kelen na, Idumeka minw tun be dugu yɔrɔ barikamanw kunna, olu tun be zuwifuw tɔɔrɔ. Mɔgɔkolon minw tun mana gwɛn ka bɔ Zeruzalɛmu dugu kɔnɔ, u tun be olu ladon u fɛ, ka to ka kɛlɛ tigɛ. 16Makabe n'a ka kɛlɛdenw ye Ala dali kɛnɛ kan k'a ɲini a fɛ ko a ka to n'u ye. O kɔ, u ye taama daminɛ ka taga Idumekaw ka dugu yɔrɔ barikamanw kama. 17U y'u kɛlɛ ni barika ye k'u ka yɔrɔ nunu minɛ. Mɔgɔ minw bɛɛ tun be kɛlɛ kɛra dugu laminikogo kan, u ye olu gwɛn. Minw donna u bolo, u ye olu kaan tigɛ. U ye mɔgɔ minw faga, o sera mɔgɔ waa mugan (20 000) ni kɔ ma. 18Mɔgɔ waa kɔnɔntɔn (9 000) ɲɔgɔn tagara dogo yɔrɔ barikaman fila dɔ la. Mɔgɔ makoya be bɔ fɛɛn minw bɛɛ la, ka se ka to yen n'u datugunin lo u juguw fɛ, o bɛɛ tun be yen. 19Makabe ye Simɔn ni Yusufu to yen, ani ka Zase n'a ka mɔgɔw fara u kan, mɔgɔda min ka ɲi, k'u datugu yen. A tun gwannin be yɔrɔ minw na, ale yɛrɛ tagara o yɔrɔw la. 20Nga wariko tun ka di Simɔn ka mɔgɔw ye kojugu, o kɔlɔsibaga nunu dɔw sɔnna dugu barikaman kɔnɔ mɔgɔ dɔw ye warigwɛkuru waa bi wolonwula (70 000) di u ma, u y'a to dɔw bɔra ka boli. 21Koo nin kibaruya sera Makabe ma tuma min na, a ye kɛlɛdenw kuntigiw lajɛn ka kojugukɛla nunu jalaki ko u y'u balimaw feere. Bari, u tun y'u juguw labila wari kosɔn. 22O la, a ye janfamɔgɔ nunu faga, o kɔ dɔrɔn, a ye dugu yɔrɔ barikaman fila nunu minɛ. 23A tun be see sɔrɔ a ka kɛlɛw bɛɛ la. A ye mɔgɔ waa mugan ni kɔ halaki dugu yɔrɔ barikaman fila nunu kɔnɔ.

Zuda be se Timote kɔrɔ

24Zuwifuw tun sera Timote min kɔrɔ ka tɛmɛ, ale ye lonanw ta caaman kɛlɛdenya la. A ye soo caaman lajɛn ka bɔ Azi jamana na. A gwɛrɛla n'a ka kɛlɛdenw ye Zude mara la janko ka yɔrɔ nin minɛ kɛlɛkɛminanw barika la. 25Makabe n'a ka mɔgɔw ye buguri kɛ u kuun na, k'u cɛɛ siri ni dusukasifani ye, ka to ka Ala daali Timote gwɛrɛtuma na. 26U birila duguma sarakabɔyɔrɔ juu la, n'u be Ala daalila ko a ka olu dɛmɛ, ko a ka kɛ u juguw jugu ye, ani u kɛlɛɲɔgɔnw kɛlɛbaga ye ka kɛɲɛ n'a ka sariya kɔnɔnakuma gwɛninw ye. 27U tilara dalili la tuma min na, u ye kɛlɛkɛminanw ta ka gwɛrɛ ka bɔ dugu kɔnɔ ka se yɔrɔjan. U surunyana u juguw la tuma min na, u lɔra. 28Dugugwɛdafɛ kɛnɛ citɔ, u ye kɛlɛ daminɛ. Zuwifuw bolo lanin tun be u ka jagwɛlɛya kan see sɔrɔko la, ani Matigi kan, u ka koo bɛɛ tonin be min bolo. Siya wɛrɛw kɔni fɛ, kɛlɛ dusudimi le tun b'u samana ka taga dɔrɔn. 29Kɛlɛ tun juguyara kosɔbɛ tuma min na, u juguw ye cɛɛ ɲanaman mɔgɔ duuru natɔ ye ka bɔ sankolo la, u tun be soow kan, soow masirifɛnw tun ye sanu ye. U bilara zuwifuw ɲa. 30U ye Makabe bila u cɛma k'a tanga n'u ka kɛlɛkɛminanw ye, a ma mandimi. U tun be zuwifu kɛlɛɲɔgɔnw bonbonna ni biɲɛ ni sanpɛrɛn ye fɔɔ olu ɲaa tun te sera ka yeli kɛ, u hakili ɲagamina, u bɛɛ bolila u kunfɛ ka jɛnsɛn pewu! 31Kɛlɛden sennatigi mɔgɔ waa mugan ni kɛmɛ duuru (20 500), ani sotigiw mɔgɔ kɛmɛ wɔɔrɔ kaan tigɛra.

32Timote yɛrɛ bolila ka taga don yɔrɔ barikaman dɔ kɔnɔ min tun sutaranin be kosɔbɛ, n'o be wele Gazara. Kereyasi tun be min kunna. 33Nga Makabe n'a ka mɔgɔw y'a datugu tile naani kɔnɔ nisɔndiya la. 34Mɔgɔ minw tun b'o yɔrɔ la, olu jigi tun be yɔrɔ nin sutarako kan minkɛ, u tora ka Ala nɛni, u ma kumajugu fɔ dabila fana. 35Tile duurunan loon, kɛnɛ citɔ, kanbelen mɔgɔ mugan dimina kosɔbɛ Makabe ka kɛlɛdenw cɛma, Ala nɛniko kama. U girinna ka taga yɛlɛ dugu laminikogo kan ni jagwɛlɛya ye. U dimininba ye mɔgɔ o mɔgɔ sɔrɔ, u y'o faga. 36Dɔ wɛrɛw yɛlɛla mɔgɔ datugunin nunu kama o cogo kelen na ni faan wɛrɛ ye, ka sangasow jɛni ka lɔgɔw mana, ka Ala nɛnibagaw ɲanaman jɛni. Dɔ wɛrɛw fana ye daaw kari k'a to kɛlɛden tɔ nunu donna, ka kɔn ka dugu minɛ. 37Timote tun dogora jidingɛlakolon dɔ kɔnɔ, nga u y'a ye k'a kaan tigɛ, k'a balima Kereyasi kaan tigɛ fana, ani Apolofani. 38O koo nunu kɛnin kɔ, u y'a daminɛ ka dɔnkiliw la ka Matigi tanu n'o ye. A tun ye koɲuman kɛ Isirayɛlidenw ye kosɔbɛ, ani k'a kɛ u sera u juguw kɔrɔ. U y'a fo o le kosɔn.

ALA KA KUMA

© 2008 Alliance Biblique du Burkina Faso

More Info | Version Index