Search form

MAKABEW FILANAN 14

Alikime be Zuda jalaki

(Mak fɔlɔ 7.1-38)

1Saan saba tɛmɛnin kɔ, Zuda n'a ka mɔgɔw y'a mɛn ko Selekusi dencɛ Demetiriyusi tun sera Tiripoli kurun lɔyɔrɔ la ni kɛlɛbolo barikaman ye, ani kurunw. 2A tun ye jamana minɛ, ka Antiyokusi halaki, ani Liziyasi, a mɔna min kɔrɔ. 3Alikime tɔgɔla dɔ tun be yen. Fɔlɔ la, a tun ye sarakalasebagaw kuntigi ye, nga a tugura k'a yɛrɛ nɔgɔ ni girɛkiw ka landaw ye muruti tuma na. A y'a faamu ko a tun tena se ka kisi cogo si la, walima ka don Ala ka sarakabɔyɔrɔ la tugu. 4O la, a tagara masacɛ Demetiriyusi fɛ girɛkiw ka masaya saan 151nan ɲɔgɔn na ni masafugulan sanulaman ye, ani ka tenfuraburu fara o kan a tun ka kan ka minw di ka kɛɲɛ ni Alabatosoba landa ye. Nga a ma foyi fɔ o loon na.

5Demetiriyusi n'a ladibagaw y'a wele ɲɔgɔnye la tuma min na k'a ɲininga zuwifuw ka miiriyaw n'u ka kolatigɛninw na, o kɛra waatiɲuman ye Alikime fɛ ka se k'a ka nalomanyako kɛ. 6A y'a jaabi ko: «U be zuwifu minw wele ko Asideɲɛw,g Zuda Makabe le be olu ɲafɛ. U be to ka kɛlɛ wili, ani ka mɔgɔw kɔnɔnasu, u te mara to ɲasuma na. 7Olu sababu la, ne yɛrɛ fana gwɛnna ka n niin bɔ cɛɛn na. O ye sarakalasebagaw kuntigi ka baara koo ye. Ne nakun yan, o ye 8masacɛ ka hɛrɛ sɔrɔko ye. Ne be hami o le la fɔlɔ sɔbɛ la. Nga ne be miiri anw fasodenw ka hɛrɛ la fana. Bari ne ye mɔgɔ minw tɔgɔ fɔ sisan, olu ka yada b'an ka siya bɛɛ bila tɔɔrɔba la. 9O la masacɛ, ne b'i dali i ka sɛgɛsɛgɛli kɛ kosɔbɛ koo nin na, ka sɔn ka janto an ka jamana n'an ka siya kisiko la ka bɔ tɔɔrɔ nin na. Bari, i be to k'i ka ɲumanyaba yira bɛɛ la. 10Ka Zuda to sii la, jamana te na to hɛrɛ la.»

11A tilara kuma na dɔrɔn, Zuda koo ka go masacɛ ka mɔgɔsɔbɛ tɔ minw ye, olu banbana ka Demetiriyusi dusu gwan. 12O yɔrɔnin kelen, ale ye Nikanɔri woloma, min tun ye kɛlɛkɛsamaw kuntigi ye. A y'a kɛ Zude mara kuntigi ye, k'a ci yen 13ko a ka Zuda faga, k'a ka mɔgɔw jɛnsɛn, ani ka Alikime sigi sarakalasebagaw kuntigibaya la, Alabatosoba kunna, min ka bon ni batolikɛsow bɛɛ ye diɲɛ kɔnɔ. 14Zude mara Alaɲasiranbali minw tun bolila Zuda ɲa, olu caaman donna Nikanɔri ka kɛlɛdenw cɛma. U tun be miiri ko zuwifuw ka bɔnɛ n'u ka tɔɔrɔw bena kɛ olu ka nafa ye.

Nikanɔri be teriya don ni Zuda ye

15Zuwifuw y'a mɛn ko Nikanɔri be gwɛrɛla, ko Alaɲasiranbali wilila kɛlɛ kama. U ye buguri kɛ u yɛrɛ kuun na, ka Ala dali, min y'u ka siya woloma k'a kɛ a ta ye kudayi, min be to k'a ka mɔgɔw dɛmɛ ni taamasiɲɛ yetaw ye. 16U kuntigi ko u ka wili ka taga. O yɔrɔnin kelen, u wilila ka taga kɛlɛ kɛ n'u juguw ye dugudennin dɔ gɛrɛfɛ min tɔgɔ ko Deso.h 17Zuda baden Simɔn tun ye kɛlɛ daminɛ ni Nikanɔri ye, nga Simɔn juguw barila ka na, o kosɔn, u tun ser'a kɔrɔ dɔɔni. 18O bɛɛ n'a ta, Zuda ka kɛlɛdenw jaa tun ka gwɛlɛ n'u hakili siginin tun be cogo min na kɛlɛw la, u tun be minw kɛ u faso kosɔn, Nikanɔri y'o mɛn tuma min na, a sigara kɛlɛ nin la n'a bena se. 19O la, a ye Pozidoniyusi, ni Tewodɔti, ani Matatiyasi ci ka taga bɛn ni zuwifuw ye. 20Zuda y'u ka fɔtaw sɛgɛsɛgɛ kosɔbɛ tuma min na, a y'o ɲafɔ a ka kɛlɛdenw ye. U bɛɛ y'a yira ni miiriya kelen ye, k'u sɔnna bɛɛn nin na. 21U ye loon sigi ko kuntigiw bena ɲɔgɔn ye o loon na danna. Wotoro dɔw gwɛrɛla ka bɔ faan dɔw la, u ye mɔgɔbasigilanw bila. 22Zuda tun ye mɔgɔw sigi yɔrɔɲumanw na, kɛlɛkɛminanw be minw bolo n'u labɛnnin be ka bɔ ni u juguw barila ka janfako dɔ kɛ. Nga ɲɔgɔnye nin labanna bɛɛn kɔnɔ. 23Nikanɔri tora Zeruzalɛmu, a ma kotilenbali si kɛ. Jamakulu minw tun nan'a kɔ, a y'o labila. 24Zuda tun be n'a ye tuma bɛɛ, bari a koo tun ka di cɛɛ nin ye kosɔbɛ. 25A y'a ladi ko a ka furu ka deenw sɔrɔ. Zuda furu la, k'a daminɛ k'a sii dagamu hɛrɛ la.

Nikanɔri ni Zuda ka bɛɛn be nagasi

26Alikime y'a ye ko Nikanɔri ni Zuda bɛnna kosɔbɛ. O la, a y'u ka bɛɛn sɛbɛ dɔ sɔrɔ ka ta'a fɔ Demetiriyusi ye ko: «Nikanɔri be koo dɔw kɛra minw te bɛn ni fanga sariyaw ye. A ko Zuda bena ale nɔɔ ta, ale do ye ele ka mara kɛlɛɲɔgɔn yɛrɛ ye.» 27Mɔgɔkolon nin ka galon ye masacɛ dusu wili. A ye sɛbɛ ci Nikanɔri ma k'a fɔ a ye ko a ma sɔn bɛɛn nin la fewu, ko a ka Makabe siri ni jɔrɔkɔw ye k'a ci Antiyɔsi joona joona.

28Nikanɔri ye bataki nin sɔrɔ tuma min na, a hakili ɲagamina. Bari, ka bɛɛn cɛn ni mɔgɔ jalakibali ye, o tun bena digi a la. 29Nga a tun te se ka koo kɛ ni masacɛ sago tɛ minkɛ, o la, a tora ka waatiɲuman ɲini ka cira nin ɲanabɔ ni cekuya ye. 30Makabe fana y'a kɔlɔsi k'a ye ko Nikanɔri sumana ale faan fɛ, ko a tun be to k'a minɛ ka ɲa cogo min na, ko a t'o kɛ tugu. A y'a miiri k'o kɔrɔ te koɲuman ye. O la, a y'a ka mɔgɔw caaman lajɛn, ka taga dogo janko k'a yɛrɛ bɔsi Nikanɔri bolo. 31Nikanɔri y'a ye ko Zuda y'ale janfa minkɛ, a tagara Ala ka soba senuman nin na. O y'a sɔrɔ sarakalasebagaw tun be saraka bɔra a cogo la. A y'a fɔ u ye ko u ka Zuda don ale bolo. 32Olu kalila k'a fɔ ko a be mɔgɔ min yɔrɔ ɲinina, olu t'o yɔrɔ lɔn. O la, 33Nikanɔri y'a kinibolo sin Alabatosoba ma ka kali k'a fɔ ko n'u ma Zuda sirinin don ale bolo, ko ale bena Alabatosoba nin ci pepewu ka sarakabɔyɔrɔ halaki, ani ka Diyɔnizɔsi batoso ɲanaman lɔ yan yɔrɔ la. 34O fɔnin kɔ, a y'a ka sira minɛ. Nga sarakalasebagaw y'u bolow sin Sankolotigi ma, min y'an ka siya dɛmɛ kɛlɛ la tuma bɛɛ, k'a dali ko: 35«Matigi, e min mako te foyi la, a diyara i ye i batoso ka kɛ an cɛma, e siginin be min kɔnɔ. 36O la sisan, Matigiɲuman, e min ɲɔgɔn te yi, i ka soo nin mara kudayi, foyi kan'a nɔgɔ tugu, ale min saniyara a ma mɛn.»

Arazisi ka saya

37Zeruzalɛmu cɛkɔrɔbaw cɛma, mɔgɔ dɔ tun be yen min tɔgɔ ko Arazisi. Dɔ ye ale koo fɔ Nikanɔri ye. Cɛɛ nin sɔbɛ tun donnin be a ka siya koo la, a tɔgɔɲuman bɔra kosɔbɛ. U tun b'a wele zuwifuw faa, a ka kanuya kosɔn olu faan fɛ. 38Bari murutili daminɛwaati la, u tun y'a jalaki ko a be to ka zuwifuw ka landaw kɛ. O la, a tun y'a yɛrɛ saraka zuwifuya tangako la kosɔbɛ. 39Juguya min tun be Nikanɔri kɔnɔ zuwifuw faan fɛ, a tun b'a fɛ k'o yira minkɛ, a ye kɛlɛden mɔgɔ kɛmɛ duuru ni kɔ ci ko ka taga Arazisi minɛ. 40Bari a tun be miiri ko n'a y'ale minɛ, k'o bena digi zuwifuw la haali. 41A ka kɛlɛdenw tun be ɲini ka sangaso minɛ. U tun be luda karila, a tun fɔra u ye ko u ka tasuma don sangaso dondaw la. Arazisi y'a ye ko boliyɔrɔ te yen minkɛ, a y'a ka murujan sin a yɛrɛ ma. 42Ka sa kunkɔrɔta la, o tun ka fisa ale fɛ ka don kojugukɛlaw bolo, u k'a dɔgɔya min man kan n'a ka kunkɔrɔta ye. 43Nga kɛlɛ gwankojugu fɛ, a ma se k'a yɛrɛ faga. Kɛlɛdenw tun be girinna ka don soo kɔnɔ tuma min na, a bolila dugu laminikogo kan, a ma siga, a y'a yɛrɛ fili jama bolo ni jagwɛlɛya ye. 44Bɛɛ girinna ka bɔ kɔfɛ, a benna yɔrɔlakolon cɛmancɛ la. 45A tun be ninakilila halibi. Dusugwɛlɛya kosɔn, a wilila, joli be woyora, a tɔɔrɔnin be kosɔbɛ a ka mandiminɔw bolo. A bolila ka jama cɛtigɛ, ka taga yɛlɛ kabakurujan dɔ kan. 46A joli bɔnna ka ban, a y'a yɛrɛ nugu minɛ n'a bolo fila ye k'u sama ka fili jama kan. A ye nii tigi dali ko a k'u kɔsegi ale ma loon dɔ. A sara ten.

ALA KA KUMA

© 2008 Alliance Biblique du Burkina Faso

More Info | Version Index