Search form

MAKABEW FILANAN 15

Nikanɔri be Ala tɔgɔ cɛn

1Nikanɔri y'a mɛn ko Zuda n'a ka mɔgɔw be Samari mara la tuma min na, a y'a latigɛ ko a bena u kɛlɛ lafiɲɛlon na, ko farati tena kɛ o la haali dɔɔni. 2Zuwifu minw tun be tugur'a kɔ jagoya la, olu y'a fɔ a ye ko a kana u halaki cogojugu la i n'a fɔ kongofɛnw. Ko Ala min be janto fɛɛn bɛɛ la, ale ye loon min boɲa k'a kɛ a yɛrɛ ta ye ka tɛmɛ loon tɔw kan, ko a k'o kɔlɔsi! 3Nga mɔgɔjugu dafanin nin y'u ɲininga ko yala kuntigi be sankolo la min y'a fɔ ko lafiɲɛlon ka kan ka bato wa. 4U y'a jaabi ko Matigi min ye kuntigi ye sankolo la, ale yɛrɛ le y'a fɔ ko loon wolonwulanan ka bato. 5Nikanɔri y'u jaabi ko: «Ne fana ye dugukolo kuntigi ye, ne b'a fɔ ko aw ka kɛlɛkɛminanw ta ani ka masacɛ ka baara kɛ.» O bɛɛ n'a ta, a ma se k'a ka kojugu latigɛnin kɛ.

Zuda ka ladili n'a ka siko

6Nikanɔri wilila ni yɛrɛboɲa sifa dɔ ye fɔɔ a k'a latigɛ ko a bena fɛɛn minw sɔrɔ Zuda n'a ka mɔgɔw fɛ, ko a bena see sɔrɔli taamasiɲɛ lɔ n'o ye. 7Nga Makabe jigi ma tigɛ fewu. A jigi tun b'a la kosɔbɛ ko Matigi ben'a dɛmɛ. 8A y'a ka mɔgɔw jaa gwɛlɛya ko u kana siran Alaɲasiranbali nunu ka kɛlɛ ɲa, ko u ye dɛmɛ min sɔrɔ ka bɔ sankolo la, k'u ka miiri o la ka kɔnɔni kɛ ka l'a la ko halibi Setigi Ala bena see d'u ma. 9A y'u jaa gwɛlɛya ni Musa ka sariya ni kiraw ka kuma ye, ani k'u hakili jigi u ka kɛlɛ tɛmɛninw na. A kɛra ten, a ye barikakura don u la. 10A y'u fari foni ka ban ten minkɛ, a ye Alaɲasiranbali nunu ka mɔgɔkolonya n'u ka janfa lakali u ye k'a ka kuma kuncɛ. 11Zuda y'a ka mɔgɔw kelen kelen bɛɛ labɛn kɛlɛ kama. A m'a fɔ u ye ko u k'u jigi la nigɛkunbɛnnanw ni tamaw kan dɛ, a y'u hakili sigi ni kuma ɲanamanw le ye. A sɔrɔla ka siko dɔ lakali u ye, mɔgɔ ka kan k'a jigi la min kan. A y'u bɛɛ nisɔn diya n'o kuma ye. 12Zuda tun ye min ye, o filɛ: A tun ye Oniyasi ye, ale tun ye sarakalasebagaw kuntigi ye ka kɔrɔ. Mɔgɔɲuman tun lo, a ka koo tun man gwɛlɛ, a sɔɔn tun ka ɲi. A tun be kuma ni hakilitigiya ye, a tun delila koɲumankɛ la kabini a denmisɛnman. A y'a bolow kɔrɔta ka Ala dali zuwifuw bɛɛ lajɛnnin ye. 13O kɔ, Zuda ye cɛɛ dɔ ye o cogo kelen na, ale kunsigi gwɛnin tun lo. O tigi nin ka kan ni boɲa ye kosɔbɛ. I man'a ye, a lɔn ko mɔgɔbaba lo. 14Oniyasi ye kuma ta k'a fɔ ko: «Ala ka kira Zeremi filɛ nin ye. A balimaw teri lo, a be Ala dali siɲɛ caaman jama ye, ani Ala ka dugu ye.» 15O kɔ, Zeremi ye murujan sanulaman sin Zuda ma n'a kinibolo ye, k'a d'a ma n'a b'a fɔra ko: 16«Ala ka muru nin minɛ, Ala y'a di. I bena i juguw faranfaran n'a ye.»

Nikanɔri dɛsɛko n'a ka saya

(Mak fɔlɔ 7.39-50)

17Zuda ka kumaɲumanw ye zuwifuw hakili sigi, k'u jaa gwɛlɛya ani ka cɛya dusu di kanbelen nunu ma. U y'a latigɛ ko u tena to u ka sigiyɔrɔ la, ko u bena sin ka taga u juguw kɛlɛ ni jagwɛlɛya ye, ka bondori kɛ n'u fanga bɛɛ ye. U y'o le ŋaniya, bari Zeruzalɛmu dugu, ni Alasira ani Alabatosoba tun be farati la. 18Ka hami musow ni denmisɛnw kosɔn, n'u balimaw ani u ka mɔgɔw kosɔn, o tun te koba ye u fɛ. U tun be jɔɔrɔ koo min na kosɔbɛ ka tɛmɛ fɛɛn bɛɛ kan, o ye Alabatosoba ye, min tun kalifara Ala ma. 19Mɔgɔ minw tun datugunin be Zeruzalɛmu dugu kɔnɔ, olu nii tɔɔrɔnin tun lo kosɔbɛ. Koo min bena kɛ kongo kɔnɔ, u tun be hami n'o ye.

20Bɛɛ tora ka koo nin laban kɔnɔ, min surunyana ka ban. U juguw ka kɛlɛdenw tun lajɛnna ka ban n'u b'u yɛrɛ labɛnna kɛlɛ kama. U tun nana ni samaw ye k'u lɔ yɔrɔɲuman na, sotigiw tun be kɛlɛbolo faan fila la. 21Makabe ye kɛlɛden jama nin filɛ, n'u ka kɛlɛkɛminan sifaw bɛɛ, ni samaw ka fariya. A y'a bolo wili sanfɛ ka Matigi dali, min be kabakow kɛ, bari a tun b'a lɔn ko ale be see di mɔgɔw ma minw ka kan n'a ye. A t'o kɛ kɛlɛkɛminanw barika la, nga a b'o latigɛ k'o kɛ dɔrɔn. 22Zuda tun be Ala dalili, ko: «Matigi, e y'i ka mɛlɛkɛ ci Zude mara masacɛ Ezekiyasi ka tile la, a ye Senakeribu ka kɛlɛdenw mɔgɔ waa kɛmɛ ni bi seegi ni duuru (185 000) halaki. 23Sankolo kuntigi, mɛlɛkɛɲuman ci an ɲa sisan fana, a ka siranya bila u la kosɔbɛ k'u hakili wili. 24E k'i bolo barikaman kɛ ka mɔgɔ nunu bugɔ, minw nana i tɔgɔ cɛn k'i ka jama kɛlɛ!» Zuda tilar'a ka dalili la ten.

25Nikanɔri ka kɛlɛdenw tora ka gwɛrɛ n'u be buruw fiyɛra, ani ka kɛlɛkɛdɔnkiliw la, 26Zuda ka mɔgɔw ye kɛlɛ daminɛ n'u be Ala dalila ka dɛmɛ ɲini a fɛ. 27U be kɛlɛ kɛra n'u bolow ye, ka to ka Ala dali u dusu la. U ye mɔgɔ waa bi saba ni duuru (35 000) ɲɔgɔn faga. Ala ka sebagaya min yera ten, o y'u nisɔndiya kosɔbɛ. 28Kɛlɛ bannin kɔ, u tun be bɔra kɛlɛ yɔrɔ la ni nisɔndiya ye tuma min na, u ye Nikanɔri suu ye duguma, n'a ka yɛrɛtangafɛnw b'a la. 29U ye mankanba kɛ, ka ɲagami ɲɔgɔn na. U tora ka Setigi tanu u faaw ka kaan na.

30Zuda, min tun be kɔn k'a yɛrɛ bɛɛ di a ka siya kosɔn, ale min y'a ka jamanadenw koo diy'a a yɛrɛ ye kabin'a denmisɛnman, ale ko u ka Nikanɔri kuun tigɛ, k'a bolo fana tigɛ a gaman yɔrɔ la ka taga n'u ye Zeruzalɛmu. 31Ale yɛrɛ tagara yen, k'a fasodenw wele ka sarakalasebagaw bila sarakabɔyɔrɔ ɲafɛ, ani ka mɔgɔw ci ka taga dugu yɔrɔ barikaman kɔnɔ mɔgɔw wele. 32A ye Nikanɔri mɔgɔjugu nin kungolo yira u la, k'o mɔgɔkuntan nin bolo yira fana. A tun ye min sin Setigi Ala ka boon ma ni yɛrɛboɲa ye. 33A ye Nikanɔri Alaɲasiranbali nɛnkun tigɛ k'a fɔ ko u k'a tigɛtigɛ k'a di kɔnɔw ma, k'a bolo dulon Setigi batoso ɲafɛ k'a ka nalomanya tɔnɔ yira. 34O la, bɛɛ y'u ɲaa kɔrɔta sanfɛ ka Matigi, Setigi fo ko: «Barika ka la Ala ye, min y'a batoso tanga, a ma se ka nɔgɔ!»

35Zuda ye Nikanɔri kungolo dulon yɔrɔ barikaman nin kogo la k'a kɛ taamasiɲɛ gwɛnin ye, bɛɛ ka se k'a ye ko Matigi tun y'u dɛmɛ. 36Jama bɛnn'a la k'a latigɛ ɲɔgɔn fɛ k'o loon nin ka kan ka to u hakili la k'a ɲanagwɛ kɛ saan kalo tan ni filanan tile tan ni saba loon na. Min ye *Adari kalo ye aramekan na, n'o ye Maridose ka loon ɲasigi ye.

Sɛbɛnnikɛla ka kuma laban

37Ayiwa, Nikanɔri ka koo kɛra ten le. Kabini o waati la, Zeruzalɛmu dugu tora eburuw bolo. O la, ne fana bena n ka sɛbɛ ban yan. 38N'a labɛncogo ɲana, n'a koo diyara i ye, o le ye n ka laɲini ye. Ni nafa dɔɔni dɔrɔn le b'a la, n'a ma labɛn ka ɲa kosɔbɛ, ne kɔni ye n seko le kɛ. 39A ma ɲi mɔgɔ fɛ ka duvɛn jalan dama kɛ i ka minnifɛn ye, walima jii dama. Nga ka jii ni duvɛn ɲagami, o ye minnifɛn diman ye! O cogo la fana, ni bataki nin sɛbɛnna ka ɲa, a b'a mɛnbagaw, walima a kalanbagaw nisɔndiya. O la, ne fana bena lɔ yan.

ALA KA KUMA

© 2008 Alliance Biblique du Burkina Faso

More Info | Version Index