Search form

MAKABEW FILANAN 5

Kɛlɛ nata taamasiɲɛ

1Antiyokusi tora k'a yɛrɛ labɛn ka taga Ezipiti jamana kɛlɛ kama a siɲɛ filanan na o waati la. 2Zeruzalɛmu dugu yɔrɔ bɛɛ kɛra kɛlɛden sotigiw ye ka to ka tɛmɛtɛmɛ sanfɛ tile bi naani ɲɔgɔn. Sanu tun be u kannafaniw na, taman tun be u dɔw bolo. 3Sotigi wɛrɛ minw labɛnnin lo kɛlɛ kama, olu fana tun be yen. U tora ka ɲɔgɔn kɛlɛ. Nigɛkunbɛnnanw bɛ fifara, taman caaman, murujanjanw bɔra u forokow kɔnɔ, biɲɛw be bonna, kɛlɛkɛminan sanulamanw tora ka manamanana, ni nigɛduloki sifa bɛɛ. 4Bɛɛ tun be Ala daalila k'o fɛɛn yenin nunu ka kɛ taamasiɲɛ ɲanaman ye.

Zasɔn be Zeruzalɛmu kɛlɛ

5Kibaruya dɔ tun be fɔra ko Antiyokusi sara. K'a sɔrɔ tiɲɛ tun tɛ. O la sa, Zasɔn wilila ka kɛlɛden mɔgɔ waa kelen ɲɔgɔn minɛ ka na cun dugu kan. U donna fanga na ni kogo ye, a laban, u ye dugu minɛ. Menelasi bolila ka taga dogo yɔrɔ barikaman na. 6Zasɔn y'a daminɛ k'a fadenw halaki hali a ma hinɛ. A m'a lɔn ko k'i ka siya kɛlɛ ka se u kɔrɔ, k'o ye cɛnniba ye. A be miiri ko ale ser'a juguw le kɔrɔ, k'a sɔrɔ a badenw lo. 7O bɛɛ n'a ta, a ma se ka fanga sɔrɔ, a ye maloya le sɔrɔ a ka janfa kosɔn. O kɔ, a bolila ka ta'a dogoyɔrɔ la amoniw ka mara la. 8A ka juguya nana laban ni nimisa ye. Arabuw ka masacɛ fariman min tɔgɔ ko Aretasi, ale kɔnna k'a minɛ k'a datugu. O kɔ, a bolila ka dugu ni dugu sɛgɛrɛ, u tun b'a gwɛnna yɔrɔ bɛɛ. A koo goyara bari a ye janfa kɛ sariyaw koo faan fɛ, k'a yɛrɛ kɛ a badenw fagabaga ye a faso la. A ka koo tagara laban Ezipiti jamana na. 9A tagara Lasedemone mara la. A tun be miiri ko ale bena sigi Siparitakaw fɛ bari u bɛɛ ye buruju kelen ye. Ale Zasɔn min kɛra sababu ye ka mɔgɔ caaman bɔ u faso la, a sara jamana wɛrɛ la. 10Ale min sababu la mɔgɔ caaman sara n'u suu ma don, mɔgɔ si ma kasi a sako la, mɔgɔ si m'a sanga kɛ, a ma layɔrɔ sɔrɔ a faaw kaburu la.

Antiyokusi be na cɛnni kɛ Zeruzalɛmu

11Masacɛ Antiyokusi bɔra o koow kala ma tuma min na, a miirila ko Zude mara bɛɛ le murutira. O la, a bɔra Ezipiti n'a ka kɛlɛdenw ye ka na Zeruzalɛmu. A dimininba i n'a fɔ sogojugu, a nana dugu minɛ. 12A ye sira di a ka kɛlɛdenw ma ko n'u ye mɔgɔ o mɔgɔ sɔrɔ, k'u k'a faga hali u kana hinɛ. Ko ni minw dogora boonw kɔnɔ, k'u ka olu kaan tigɛ. 13U ye kanbelen ni cɛkɔrɔbaw faga, ka muso ni denmisɛnw halaki. U ye sunguruw ni denɲɛninw kaan tigɛ. 14Kɛlɛ ye mɔgɔ waa bi seegi (80 000) bɔ Zeruzalɛmukaw la tile saba kɔnɔ. U ye minw bugɔ ka faga, olu tun ye mɔgɔ waa bi naani (40 000) ye. O ɲɔgɔn fana minɛna ka taga jɔnya la.

Alabatosoba nafolo bɔsiko

15O bɛɛ n'a ta, Antiyokusi ma wasa, a sɔnna ka don Alabatosoba kɔnɔ, min jatinin be ka tɛmɛ diɲɛ kɔnɔ batokɛyɔrɔw bɛɛ kan. Menelasi min ye sariyaw cɛn, k'a faso janfa, o le tun bilanin be a ɲafɛ. 16A ye Alabatosoba minanw ta n'a bolo nɔgɔninw ye, ani masa tɔw tun nana boɲafɛn minw di, waasa ka boɲa ni karama la Alabatosoba nin kan k'a ka koow sabati. 17Antiyokusi y'a yɛrɛ boɲa! A m'a lɔn ko dugumɔgɔw ka hakɛ kama lo Setigi dimina waati kunkurunnin kɔnɔ a ka mɔgɔw kɔrɔ. O la, a m'a batoso nin tanga. 18N'u ka hakɛ cayako tun tɛ, Antiyokusi setɔ, Matigi tun bena ale fana bugɔ, a k'a ka nalomanya nin dabila i n'a fɔ Eliwodɔri. Masacɛ Selekusi tun ye min ci waasa ka na Alabatosoba nafolo jati minɛ. 19Matigi m'a ka jama woloma Alabatosoba kama, a ka soo le lɔr'a ka jama kama. 20O le y'a to soo nin ye niyɔrɔ sɔrɔ jama ka bɔnɛ na, nga o kɔfɛ, olu ye hɛrɛ sɔrɔ tuma min na, soo nin fana ye hɛrɛ sɔrɔ. Setigi Ala dimina ka soo nin to yen, nga a ni jama nana bɛɛn tuma min na, soo nin ka dawula bɛɛ segir'a ma.

Zeruzalɛmukaw fagako filanan

21Antiyokusi ye warigwɛ kilo waa bi naani ni seegi (48 000) le ta Alabatosoba kɔnɔ, ka taga joona joona Antiyɔsi. Yɛrɛboɲa tun b'a la kosɔbɛ. A lanin tun b'a yɛrɛ la haali! A ka miiri la, ko ale yɛrɛ be se ka kurun boli dugukolo kan, ani ka taama jii kan. 22Antiyokusi taatɔ, a ye mɔgɔ dɔw to a kɔfɛ waasa ka zuwifuw tɔɔrɔ. A ye min bila Zeruzalɛmu, o tun ye Firizi mara mɔgɔ dɔ ye min tɔgɔ ko Filipu. A tun ka jugu ka tɛmɛ a sigibaga Antiyokusi yɛrɛ kan. 23Andoroniki bilara Garizimu kulu kan, ka Menelasi fara olu kan. Ale min tun be to ka wili ni juguya ye a fadenw kama ka tɛmɛ tɔw kan.

Zuwifuw koo goyara Antiyokusi ye haali, 24fɔɔ a ye Misi mara kɛlɛkuntigi Apoloniyusi bila ka na Zeruzalɛmu ni kɛlɛden waa mugan ni fila (22 000) ye, ka sira di ko ka cɛɛw bɛɛ faga, ka musow ni denmisɛnw feere. 25A sera Zeruzalɛmu tuma min na, a y'a yɛrɛ kɛ mɔgɔɲuman ye. A ye zuwifuw ka lafiɲɛlon kɔnɔ, u te baara kɛ lonba min na, k'a fɔ a ka kɛlɛbolo ye ko kɛlɛdenw ka taama be yen. 26Mɔgɔ minw bɛɛ bɔra ka taga u filɛ, u ye olu halaki, ale n'a ka kɛlɛdenw girinna ka don dugu kɔnɔ n'u ka kɛlɛkɛminanw ye. U ye mɔgɔ caaman faga.

27Zuda Makabe ni mɔgɔ tan ɲɔgɔn bolila ka taga to kongokolon kɔnɔ. Ale n'a tɔɲɔgɔnw tora yen i n'a fɔ kongosogow, kuluw kan, ka to ka furaburu dɔrɔn ɲimi janko u kana u yɛrɛ nɔgɔ.

ALA KA KUMA

© 2008 Alliance Biblique du Burkina Faso

More Info | Version Index