Search form

MAKABEW FILANAN 7

Balima wolonwula be faga

1Waati dɔ la, u ye balima wolonwula dɔw n'u bamuso minɛ. Masacɛ tun b'a fɛ k'u wajibiya ka lɛsogo ɲimi, min ye tanafɛn ye sariya kɔnɔ. A y'u bugɔ ni busan ni misi fasajuruw ye janko o ka se ka kɛ. 2U dɔ ye kuma ta bɛɛ tɔgɔ la k'a fɔ ko: «I b'a fɛ k'an ɲininga mun la? I b'a fɛ ka mun lɔn? An labɛnnin lo ka sa, o ka fisa an ma ni an faaw ka sariyaw cɛnko ye.» 3Masacɛ dimina kosɔbɛ, a ye tangow ni dagaw sigi tasuma kan. 4U gwanna kosɔbɛ tuma min na, a ko mɔgɔ min kumana bɛɛ tɔgɔ la, k'u k'ale nɛɛn tigɛ, k'a kuun golo bɔ, ani k'a tigɛw n'a sentigɛw tigɛ a balimaw n'a bamuso ɲana. 5U y'a bolo ni seenw tigɛ ka ban tuma min na, masacɛ ko u k'a gwɛrɛ tasuma na, k'a ɲanaman don tango kɔnɔ. A sisi tun be wilila tanko sanfɛ tuma min na, a balimaw n'u bamuso tun be ɲɔgɔn ladila ko u ka sa ni jagwɛlɛya ye. U tun b'a fɔra ko: 6- «Matigi Ala be yeli kɛra, siga t'a la, a bena makari an na i ko Musa y'a fɔ dɔnkili la cogo min na ko: ‹Matigi bena makari a ka jɔɔnw na.› »

7U fɔlɔ sara ten tuma min na, u nana ni filanan ye halakiyɔrɔ la. U y'a kunsigi bɔnbɔn, k'a kuun golo bɔ, ka sɔrɔ k'a ɲininga ko: «I tena sɔn ka lɛsogo ɲimi yan n'i fari bɛɛ be tigɛtigɛ ka bɔ ɲɔgɔn na wa?» 8Nga a y'u jaabi a faaw ka kaan na ko: «Ayi!» O le kosɔn, u ye dɔ nin tɔɔrɔ cogo min na, u y'ale fana tɔɔrɔ o cogo kelen na. 9Yanni a nii be bɔ, a y'a fɔ ko: «E mɔgɔjugu nin! E b'an nii bɔ diɲɛ nin na bii, nga diɲɛ Masa bena an kunun an be to hɛrɛ la kudayi, bari an be sa a ka sariyaw le kosɔn.»

10Ale kɔ, u y'o tɔɔrɔ ɲɔgɔn la sabanan kan. U y'a fɔ ko a k'a nɛnkun bɔ dɔrɔn, a y'o kɛ, k'a bolow jan, a ma yɛrɛyɛrɛ. 11A ye kuma nin fɔ ni jagwɛlɛya ye ko: «Sankolotigi le ye n fari di n ma. N t'o jati fɛɛn ye ale ka sariyaw kosɔn, ne lanin b'a la ko a ben'a segi n ma tugu.» 12Masacɛ yɛrɛ ni mɔgɔ minw tun b'a laminina, olu kabakoyara kanbelen nin ka jagwɛlɛya la, min tun t'a ka tɔɔrɔ nunu jati. 13Ale sara tuma min na, u ye tɔɔrɔjugu nin ɲɔgɔn la naaninan kan o cogo kelen na. 14Ale tun be ɲini ka sa tuma min na, a ko: «Ka sa adamadenw bolo, n'i jigi be Ala kan ko a bena i kunun ka kɛɲɛ n'a ka layidu taninw ye, o ka ɲi. Ele kɔni, n'i sara tuma min na, i tena kunun tugu.» 15O kɔ, u nana n'u duurunan ye k'a tɔɔrɔ. 16Ale y'a ɲaa basa masacɛ la k'a fɔ a ye ko: «See b'i ye k'i sago kɛ adamadenw cɛma, k'a sɔrɔ i fana bena sa i n'a fɔ olu. Nga i kana miiri ko Ala y'an ka siya fili. 17E ka kɔnɔni kɛ, i ben'a ka sebagayaba ye, a bena ele n'i kɔmɔgɔw tɔɔrɔ cogo min na.» 18Ale kɔ, u nana ni wɔɔrɔnan ye. Ale tun be ɲini ka sa tuma min na, a ko: «Kana i yɛrɛ nigɛ dɛ! Anw ka tɔɔrɔ nin ye anw yɛrɛ nɔɔ ye. Bari, an ye an ka Ala hakɛ ta. O la, bɔnɛ kabakomanw y'an sɔrɔ. 19Nga e kana miiri ko i bena to ɲasuma na, e min y'i jaa gwɛlɛya ka Ala yɛrɛ kɛlɛ!»

20Deen nunu bamuso ɲɔgɔn tun te yen, o la, mɔgɔ man kan ka ɲinɛ a kɔ. Tile kelen kɔnɔ, a y'a dencɛ wolonwula satɔ ye, a y'o muɲu ni hakilisigi ye, bari a jigi tun be Matigi kan. 21A tun be to k'u kelen kelen bɛɛ jaa gwɛlɛya u faaw ka kaan na. Bamuso hinɛ tun b'a dusu la, nga a jaa tun ka gwɛlɛ i n'a fɔ cɛɛ. A tun b'a fɔra u ye ko: 22«Aw sɔrɔla ne kɔnɔ cogo min na, ne t'o lɔn. Min ye nii di aw ma ka ninakili see kɛ aw ye, o te ne ye. Min y'aw kelen kelen bɛɛ fari labɛn u cogo la, o fana te ne ye. 23Diɲɛ Danbaga be koo bɛɛ daminɛ na, ale lo be mɔgɔ labɛn kabini a kɔnɔ tatuma na. Ale lo bena makari aw la k'aw nii segi aw ma, aw ka se ka kunun, bari aw b'aw yɛrɛ sarakala sisan a ka sariyaw kanuya kosɔn.»

24Antiyokusi tun be miiri ko muso nin b'a dɔgɔyara, ko a ka kuma ye nɛnili ye. Denlaban tun be nii na halibi. Antiyokusi tora ka kuma ale fɛ, a tun b'a fɛ k'a kuun yɛlɛma ni kuma dimanw ye. A kalila fana k'a fɔ ko n'a sɔnna k'a faaw ka landa dabila, ko a ben'a kɛ nafolotigi ni mɔgɔ dagamunin ye, k'a kɛ masacɛ ka mɔgɔsɔbɛw dɔ ye, ani ka lɔyɔrɔba d'a ma. 25Nga kanbelen nin m'a ka kuma jati hali dɔɔni. O la, masacɛ ko bamuso ka gwɛrɛ, a ye ale nigɛnigɛ ko a k'a deen nin ladi ko a k'a nii kisi. 26A kumana n'a ye waatijan kɔnɔ, muso nin tilara ka sɔn ko a bena kuma a dencɛ fɛ. 27O la, a jɛngɛnn'a faan fɛ, ka masacɛjugu nin namara. A y'a fɔ a deen ye a faaw ka kaan na ko: «N deen, makari ne la, ne min lɔra n'i kɔnɔ ye kalo kɔnɔntɔn kɔnɔ, ka siin d'i ma saan saba kɔnɔ. Ne ye n janto i la, k'i balo, k'i ladon fɔɔ ka na se sisan ma. 28N deen, ne b'i dali, sankolo ni dugukolo filɛ, ka miiri u kɔnɔnafɛnw bɛɛ la, k'a lɔn ko Ala ma o dan ni fɛɛn wɛrɛ ye, a ye adamadenw fana dan o cogo kelen na. 29Kana siran mɔgɔfagala nin ɲa. A yira ko i ka kan n'i balimaw ye, ka sɔn saya ma janko suuw kununwaati la, ne k'i ye tugu n'i balimaw ye.»

30A tilara kuma na dɔrɔn, kanbelen nin y'a fɔ ko: «Aw be mun le kɔnɔna? Ne te masacɛ ka fɔtaw bato, ne be sariya ka fɔtaw le bato, Ala ye min di an faaw ma Musa barika la. 31Ele masacɛ min ye an eburuw ka bɔnɛ bɛɛ dabɔ, i tena se ka bɔsi Ala bolo! 32Ni an tɔw be tɔɔrɔ, o be kɛ an yɛrɛ ka hakɛ kosɔn. 33An Matigi, Ala dimina anw kɔrɔ waati dɔɔni kɔnɔ janko k'an ɲaa gwan k'an kolo. O kɔ, a bena bɛn n'an ye tugu, an minw ye a ka baarakɛlaw ye. 34Nga ele mɔgɔjugu, e min ka jugu ni mɔgɔ bɛɛ ye, kan'i yɛrɛ boɲa gwansan ka wili Matigi ka baarakɛlaw kama! Kan'i yɛrɛ nigɛ n'i kɔnɔnako fufafu ye! 35Bari Setigi Ala ɲaa be koo bɛɛ la, e ma bɔ a ka kiti la fɔlɔ. 36Ne balimaw ye tɔɔrɔ tɛmɛta muɲu sisan, waasa ka nii banbali sɔrɔ. U sara Ala ka bɛɛn kosɔn, k'a sɔrɔ ele ɲaa bena gwan Ala ka kiti yɔrɔ la, min bɛnnin lo i ka yɛrɛboɲa kosɔn. 37Ne kɔni, ne labɛnnin lo ka n fari ni n nii di n faaw ka sariyaw kosɔn i n'a fɔ n balimaw. Ne be Ala dali ko a ka makari an ka siya la joona, a k'i tɔɔrɔ janko i ka sɔn k'a fɔ ko ale kelenpe le ye Ala ye. 38Ne b'a ɲini a fɛ fana ko ale Setigi dimina an ka siya kɔrɔ cogo min na, ni tiɲɛ b'a fɛ ka dimi, ne ni n balimaw ka fagali ka kɛ o dimi laban ye.»

39Ɲadonyakuma nin tun digira masacɛ la kosɔbɛ. A dimininba ye kanbelen laban nin ka tɔɔrɔ juguya ka tɛmɛ tɔ nunu ta kan. 40O bɛɛ n'a ta, kanbelen nin kɛra kantigi ye fɔɔ saya la, a jigi tun be Matigi kan kosɔbɛ. 41A laban, u ye bamusoman faga a dencɛ nunu bɛɛ kɔ. 42Min ye landadumuni koo ni tɔɔrɔjugu ye, an bena olu dabila yan.

ALA KA KUMA

© 2008 Alliance Biblique du Burkina Faso

More Info | Version Index