Search form

MAKABEW FILANAN 8

Zuda Makabe ka murutiko

1Zuda Makabe n'a tɔɲɔgɔnw tun be duguw munumunu dogo la k'u balima zuwifuw wele ka na u fɛ, minw tun ma zuwifuw ka landaw dabila. U sera ka mɔgɔ waa wɔɔrɔ (6 000) ɲɔgɔn lajɛn olu la. 2U tun be Matigi dali ko a k'a ka jama dɛmɛ, bari mɔgɔw bɛɛ be olu sigɛnna, ko a ka makari Alabatosoba la, Alaɲasiranbaliw ye min nɔgɔ. 3Ko dugu nin hinɛ ka don a la, u ye min cɛn n'u b'a fɛ k'a ci pepewu, ko u ye mɔgɔ minw faga ni u be kulera, ko a k'u mɔnɛ bɔ. 4Ko u ye denmisɛnw faga gwansan juguya kama, a k'a hakili to o la, ko a k'a dimi bɔ a tɔgɔ cɛnbagaw la. 5Makabe kɛra kɛlɛbolo kunna dɔrɔn, a ye see sɔrɔ. Siya wɛrɛw si tun te ser'a kɔrɔ. Bari Matigi y'a ka dimi yɛlɛma k'a kɛ dususuma ye a ka jama kɔrɔ. 6A tun be bari dugubabaw ni dugudenninw na ka ben u kan, k'u jɛni, ka yɔrɔɲumanw minɛ k'u kɛ a ta ye, k'a jugu caaman gwɛn. 7A tun be to ka kɛlɛ nunu kɛ sufɛ le, o tun b'a dɛmɛ. A tɔgɔ bɔra yɔrɔ bɛɛ a ka jagwɛlɛya kosɔn.

Nikanɔri ni Gɔriziyasi ka kɛlɛ

(Mak fɔlɔ 3.38—4.27)

8Filipu y'a ye ko Zuda be barika sɔrɔla dɔɔni dɔɔni, ka see sɔrɔ kɛlɛ caaman na minkɛ, a ye sɛbɛ ci Potoleme ma, min tun ye kɛlɛkuntigi ye Siriba ni Fenisi maraw la, ko u ka na ni dɛmɛ ye masacɛ ka koɲaw la. 9O yɔrɔnin kelen, Potoleme ye Patirokile dencɛ Nikanɔri woloma, min tun ye masacɛ ka mɔgɔsɔbɛ tigitigiw dɔ ye, k'a ci ni kɛlɛden mɔgɔ waa mugan (20 000) ɲɔgɔn ye ka bɔ siyaw bɛɛ la, janko a ka taga zuwifuw bɛɛ faga. A ye kɛlɛkuntigi Gɔriziyasi fara a kan, ale tun be kɛlɛ koɲa lɔn kosɔbɛ.

10Masacɛ tun ka kan ka bolomafara warigwɛ tɔni bi duuru ni naani di Ɔrɔmukaw ma. Nikanɔri tun y'a laɲini ko ni zuwifu minw minɛna, a b'u feere k'o sara. 11A ye ci bila kɔgɔjida la duguw ma teliya la k'u wele ko u ka na zuwifuw san, olu bena minw minɛ. A y'a daa d'u ma ko a bena mɔgɔ bi kɔnɔntɔn di warigwɛ kilo mugan ni wolonwula la. A tun ma miiri ko Setigi Ala ben'a ɲaa gwan kosɔbɛ o kosɔn.

12Zuda nan'a mɛn ko Nikanɔri be gwɛrɛla. A y'a fɔ a ka mɔgɔw ye tuma min na ko yanni dɔɔni u juguw ka kɛlɛdenw bena se, 13siranbagatɔw ni minw tun te l'a la kosɔbɛ ko Ala tilennin lo, olu ye boli ta ka taga yɔrɔjan. 14Bololafɛn min tora dɔw fɛ, olu y'o bɛɛ feere, ani ka Matigi dali ko a k'u bɔsi Nikanɔri Alaɲasiranbali nin na, min y'u feere ka ban k'a sɔrɔ kɛlɛ yɛrɛ ma daminɛ fɔlɔ. 15Ko hali n'a t'a fɛ k'u kisi olu yɛrɛ kosɔn, a ka sɔn k'u kisi bɛɛn kosɔn, a ye minw kɛ n'u faaw ye, ani bari a tɔgɔba n'a tɔgɔɲuman le lanin be olu kan. 16Makabe y'a ka mɔgɔw lajɛn, u sera mɔgɔ waa wɔɔrɔ (6 000) ma. A y'u ladi ko u kana siran u juguw ɲa, ko u kana hami Alaɲasiranbali nunu ka caya kosɔn, minw b'u kɛlɛ gwansan. Ko u ka kɛlɛ kɛ ni jagwɛlɛya ye, 17k'u hakili to u juguw ka cɛnnijugu la Alabatosoba kɔnɔ, ani u ye koo min kɛ dugu nin na k'u dɔgɔya, ani u y'u wajibiya cogo min na u ka landaw ka dabila. 18A y'a fɔ tugu ko: «Olu jigi b'u ka kɛlɛkɛminanw n'u ka jagwɛlɛya le kan. Anw kɔni b'an jigi la Setigi Ala le kan, min be se k'an kɛlɛbagaw halaki, ani diɲɛ bɛɛ, ɲatugu n'a yɛlɛ.» 19Ala tun y'u bɛmaw mara waati minw na, a y'o fana lakali u ye, i n'a fɔ Senakeribu ka tile la, mɔgɔ waa kɛmɛ ni bi seegi ni duuru (185 000) sara. 20U tun be Galatikaw kɛlɛra Babilɔni jamana na tuma min na, zuwifu mɔgɔ waa seegi (8 000) dɔrɔn tun be kɛlɛ kɛra, Maseduwanika mɔgɔ waa naani (4 000) farala u kan. Maseduwanikaw tun ye gwɛlɛya sɔrɔ, zuwifu mɔgɔ waa seegi nunu y'u jugu mɔgɔ waa kɛmɛ ni mugan (120 000) halaki bari Sankolotigi y'u dɛmɛ, u ye minan caaman bɔsi u juguw bolo.

21A y'a ka kɛlɛdenw jaa gwɛlɛya n'o kuma nunu ye ka ban, k'a kɛ u sɔnna saya ma Ala ka sariyaw n'u faso kama tuma min na, a y'u tilan jɛnkulu naani, 22k'a balima Simɔn, ni Yusufu, ani Zonatan bila jɛnkulu nunu kunna, ka fara ale yɛrɛ kan. Jɛnkulu kelen kelen bɛɛ tun ye mɔgɔ waa kelen ni kɛmɛ duuru duuru (1 500) ye. 23A y'a fɔ Ɛsidiriyasi ye ko a ka Ala ka kumad kalan. O kɔ, a ye kumaba fɔ ko «Ala k'an dɛmɛ.» O fɔnin kɔ, ale yɛrɛ bilara kɛlɛbolo fɔlɔ kunna ka taga Nikanɔri kɛlɛ. 24Setigi Ala tun be ni zuwifuw ye, u y'u jugu minw faga, u tun ka ca ni mɔgɔ waa kɔnɔntɔn (9 000) ye. U ye Nikanɔri ka kɛlɛdenw caaman mandimi k'u halaki k'u bɛɛ gwɛn. 25Mɔgɔ minw tun nana janko k'u san k'u kɛ jɔɔnw ye, u ye olu ka wari minɛ, k'u juguw gwɛn fɔɔ yɔrɔjan, nga tile tun banna minkɛ, u kɔsegira u nɔɔ na, 26bari lafiɲɛlon tun bena daminɛ tile bentuma na. O kosɔn, u ma se k'u gwɛn ka taga ɲa, u y'o dabila. 27U y'u juguw ka kɛlɛkɛminanw cɛ tuma min na, ani fɛɛn minw sɔrɔla u suuw kan, k'o ta, u y'a daminɛ ka lafiɲɛlon bato. U ye Matigi fo kosɔbɛ, k'a tanu, bari a tun sɔnna ka makari u la tugu o loon nin na, k'a ka ɲumanya kɛ u ye. 28Lafiɲɛlon tɛmɛnin kɔ, u tun ye fɛɛn minw sɔrɔ u juguw fɛ, u y'o dɔw tilan u juguw tɔɔrɔbagaw cɛ. U ye dɔw di firiyamusow ni falatɔw ma, k'a tɔɔ tilan u ni ɲɔgɔn cɛ, n'u ka denmisɛnw. 29O kɛnin kɔ, u bɛɛ jɛnna ka Matigi dali, k'a ɲini ale Makaritigi fɛ ko a ka bɛn n'a ka baarakɛlaw ye kudayi.

Zuda be se Timote ni Bakidɛsi kɔrɔ

30Zuda nunu tagara kɛlɛ kɛ ni Timote ni Bakidɛsi ka kɛlɛdenw ye. U ye mɔgɔ minw faga o kɛlɛ yɔrɔw la, o tun ka ca ni mɔgɔ waa mugan (20 000) ye. Kɛlɛdenw ka sigiyɔrɔ minw lamininin be ni kogojanw ye, u ye olu minɛ. U tun ye nafolo caaman min sɔrɔ u juguw fɛ, u y'o tilan fila, kelen kɛra u yɛrɛ ta ye, kelen kɛra tɔɔrɔbagaw, ni falatɔw ani firiyamusow, ani mɔgɔkɔrɔbaw ta ye. 31U y'u juguw ka kɛlɛkɛminanw cɛ ni hakilisigi ye, k'u bila yɔrɔɲumanw na. U ye fɛɛn wɛrɛw fana cɛ ka taga n'o ye Zeruzalɛmu. 32Kɛlɛden minw tun bɛnna ni Timote ye, u y'olu kuntigi faga, o cɛjugu nin tun ye kojugu caaman kɛ zuwifuw la. 33Mɔgɔ minw tun ye Alabatosoba koonw jɛni, u ye olu jɛni u ka sesɔrɔɲanagwɛw kɛwaati la Zeruzalɛmu. Kalisitɛni min tun dogora bondennin dɔ kɔnɔ, u y'o ɲɔgɔn kɛ ale la fana. O la, u y'u ka kojugu sara sɔrɔ min bɛnna u ka kɛwali ma.

Nikanɔri ka boli

34Nikanɔri, mɔgɔjugu dafanin, min tun nana ni jagokɛla mɔgɔ waa kelen ye janko ka zuwifuw feere, 35a tun be mɔgɔ minw dɔgɔya kosɔbɛ, olu ser'a kɔrɔ Matigi ka dɛmɛ barika la. A y'a ka kɛlɛkɛfani ɲanaman bɔ a kaan na ka boli ka forow cɛtigɛ i n'a fɔ jɔɔn bolibagatɔ. Bɛɛ y'a to, a tagar'a kelen ka taga se Antiyɔsi. A ka kɛlɛdenw tun halakira ka ban, ale kɔni kunna diyara kosɔbɛ. 36Ale min tun y'a daa di Ɔrɔmukaw ma ko a bena Zeruzalɛmukaw minɛ k'u feere, k'u sɔngɔ kɛ k'a ka juru sara, ale lo y'a fɔ ko mɔgɔ si te se zuwifuw kɔrɔ, ko marabaga b'u la, bari u b'a ka sariyaw bato a tun ye minw d'u ma.

ALA KA KUMA

© 2008 Alliance Biblique du Burkina Faso

More Info | Version Index