Search form

MAKABEW FILANAN 9

Antiyokusi Epifani labanko

(Mak fɔlɔ 6.1-17; Mak 2nan 1.11-17)

1O waati la, Antiyokusi tun segira ka bɔ Pɛrɛsi maraw la ni dɔgɔya ye. 2A tun donna dugu dɔ kɔnɔ min tɔgɔ ko Pɛrisepolisi, k'a daminɛ k'o dugu minɛ, k'u ka batoliso kɔnɔ fɛɛnw ta. Nga dugumɔgɔw murutira ka kɛlɛkɛminanw ta. Jamana mɔgɔw ye Antiyokusi gwɛn. A kɛra ten, a wajibiyara ka boli maloya la. 3A tun sera Ɛkibatani gɛrɛfɛ tuma min na, fɛɛn min tun ye Nikanɔri ni Timote ka mɔgɔw sɔrɔ, a y'o mɛn. 4A dimininba a gwɛnko la Pɛrɛsi jamana na, a y'a fɔ ko ale ye dɔgɔya min sɔrɔ pɛrɛsiw fɛ, ko fɔɔ ale k'o juru sara zuwifuw la. O la, a y'a fɔ a ka wotoro bolibaga ye ko a ka taga ɲa, ko a kana lɔ fɔɔ n'u sera u taayɔrɔ la. A y'a fɔ a ka yɛrɛboɲa kɔnɔ ko: «Ni ne sera Zeruzalɛmu tuma min na, ne bena zuwifuw ka forobakaburu bɔ o yɔrɔ la!»

A tun m'a lɔn ko Sankolotigi Ala ka kiti b'a kɔnɔna. 5Nga Matigi min be fɛɛn bɛɛ ye, Isirayɛli ka Ala, ale ye jolijugu bila a la, min te se ka filɛ, a fana te se ka furakɛ. A ye kuma nin fɔ ka ban dɔrɔn, a kɔnɔ daminɛna ka dimi kosɔbɛ, fura te min na, o y'a sɛgɛn kosɔbɛ. 6O tun ka kan n'a ye kosɔbɛ, bari a tun ye mɔgɔ wɛrɛw tɔɔrɔ ni tɔɔrɔ jugu caaman ye! 7Nga a ka yɛrɛboɲa ma nɔgɔya hali dɔɔni, a tora o la halibi. A dimininba zuwifuw kama, a ko u ka dɔ fara u ka taama kan. A ka wotoro tun be bolila minkɛ ni mankanba ye, yɔrɔnin kelen, a bɔr'a kɔnɔ ka ben ka kolonkolon benkojugu nin fɛ, a kolow bɛɛ fɔnna ɲɔgɔn kɔ. 8A lara tɛtɛtɛ. Ale min tun be miiri ko ale te adamaden gwansan ye, ko ale be se k'a kɛ jikuruw be sɔn ale ka fɔta ma a ka yɛrɛboɲa kosɔn, ko a be se ka kulubabaw ka gwiliya suma. U y'a ta jɔɔ le kɔnɔ ka taga n'a ye. Ala ka setigiya yera ka ɲa bɛɛ fɛ o seen fɛ. 9Alaɲasiranbali nin tun be nii na halibi, nga a tɔɔrɔnin tun lo kojugu. A farikolo tun be bɔbɔra ɲɔgɔn na dimikojugu fɛ, tumu caaman tun be a ɲaa na. Kasa goman tun be bɔr'a fari yɔrɔ tolininw na, fɔɔ kɛlɛdenw bɛɛ tun b'a fɛ ka fɔɔnɔ. 10Ale min tun be miiri ko a bolo be se ka maga lolow la, a ma mɛn, mɔgɔ si tun te se ka gwɛrɛ a la k'a ta ka taga n'a ye kasa goman nin kosɔn.

11A barika bannin kɔ, a laban na, a y'a daminɛ ka yɛrɛboɲakojugu nin dabila, ani k'a yɛrɛ cogoya lɔn, k'a lɔn fana ko ale be tɔɔrɔba min na, k'o ye Ala bulonɔ ye. 12Kasa min tun be bɔr'a la, ale yɛrɛ tun te sera k'o muɲu minkɛ, a y'a fɔ ko: «A bɛnnin lo adamaden fɛɛn gwansan ka kolo Ala ye, a man kan k'a yɛrɛ kɛɲɛ ni Ala ye.» 13Mɔgɔjugu nin ka dalili tun be donna Matigi min tulo la, o tun man kan ka makari a la tugu. 14A y'a daa di ko a bena Ala ka dugu nin to hɛrɛ la, a tun be teliyara ka taga min halaki pewu, k'a kɛ forobakaburu ye. 15Ko ale tun y'a latigɛ ko ale bena zuwifu nunu kɛ kɔnɔw ka dumuni ye, walima k'u fili kongosogow ye, olu n'u ka denmisɛnw, bari u man kan ni sudon yɛrɛ ye. Ko nga sisan a bena olu ni Atɛnikaw minɛ cogo kelen na. 16A ko ale bena fɛɛn ɲanamanw di ka Alabatosoba fa n'u ye, ale tun kɔnna ka na ben min kan. A tun ye Alabatosoba minan minw ta, ko ale bena o bɛɛ ɲɔgɔn caaman segi, ko ale yɛrɛ bena lɔ ni saraka bɔtaw musaka ye. 17A y'a daa di fana ko a bena kɛ zuwifu ye, ani ka maraw bɛɛ yaala ka Ala ka sebagaya koo fɔ. 18Nga a ka tɔɔrɔw tun te nɔgɔyara haali dɔɔni minkɛ, bari tɔɔrɔ min ka kan, Ala tun y'o l'a kan, a jigi tigɛr'a yɛrɛ cogo la. A ye bataki sɛbɛn zuwifuw ma, k'a fɔ ko:

Antiyokusi ka bataki zuwifuw ma

19«Ne be jamanadenw fo, aw zuwifuw, mɔgɔɲuman, mɔgɔbɛrɛw! Ne, masacɛ Antiyokusi, kɛlɛkuntigiba. Nisɔndiya, ni kɛnɛya, ani hɛrɛ ka kɛ aw ye! 20Ni aw ka kɛnɛ, ani aw ka denmisɛnw, n'aw ka koɲaw be kɛra aw sago la, an be barika la Ala ye kosɔbɛ o la. 21Min ye ne ka koo ye, ne bananin be ka la kabini waati dɔ, fanga te n la, nga aw koo be ne dusu la kosɔbɛ. Ne kɔsegitɔ ka bɔ Pɛrɛsi maraw la, ne benna kɔnɔgwanbana la yɔrɔ min na, ne y'a ye ko ne ka kan ka miiri bɛɛ ka hɛrɛ sɔrɔko la. 22Ne jigi ma tigɛ n yɛrɛ cogo la, nga, ne lanin b'a la kosɔbɛ ko ne bena bɔsi bana nin na. 23Ne y'a lɔn ko n faa ye kuluyɔrɔ maraw kɛlɛ tuma min na, ale fana tun y'a yɛrɛ nɔtabaga yira, 24janko ni balinako dɔ kɛra, walima ni kibaruyajugu dɔ sɔrɔla, jamana mɔgɔw hakili kana ɲagami o kosɔn, nga u k'a lɔn ko koɲaw tun tora mɔgɔ min bolo, ko a b'o le bolo. 25N y'a jati minɛ fana ko an gɛrɛfɛ siyaw, an ka mara laminimɔgɔw ka ɲamɔgɔw be waatiɲuman le dɛndɛna. O la, ne ye n deen Antiyokusi woloma, a ka kɛ masacɛ ye. Ne tun y'a yira ani k'a kalifa aw ma siɲɛ caaman, ne taatuma na teliya la kuluyɔrɔ maraw la. Ne ye bataki min d'a ma, a bɔɲɔgɔnko dɔ filɛ, min be nana kɔfɛ. 26O la, ne b'a ɲini aw fɛ sɔbɛ la ko ne ye koɲuman minw kɛ aw ye foroba la, walima danna danna, aw k'aw hakili to o la, aw kelen kelen bɛɛ ka taga ɲa ka koɲuman kɛ ne ni n deen ye. 27Tiɲɛ na, ne lanin b'a la kosɔbɛ, ko a bena ne ka kolatigɛninw bato, k'aw minɛ ka ɲa adamadenya la, ani aw bena ɲɔgɔn faamu kosɔbɛ.»

28Mɔgɔfagala ni Ala tɔgɔ cɛnbaga nin tɔɔrɔla ten kosɔbɛ, a tun ye min ɲɔgɔn la mɔgɔ wɛrɛw kan. Koo min ye dusukasiko daan ye, o y'a sɔrɔ, a sara jamana wɛrɛ la, kuluw yɔrɔ la. 29A terigwɛlɛn Filipu segira n'a suu ye Antiyɔsi, nga a tun ma la Antiyokusi dencɛ la minkɛ, a bɔra yen ka taga to Ezipiti jamana na, Potoleme Filometɔri fɛ.

ALA KA KUMA

© 2008 Alliance Biblique du Burkina Faso

More Info | Version Index