Search form

Sam 2nan int

Kunnafoni

Samuyɛli ka kitabu filanan ye fɔlɔ tɔɔ le ye. U y'u tilan ka bɔ ɲɔgɔn na a boɲakojugu kama. A be kɔn ka Dawuda ka masaya koo fɔ Zuda mara kunna jamana worodugu ɲafan fɛ (1—4). O kɔ, a b'a ka masaya koo fɔ jamana tɔɔ bɛɛ kunna, o min ye Isirayɛli mara ye jamana kɔgɔdugu ɲafan fɛ (5—24). A kɛra wajibi ye Dawuda ma k'a cɛɛ siri a juguw kosɔn jamana kɔnɔ. A jugu minw be jamana wɛrɛw la, a ye olu fana kɛlɛ kosɔbɛ janko k'a ka masaya sigi ka ɲa.

Dawuda ka koo la, faan kelen, kantigi lo, a jigi be Ala kan, a ka jama fana sɔnn'a ma. Nga, ale lo fana ye kojugu caaman kɛ a yɛrɛ ka nigɛlaw kosɔn. Nga, kira Natan nan'a lasɔmi tuma min na, a sɔnn'a filiyɔrɔ ma, ka sɔn Ala ka koo latigɛnin ma.

Dawuda ye Zeruzalɛmu dugu minɛ k'a kɛ a ka jamana dugu fɔlɔ ye. A tun b'a fɛ ka Alabatosoba lɔ yen, nga a ye kojugu caaman kɛ minkɛ, Ala ma sɔn a ka laɲinita ma. Ala y'a daa di a ma ko a deen bena sigi Isirayɛli kunna masaya la kudayi.

A ko: «...ale ka loon mana se, n'a sara, ne ben'a kɔmɔgɔ dɔ wili, a yɛrɛ ye min wolo. Ne bena barika don o deen nin ka masaya la. Ko ale lo bena soo lɔ ne ye, ani ne ben'a ka masaya sabati kudayi... Kɔmɔgɔw bena sɔrɔ e fɛ tuma bɛɛ, ani masaya bena to e bolo, a bena sabati tuma bɛɛ.» (7.12-13,16)

Kitabu nin tilancogo

Dawuda be kɛ Zuda mara mɔgɔw ka masacɛ ye 1.1—4.12

Dawuda be kɛ Isirayɛlidenw bɛɛ kuntigi ye 5.1—6.23

Ala b'a daa di Dawuda ma 7.1-29

Dawuda be kɛlɛ caaman kɛ 8.1—10.19

Dawuda be Batiseba furu 11.1—12.31

Ɲɔgɔnkɔniya boɲana denbaya kɔnɔ 13.1—14.33

Abusalɔn be muruti 15.1—20.22

Dawuda be Sayuli ka somɔgɔw faga 20.23—21.22

Dawuda be barika la Ala ye 22.1—23.7

Dawuda ka kɛlɛdenw 23.8-39

Ala be Dawuda ɲaa gwan jama daa jatiko kama 24.1—25.25

ALA KA KUMA

© 2008 Alliance Biblique du Burkina Faso

More Info | Version Index