Search form

Ɛst gir 1

Maridose ka siko

1 Masacɛba Aritasɛrisɛsi ka masaya saan filanan na, *Nisan kalo tile fɔlɔ loon, Bɛnzamɛn kɔmɔgɔ Kizayiyasi deen Semeyiyasi deen Zayirɔsi dencɛ Maridose sikora. 2 Maridose tun siginin be Suze dugu kɔnɔ. Zuwifu tun lo, a tun kɛra mɔgɔbaba ye n'a be baara la masacɛ ka luu kɔnɔ. 3 Babilɔni masacɛ Nabukodonozɔri tun ye mɔgɔ minw minɛ ka bɔ Zeruzalɛmu ni Zuda mara masacɛ Zekoniyasi ye, olu dɔ tun lo. 4 Maridose ka siko filɛ, k'a to sinɔgɔ la yɔrɔnin kelen, a ye pɛrɛnkan mɛn, mankanba, saan pɛrɛnna, dugukolo yɛrɛyɛrɛla, mɔgɔ bɛɛ siranna. 5 A ye sogojugu fila dɔ ye, u labɛnnin tun be kɛlɛ kama n'u be nana. U tun be sɔngɔra kosɔbɛ. 6 U sɔngɔkan kosɔn, siyaw tun b'u yɛrɛ labɛnna kɛlɛ kama. U tun b'u yɛrɛ labɛnna siya tilennin kama. 7 Lonjugu lo kosɔbɛ, dusukasi be yen, ni hakiliɲagami ani tɔɔrɔjugu ni siranyaba dugukolo kan. 8 Siya tilennin be yɛrɛyɛrɛ siranya bolo, tɔɔrɔ nin y'a hakili wili. O be ɲini ka halaki. 9 U be kulera Ala nɔɔ fɛ, jii dɔ be bɔra o kulekan kosɔn ka to ka woyo. A kɛra baji ye, jii nin ka ca kosɔbɛ. 10 Yeelen wɛrɛ farala tile ta kan. Dɛsɛbagatɔw wilila n'u be mɔgɔbabaw halakira.

11 Ala tun b'a fɛ ka min kɛ, Maridose y'o ye ten siko la. A kununtɔ dɔrɔn, a tora ka miiri a kɔrɔ la, a ye tile bɛɛ kɛ n'a b'o kɔrɔ ɲinina.

Maridose be janfa dɔ koo fɔ masacɛ ye

12 Loon dɔ, Maridose tun tagara sigi n'a be lafiɲɛna masalu kɔnɔ. O y'a sɔrɔ masacɛ ka luu kɔlɔsibaga mɔgɔ fila Gabata ni Tara, tun b'u ka baara la yen. 13 A y'u ye n'u be ɲɔgɔn sɔsɔra, a y'a tulo malɔ k'u ka sɔsɔli kuun mɛn. A y'a ye ko u be janfa le sirila masacɛ Aritasɛrisɛsi la janko k'a faga. O la, a tagara o koo fɔ masacɛ ye. 14 Masacɛ y'o mɔgɔ fila nunu ɲininga, olu lɔr'a la, u y'u faga.

15 O kɔ, masacɛ y'a kɛ u y'o koo nin sɛbɛn sɛbɛ dɔ kɔnɔ janko o ka to hakili la, Maridose fana y'o sɛbɛn. 16 Masacɛ ye lɔyɔrɔba di Maridose ma a ka luu kɔnɔ baara la. A ye boɲafɛn di Maridose ma a dɛmɛ kosɔn.

17 Nga o y'a sɔrɔ masacɛ ka baaraden dɔ tun be yen min ye yɛrɛboɲala Aman ye, Amadatɔsi deen tun lo. Ale wilila ko a bena kojugu kɛ Maridose n'a ka siya la, u mɔgɔ fila nunu ka faga kama.

Masacɛ be dumuniba labɛn

1Masacɛ Aritasɛrisɛsia min tun be mara kɛmɛ ni mugan ni wolonwula kunna, k'a ta Ɛndi jamana na fɔɔ ka ta'a bila Etiyopi jamana na, koo nin kɛra ale lo ka tile la. 2A tun siginin be a ka masasigiyɔrɔ la Suzi, min tun y'a ka masadugu ye. 3A ka masaya saan sabanan na, a ye ɲanagwɛ dɔ sigi a teriw ye, ani siya tɔw ye, pɛrɛsiw ni mɛdiw ka kɛlɛkuntigiw, ani a ka maraw kɔnɔ lasigidenw ye. 4A ye waati caaman kɛ n'u ye fɔɔ tile kɛmɛ ni bi seegi, n'a b'a ka masaya kɔnɔ nafoloba n'a ka dakamanafɛnw yira u la, min be boɲa la ale kan. 5O loon nunu tɛmɛna tuma min na, masacɛ ye ɲanagwɛ dɔ sigi tile wɔɔrɔ kɔnɔ a ka luu kɔnɔ, siyaw ye minw tun be Suze dugu kɔnɔ. 6Faniɲuman gwɛman, ni bulaman tun sirinin be ni juru ɲanaman wulenman ye min be tɛmɛ warigwɛ dilannin woow kɔnɔ ka taga siri tutunanw na, minw lɔra ni kabakuru ɲanaman sifa dɔw ye ka yɔrɔ masiri. Sigilan sanulaman ni warigwɛlamanw tun bilanin be yɔrɔ dilannin dɔ la, o yɔrɔ nin tun dilanna ni kabakuruɲuman ɲuman sifa caaman ye: birifani minw tun sɔgɔra ni jese wulenman ye, olu tun lanin be ye wulenman dɔɔni be yɔrɔ lamini na. 7U tun be minni kɛ filen sanulamanw ni warigwɛlamanw le kɔnɔ, olu tun dilanna ni kabakuru ɲanaman dɔ ye, a gwiliya sera tɔni kɛmɛ seegi ma. Duvɛn tun ka ca, a fana ka di, o tun be bɔ masacɛ fɛ. 8A tun y'a latigɛ ko mɔgɔ bɛɛ k'u sagolata min. A y'a fɔ a ka baaradenw ye k'u ka mɔgɔ kelen kelen bɛɛ sɔn ka kɛɲɛ n'u sagolata ye. U tun be se ka minni kɛ kosɔbɛ. 9Masacɛ ka muso Asitɛn fana ye ɲanagwɛ dɔ sigi musow ye masacɛ ka soo kɔnɔ. Masacɛ Aritasɛrisɛsi tun be yɔrɔ min na.

Masacɛ muso Asitɛn furu be sa

10Ɲanagwɛ tile wolonwulanan loon, masacɛ dusu tun diyara kosɔbɛ duvɛn fɛ. A kumana Aman fɛ, ni Bazan ani Tara, ni Borazɛ, ani Zatɔlita, ni Abataza, ani Taraba, mɔgɔ wolonwula minw tun b'a ka soo kɔnɔ baarab la. A ko 11u ka ta'a ka muso Asitin wele ka na n'a ka masaya fugulan ye a kuun na, janko k'a ka cɛɲa yira mɔgɔbabaw ni jama la, bari a tun cɛɛ ka ɲi kosɔbɛ. 12Nga masacɛ ka muso Asitin banna ko ale te taga, o la masacɛ dimina kosɔbɛ! 13Masacɛ y'a fɔ a teriw ye ko: «Asitin ka jaabili le ye o ye kɛ? O ɲana, aw ka ɲɔgɔnye kɛ k'o filɛ.» 14O kɔ, Arikesayiyɔsi gwɛrɛla masacɛ la. Sarisatayiyɔsi ni Malezeyari, olu le ye pɛrɛsiw ni mɛdiw ka ɲamɔgɔw ye. Olu le tun be to ka sigi masacɛ gɛrɛfɛ tigitigi. 15Fɛɛn min ka kan ka kɛ masamuso Asitin la ka kɛɲɛ ni sariya ye a banko la ka na masacɛ ka weleli la, masacɛ ka baarakɛla tun ye min fɔ a ye, a ye o fɔ.

16O la, Mukayiyɔsi y'a fɔ a ye a ka ɲamɔgɔbabaw ɲana ko: «Masacɛ ka muso Asitɛn ma kojugu kɛ masacɛ dama na do, a y'a kɛ ɲamɔgɔbaba nunu bɛɛ la, ni mara bɛɛ kuntigiw la. 17O y'a sɔrɔ masacɛ tun y'a muso ka jaabili fɔ ka ban u ye, ani n'a ka jaabicogo. Ko a ye masacɛ Aritasɛrisɛsi jaabi cogo min na, ko 18Pɛrɛsi ni Mɛdi ɲamɔgɔbabaw ka musow bena koo nin mɛn, olu ben'a daminɛ k'o ɲɔgɔn kɛ u cɛɛw la. 19Masacɛ, n'i be sɔn, sɛbɛ dɔ be kɛ i tɔgɔ la, o niin ka don Pɛrɛsi ni Mɛdi jamana ka sariya la, n'a man kan ka yɛlɛma fewu, min ye masacɛ ka sariya siginin ye, ko masamuso nin kana taga e ɲakɔrɔ tugu, masacɛ bena muso dɔ wɛrɛ ta min ka fisa n'a ye. 20Masacɛ, e be sariya min sigira, ni o fɔra i ka jamanaba nin bɛɛ kɔnɔ, ani ka kɛ ten, musow bɛɛ bena u cɛɛw boɲa, a fɛntigiw fara a fantanw kan.» 21O kuma nin diyara masacɛ ni ɲamɔgɔbabaw ye. Mukayiyɔsi y'a fɔ cogo min na, masacɛ y'a kɛ ten. 22A ye batakiw ci a ka maraw bɛɛ la, ka kɛɲɛ ni siyakanw bɛɛ ye. O kɛra sababu ye mɔgɔw siranna.

ALA KA KUMA

© 2008 Alliance Biblique du Burkina Faso

More Info | Version Index