Search form

Ɛst gir 10

Maridose ka siko kɔrɔ

1O kɔ, masacɛ ye nisɔngɔ dɔ sarako latigɛ a ka jamana kɔnɔ mɔgɔw ye fɔɔ ka taga se kɔgɔjida la, ani yɔrɔ wɛrɛw la. 2Maridose ye koo minw bɛɛ kɛ a ka fanga kɔnɔ ni jagwɛlɛya ye, ani masacɛ ye boɲa min la a kan, u m'o bɛɛ sɛbɛn Mɛdi ni Pɛrɛsikaw ka masacɛw ka loon o loon kibaru sɛbɛ kɔnɔ wa? 3Tiɲɛ na, Maridose le tun gwanna masacɛ Aritasɛrisɛsi kɔ. A tun kɛra mɔgɔbaba ye fanga nin kɔnɔ. Zuwifuw tun b'a jati kosɔbɛ, ani a koo tun ka di a ka siya bɛɛ ye. Bari a tun be to k'a ka koo fɔ u ye le.

1 Maridose y'a fɔ ko: «Koo nunu bɛɛ bɔra Ala le fɛ. 2 Ne hakili be n ka siko la n tun ye min kɛ a kosɔn, o koo kɛra ka kɛɲɛ ni siko nin ye cɔ, foyi ma to. 3 Jibɔyɔrɔfitini min nana kɛ baji ye, o kɔ, yeelen yɛrɛ ka fara tile yeelen kan, ani jii caaman ka kɛ baji ye, o ye Ɛsitɛri ye, masacɛ y'ale furu k'a kɛ masamuso ye. 4 Sogojugu fila nunu, o ye Aman ni ne ye. 5 Siya minw tun yera, o ye mɔgɔ minw tun ye u yɛrɛ lajɛn janko ka zuwifuw halaki. 6 Siya min fana tun yera tugu, ale ye ne ka mɔgɔw ye Isirayɛlidenw, minw kasira Ala nɔɔ fɛ, a y'u kisi. Matigi y'a ka jama kisi. Matigi y'an kisi tɔɔrɔ bɛɛ ma, Ala ye kabakow kɛ ani kobabaw, minw ma kɛ siya wɛrɛw fɛ. 7 O la, a ye koo fila latigɛ, kelen ye siya wɛrɛw bɛɛ ta ye, kelen ye a ka jama ta ye. 8 O koo latigɛnin nunu fila bɛɛ kɛra, Ala tun ye loon min latigɛ, n'a waati, an'a tuma na janko ka siyaw bɛɛ kiti. 9 Ala jantor'a ka siya la, a y'a ka jama ka tiɲɛ fɔ. 10 O le y'a to a ka jama nin ka kan ka tile fila bato ka ɲanagwɛ *Adari kalo la, a tile tan ni naaninan n'a tile tan ni duurunan, u ka kan ka ɲɔgɔn lajɛn Ala ɲakɔrɔ janko ka ɲanagwɛ kɛ ka nisɔndiya. Waati nataw mɔgɔ minw be Ala ka jama cɛma, olu ka kan k'o ɲanagwɛ nin kɛ tuma bɛɛ.»

Kuma laban

11 Pitoleme ni Kileyopatiri ka masaya saan tan ni naaninan na, Dozitɔsi y'a yɛrɛ yira ko ale ye sarakalasebaga ye, Levi kɔmɔgɔ. Ale n'a dencɛ Pitoleme, olu le nana ni bataki nin ye, min kuma fɔra ka tɛmɛ. U y'a yira k'o bataki nin tun ye Purimu ta ye, ko a tun yɛlɛmana kaan wɛrɛ la Pitoleme dencɛ Lizimaki fɛ ka bɔ Zeruzalɛmu.

ALA KA KUMA

© 2008 Alliance Biblique du Burkina Faso

More Info | Version Index