Search form

Ɛst gir 3

Aman ni Maridose be bila ɲɔgɔn na

1O koow tɛmɛnin kɔ, masacɛ Aritasɛrisɛsi ye lɔyɔrɔba di Agagi kɔmɔgɔ Amadatɔsi dencɛ Aman ma. A y'a minɛ k'a sigi kuntigiya la a ka ɲamɔgɔw bɛɛ kunna. 2Mɔgɔ minw bɛɛ tun be baara kɛ masacɛ ka luu kɔnɔ, olu bɛɛ tun be to k'u kunbiri gwan Aman ɲakɔrɔ k'a boɲa, bari masacɛ le tun y'o latigɛ, nga Maridose tun te sɔn k'o kɛ. 3Masacɛ ka baaraden minw tun be lɔ luda la, olu ye Maridose ɲininga ko: «Mun na i be masacɛ ka sariya cɛn?» 4U tun b'o fɔ Maridose ye loon o loon fɔɔ ka dɛsɛ, a ma mɛnni kɛ u fɛ. O la, u y'o fɔ Aman ye ko Maridose banna ka masacɛ ka fɔta bato, bari Maridose tun y'a fɔ u ye ko ale ye zuwifu ye. 5Aman y'a ye ko Maridose te sɔn k'a kunbiri gwan ale ɲakɔrɔ k'a boɲa minkɛ, a dimina kosɔbɛ. 6O la, a tun b'a fɛ ka Maridose ka siya bɛɛ halaki Aritasɛrisɛsi ka mara bɛɛ kɔnɔ. 7Sɛrisɛsi ka masaya saan tan ni filanan kalo fɔlɔ la, min ye Nisan kalo ye, u ye kalabon kɛ u be min wele ko Purimu, Aman ɲana, a ka kan ka kɛ loon min na, ani kalo min kɔnɔ, janko o ka lɔn. U ka kalabon ye kalo tan ni filanan le yira min ye Adari kalo ye.

Aman b'a fɛ ka zuwifuw bɛɛ halaki

8O kɔ, Aman y'a fɔ masacɛ Aritasɛrisɛsi ye ko: «Siya dɔ yɛrɛkɛnin be siyaw cɛma i ka maraw bɛɛ la. U ka landa ni tɔw bɛɛ ta te kelen ye fewu. U te ele masacɛ ka sariya bato. Kuun t'a la i k'o siya nin to ɲasuma na. 9Ni masacɛ be sɔn a k'u halaki, ne bena sɛbɛ dɔ sɛbɛn ka sira di k'u k'o siya nin bɛɛ faga, ne bena warigwɛ tɔni kɛmɛ saba don i ka nafolo bilayɔrɔ la.» 10O la, masacɛ y'a ka bololanigɛc bɔ k'a di Aman ma, janko a ka taamasiɲɛ kɛ zuwifuw halakisɛbɛ kan. 11O kɔ, masacɛ y'a fɔ a ye ko: «To n'i ka wari ye, siya nin fana b'i bolo. Fɛɛn min ka d'i ye, i k'o kɛ u la.» 12U ye masacɛ ka sɛbɛnnikɛlaw wele kalo fɔlɔ nin tile tan ni sabanan loon. Olu ye sɛbɛ nunu sɛbɛn, ka kɛɲɛ ni Aman ka fɔta ye, k'o ci masacɛ ka dakɔrɔsigiw, n'a ka maraw kɔnɔ lasigidenw bɛɛ, ani siyaw kuntigiw ma, mara bɛɛ kɔnɔ k'a ta Ɛndi jamana na fɔɔ Etiyopi mara kɛmɛ ni mugan ni wolonwula kɔnɔ ka kɛɲɛ ni o yɔrɔ siyakan ye. O sɛbɛ sɛbɛnna ni masacɛ Aritasɛrisɛsi tɔgɔ ye. 13Cidenw tagara ni bataki nunu ye masacɛ ka maraw bɛɛ la, ko saan kalo tan ni filanan, min ye Adari kalo ye, ale tile tan ni saba loon, ko u ka zuwifuw bɛɛ faga o loon kelen nin na, k'u bololafɛnw cɛ.

Zuwifuw halakiko sariya

1 Sɛbɛ min sɛbɛnna o kɔnɔna kuma filɛ: «Aritasɛrisɛsi masacɛba, be sɛbɛ nin ci a ka ɲamɔgɔw ni lasigidenw n'a ka lankanw ma, minw b'a ka mara kɛmɛ ni mugan ni wolonwula kɔnɔ, k'a ta Ɛndi jamana na fɔɔ ka taga se Etiyopi, a fɔra u ye ko:

2 «Ne min be siya caaman kunna, n ka fanga be diɲɛ yɔrɔ bɛɛ la. O bɛɛ n'a ta, ne t'a fɛ ka n yɛrɛ to yɛrɛboɲa be se n kɔrɔ n ka fanga kɔnɔ, ne b'a fɛ ka n ka kuntigiya kɛ ni cogoɲuman ye. O bena kɛ sababu ye ne bena se ka n ka waati kɛ ni ɲagamini te yen, ani n ka mara ka ɲa bari ɲayɛlɛ be yen. O la, mɔgɔw bena to ka taama ka don ɲɔgɔn fɛ ni siranya t'a la, mɔgɔw bɛɛ be hɛrɛ min fɛ, o ka sɔrɔ.

3 «Ne ye n ladibagaw ɲininga tuma min na ko an bena se k'o koo kɛ cogo di, ladibaga nunu la dɔ, min ye Aman ye, ale min be gun ne kɔ fanga nin kɔnɔ, lɔnniya la a y'a yɛrɛ yira ko a ɲɔgɔn te yen, a fana y'a yira tuguni ko ale sɔnnin be ka kɛ kantigi ye ne faan fɛ. 4 A y'a yira ne la ko siya dɔ be yen min ka jugu, k'u jɛnsɛnnin be siya tɔw cɛma diɲɛ kɔnɔ. Ko sariya b'u fɛ min ni siya tɔɔ ta te kelen ye, u te sɔn ka masacɛ ka kolatigɛninw bato tuma bɛɛ. O la, u be fanga ka bɛɛn cɛn, ne be fanga min kɛ ni tilenninya ye janko mɔgɔ bɛɛ ka wasa.

5 «Ne fana y'a mɛn k'o siya nin b'a danna, a be ban tuma bɛɛ siya tɔw ma, a ka sariya b'a fɛ siya tɔɔ te minw lɔn, a te sɔn tuma bɛɛ ne ka kolatigɛninw ma, a be kojugu yɛrɛ le kɛra. O la, masaya te se ka yiriwa. 6 O le kosɔn, ne be sira di ko Aman mana siya min koo fɔ aw ye sɛbɛ kɔnɔ, aw k'o halaki, aw kana foyi to yen, Aman le be masaya ni koɲa ɲanabɔra, ni ne te yen, ale lo ye jama faa ye. O siya nin ye an juguw ye. Aw k'u bɛɛ faga, muso fara denmisɛnw kan, aw kana makari u la, cogo wɛrɛ kana sɔrɔ a la. Aw k'o kɛ ɲinan saan kɔnɔ yen, saan kalo tan ni filanan tile tan ni naaninan loon, min ye Adari kalo ye. 7 O la, mɔgɔ minw bannin be mɔgɔ tɔw ta ma, olu ka jɛn loon kelen ka fili ka taga lahara, u tena fanga sɔrɔ ka koo dɔ bali sini tugu. O la, fanga ka koo be ɲa, hɛrɛ be sɔrɔ.»

14O bataki nunu tun kalanna maraw bɛɛ kɔnɔ. U ye sira di siya tɔw bɛɛ ma ko u k'u yɛrɛ labɛn o loon kama. 15Cira nin sera joona joona, a kɛra ten fana Suzi dugu kɔnɔ. Masacɛ ni Aman sigira ka to minni na, k'a sɔrɔ Suzi dugu bɛɛ gwannin be.

ALA KA KUMA

© 2008 Alliance Biblique du Burkina Faso

More Info | Version Index