Search form

Ɛst gir 4

Maridose be Ɛsitɛri daali

1Maridose y'o koo mɛn tuma min na, a y'a ka fani faran, ka dusukasifani ta k'o don a kaan na, ka bugurigwɛ kɛ a yɛrɛ kan. O kɔ, a tagara dugu forobayɔrɔ la ka to ka kule kosɔbɛ, ko: «U b'a fɛ ka siya dɔ halaki min ma kojugu kɛ.» 2A tagara se masacɛ ka luu daa la ka lɔ, bari a tun latigɛra ko dusukasifani be mɔgɔ min kaan na, ani bugurigwɛ, o tigi man kan ka don yen.

3Masacɛ ka cii sera a ka mara o mara kɔnɔ, o yɔrɔ zuwifuw tun be makari la. U tun be to k'u disiw gosigosi, o kɛra dusukasiko ye zuwifuw fɛ. U tun be to ka la ni dusukasifaniw ye ani bugurigwɛ kɔnɔ.

4Ɛsitɛri ka jɔnmusow, ni masacɛ ka muso ka soo kɔlɔsibagaw donna k'o fɔ Ɛsitɛri ye. A hakili ɲagamina kosɔbɛ, a ye fani di k'u ka taga o di Maridose ma janko a ka dusukasifani nunu bɔ a kaan na, nga Maridose ma sɔn. 5Kɔlɔsibaga nunu cɛma, masacɛ tun ye Ɛsitɛri ka koo don minw bolo, olu dɔ tun be yen min tɔgɔ ko Akiratayiyɔsi. Ɛsitɛri y'ale ci ko a ka taga Maridose ɲininga, ko mun le kɛra tigitigi.d 7Koo minw kɛra, Maridose y'o bɛɛ ɲafɔ a ye. Aman tun ko ni masacɛ sɔnna zuwifuw ka faga ma, a bena warida tɔni kɛmɛ saba min don a ka nafolo marayɔrɔ la, a y'o daa fɔ a ye. 8U fagako min tun fɔra Suzi dugu kɔnɔ, a y'o sɛbɛ dɔ di Akiratayiyɔsi ma, janko a ka taga o yira Ɛsitɛri la. A fana y'a fɔ Akiratayiyɔsi ye ko a b'a ɲini Ɛsitɛri fɛ ko a ka taga masacɛ fɛ, k'a dali ko a ka sabali ka makari a ka siya la! A tun y'a fɔ Ɛsitɛri ye ko: «I hakili to i ka waati tɛmɛnin la, e tun te foyi ye waati min na, ne y'i balo cogo min na. Bari Aman min gunna masacɛ la, ale lo y'an tɔgɔjugu fɔ masacɛ ye janko k'an faga. I ka Matigi daali! Ani ka kuma masacɛ fɛ an kosɔn! An bɔsi ka bɔ saya la.» 9Akiratayiyɔsi kɔsegira ka n'a ka kuma fɔ Ɛsitɛri ye. 10Ɛsitɛri kɔsegira ka Akiratayiyɔsi ci Maridose fɛ tugu k'a fɔ a ye ko: 11«Masacɛ ka baaradenw n'a ka mara mɔgɔw bɛɛ b'a lɔn ko sariya dɔ be yen min b'a yira ko cɛɛ fara muso kan, ni mɔgɔ min donna masacɛ ka luu ɲafɛla la ni masacɛ m'o tigi wele, a tigi te kisi, fɔɔ n'a y'a ka bere sanulaman wili ka sin min ma, o tigi le be kisi. A tile bi saba do ye nin ye, ni masacɛ ma ne wele ka ta'a fɛ.»

12Akiratayiyɔsi y'o kuma bɛɛ fɔ Maridose ye. 13Maridose ye Ɛsitɛri jaabi ko: «Kan'a miiri ko e ni zuwifu tɔw te kelen ye, k'o la, e bena kisi, bari e be masacɛ ka soo kɔnɔ. 14N'i jera n'i ma foyi fɔ sisan, zuwifuw bena dɛmɛ sɔrɔ ka kisi sababu wɛrɛ la. Ele n'i faa ka somɔgɔw bena halaki. E Ɛsitɛri kɛra masacɛ ka muso ye, nin le kama wa, jɔn b'o lɔn?» 15O kɔ, Ɛsitɛri y'a ka ciden nin ci tugu Maridose fɛ k'a fɔ a ye ko: 16«Taga Suzi dugu kɔnɔ zuwifuw bɛɛ lajɛn. Aw ka suun don ne kosɔn. Aw kana dumuni kɛ, aw kana minni kɛ tile saba kɔnɔ, suu fara tile kan. Ne fana bena suun don ni n ka jɔnmusow, o kɔ, ne bena don masacɛ fɛ, hali n'o sariya nin be yen. N sara wo, n ma sa wo, o bɛɛ ka kan.» 17Ɛsitɛri ye fɛɛn min fɔ Maridose ye, a tagara o bɛɛ kɛ.

Maridose ka Ala daali

1 Maridose y'a hakili jigi Matigi ka kɛwali bɛɛ la k'a dali ko: 2 «Matigi, Matigi, e ye masa ye sebagayatigi, diɲɛ ye ele le ta ye, n'i b'a fɛ ka Isirayɛlidenw kisi, a tigi te yen min be se ka muruti e sago ma. 3 Ele le ye sankolo ni dugukolo dan, kabako minw be diɲɛ kɔnɔ, ele nɔɔ lo. 4 Ele le ye fɛɛn bɛɛ tigi ye, mɔgɔ si te yen min be se ka lɔ i ɲakɔrɔ, Matigi. 5 Matigi, i be koo bɛɛ lɔn, Matigi e yɛrɛ y'a lɔn tiɲɛ na ko ne ma ban ka n kunbiri gwan Aman kɔrɔ gwansan, n m'a lawili k'a dɔgɔya, walima ka n yɛrɛ boɲa, o fana ma bɔ n yɛrɛ la. 6 Tiɲɛ na, n'o le tun be kɛ sababu ye ka Isirayɛlidenw kisi, ne tun bena Aman seen yɛrɛ nɛmu. 7 Nga ne ma o kɛ tiɲɛ na, bari ne t'a fɛ adamaden ka boɲa ka kɛ e Ala ta sanfɛ, ne tena n kunbiri gwan mɔgɔ si kɔrɔ, n ben'a gwan e Matigi dama le ɲakɔrɔ. N t'o kɛ ni yɛrɛboɲa ye fana.

8 «Matigi Ala, e min ye Masa ye, Ibrayima ka Ala ye ele le ye. E k'i ka jama kisi, bari u jugu b'u halakiyɔrɔ ɲinina, u y'u yɛrɛ jija janko k'i ka jama halaki, min ye e ta ye kabini fɔlɔfɔlɔ. 9 Kana e cekun bɔ e ka jama na, e ye jama min bɔsi Ezipitikaw bolo. 10 Matigi, e ka ne ka daali lamɛn, minw ye e ta ye, e ka olu dɛmɛ. An ka dusukasi yɛlɛma k'a kɛ nisɔndiya ye, janko an niman ka to, an ka dɔnkili la k'i boɲa. Matigi, kan'a to e tanubaga be tunu.»

11 Isirayɛlidenw bɛɛ kasira kosɔbɛ, bari u tun y'a ye ko u bena sa.

Ɛsitɛri ka Ala dali

12 Masamuso Ɛsitɛri tun be saya ɲafɛ, a ye dɛmɛ ɲini Ala fɛ. 13 A y'a ka masamuso fani ɲanamanw bɔ, ka dusukasifani don, a ma tulu kasadiman bon a kuun na. A ye bugurigwɛ ni buguri le kɛ a la. A banna k'a yɛrɛ lalaga, yanni a k'a ka masirifɛnw don, a y'a kunsigi le ɲagaminin to a bonna a fariyɔrɔ bɛɛ. 14 A ye Matigi, Isirayɛlidenw ka Ala daali ko: «Ne ka Matigi ni an ka Masa, e ye kelen le ye, e ka ne dɛmɛ, ne kelen lo, ni e kelen tɛ, ne dɛmɛbaga te yen. 15 Bari ne be taga faratiko le kɛyɔrɔ la. 16 Matigi, kabini ne denmisɛn tuma, ne y'a mɛn ko ele le ye an bɛmaw woloma, waati tɛmɛnin mɔgɔw cɛma, ele le ye ne ka siya Isirayɛlidenw woloma siya wɛrɛw cɛma, janko u ka kɛ e ta ye kudayi, e fana tun ye fɛɛn min bɛɛ fɔ u ye, i y'o kɛ.

17 «Matigi, an ye kojugu kɛ e ɲakɔrɔ, e y'an don an juguw bolo. 18 Bari an y'u ka batofɛnw boɲa. Matigi, e tilennin lo. 19 Sisan an ka jɔnya juguman ma u wasa. U kalila n'u ka joow tɔgɔw ye, 20 ko u bena i ka latigɛko bɔ yen, k'i ka jama halaki pepewu. U b'a fɛ k'i batobagaw bali, u b'a fɛ k'i ka soo ka nɔɔrɔ bɔ an'i ka sarakabɔyɔrɔ ta. 21 O la, u b'a fɛ ka sira di siya wɛrɛw ma u k'u yɛrɛ boɲa batofɛn kosɔn. U mako b'a la ka to ni masa tɛmɛta ye.

22 «Matigi, e kana i ka masabere don batofɛnw bolo minw te foyi ye. U ka yɛlɛko a halaki kosɔn, a k'u ka kolatigɛnin yɛlɛma u yɛrɛ kan. O ka kɛ koo nin ɲamɔgɔ yɛrɛ la. A to a be tɔɔrɔ sɔrɔ min ɲɔgɔn te yen.

23 «Matigi, e hakili to an na. An dɛmɛ an ka dusukasi waati la. E ka jagwɛlɛya di ne ma, e min ye batofɛnw ka Masa ye, an fanga bɛɛ kuntigi. 24 Ka ne to jara nin ɲakɔrɔ, e ka kumaɲuman don ne daa la. E k'a ka miiriya yɛlɛma, e k'a yɛlɛma janko an kɛlɛbaga koo ka goya a ye, janko a k'an kɛlɛbaga nin n'a tɔɲɔgɔnw halaki. 25 Matigi, an bɔsi u bolo i ka sebagaya la. Matigi, e ka ne dɛmɛ. Ne kelen lo, ni e tɛ, dɛmɛbaga wɛrɛ te n fɛ. E be koo bɛɛ kala ma.

26 «E yɛrɛ y'a lɔn ko e ka sariya batobaliya man di ne ye. A man di ne ye ka la ni siya wɛrɛ ye. 27 Ne degunnin be cogo min na, e b'o lɔn. Masamuso ka fugulan koo man di n ye fewu. A birilon ka bɔ jama cɛma, o ye degun ye ne ma. A koo ka go ne ye i ko fani nɔgɔnin. O la, ne t'a biri n yɛrɛ sagolon na. 28 E ka jɔnmuso ma dumuni kɛ Aman fɛ, a fana ma taga masacɛ ka ɲanagwɛ dumuni na, a m'a ka batofɛn duvɛn tɔɔ min fana. 29 Kabini e ka jɔnmuso ka koo yɛlɛmana, e ka jɔnmuso ma hɛrɛ sɔrɔ fewu, fɔɔ ka na se bii ma, fɔɔ n'a ma kɛ e gɛrɛfɛ Matigi, Ibrayima ka Ala.

30 Ala e min fanga ka bon ni bɛɛ ta ye, e k'an ka jigitigɛ dalili lamɛn, e k'an bɔsi ka bɔ mɔgɔjuguw bolo. Ne bɔsi siranya bolo.»

Ɛsitɛri be taga masacɛ fɛ

1 Tile saba tɛmɛnin kɔ, Ɛsitɛri y'a ka dalili lalɔ. A y'a ka dusukasifani nunu bɔ k'a ka faninyumanw don. 2 K'a to o faninyumanw na, a ye Ala dali tugu, ale min b'a dɛmɛ, k'a tanga kojugu ma. O kɔ, a y'a ka sunguru fila minɛ ka taga. 3 A tun be tintinna sunguru nunu kelen le kan n'a be tagara. 4 Sunguru kelen tun y'a ka fani dagolo minɛ a kɔfɛ. 5 A tun sirannin lo kosɔbɛ, a cɛɛ fana tun ka ɲi tigitigi. A ɲada tun ka di i ko kanuya kɛ koo le b'a dusu la. Nga a dusu tun fanin be siranya la. 6 A donna daa nunu bɛɛ la ka taga lɔ masacɛ ɲafɛ. O y'a sɔrɔ masacɛ tun siginin be a ka masasigilan kan, a ka masirifɛn bɛɛ b'a kaan na. Sanu tun b'a kaan na, ani kabakuru sɔngɔgwɛlɛnw. A tun be siranya bila mɔgɔ la. 7 A y'a kuun kɔrɔta, boɲa tun b'a ɲada kan. A ye filɛli kɛ ni fariya ye. Ɛsitɛri fanga banna jatigɛ fɛ fɔɔ a be ɲini ka kirin. A y'a kuun la sunguru kelen nin ta kan min tun b'a ɲafɛ.

8 Ala ye masacɛ ka dimi yɛlɛma k'a kɛ dusudiya ye. Masacɛ hakili ɲagaminin, a wilila yɔrɔnin kelen ka bɔ a ka sigilan kan ka Ɛsitɛri minɛ k'a koladiya ni kuma nɔgɔman ye fɔɔ a ye jagwɛlɛya sɔrɔ tugu. 9 A y'a fɔ Ɛsitɛri ye ko: «Mun le kɛra, Ɛsitɛri? Ne y'i tangabaga ye, kana siran. 10 E tena sa, bari ne fɛ na sariya nin be boli mɔgɔ gwansan le kan. 11 Gwɛrɛ ka na.» 12 A y'a ka sanubere wili k'a la Ɛsitɛri gaman kan. O kɔ, a y'a bolo meleke Ɛsitɛri la k'a fɔ a ye ko: «E nakun fɔ ne ye.»

13 Ɛsitɛri y'a jaabi ko: «Masa, ne ye e ye dɔrɔn, ne ko ne ye mɛlɛkɛ le ye, o la, ne hakili wilila i ka nɔɔrɔ yetɔ siranya fɛ. 14 E ka ɲi kosɔbɛ, e ɲada cogo ka ɲi.» 15 Ka Ɛsitɛri to kuma na, a jigi tigɛra tugu. 16 Masacɛ fana hakili ɲagamina. A ka baaradenw bɛɛ ye Ɛsitɛri jagwɛlɛya.

ALA KA KUMA

© 2008 Alliance Biblique du Burkina Faso

More Info | Version Index