Search form

Amɔ 3

Isirayɛlidenw ka koo

1Masaba be kuma min fɔra aw Isirayɛlidenw kama, a ye siya min bɛɛ bɔ Ezipiti jamana na, aw k'o lamɛn. A ko:

2«Ne be jantora aw le la siyaw bɛɛ cɛma.

O kama, aw ye tilenbaliyako minw bɛɛ kɛ,

ne bena o juru sara aw la.»

Kira ka kan ka kuma

3Mɔgɔ fila be sira kelen ta ɲɔgɔn fɛ

n'u ma bɛn fɔlɔ wa?

4Jaracɛ be sɔngɔ tuu kɔnɔ

n'a ma sogo sɔrɔ wa?

Jara kanbelen be kasi a layɔrɔ la

n'a ma sogo dɔ minɛ wa?

5Kɔnɔ be minɛ jaan kɔnɔ

ni dumunifɛn t'a la wa?

Jaan be se ka wili

ni fɛɛn dɔ ma don a la wa?

6Ni buru fiyɛra dugu kɔnɔ,

dugumɔgɔw hakili te ɲagami wa?

Ni kojugu sera dugu ma,

o ma bɔ Masaba la wa?

7Tiɲɛ na, Matigi, Masaba te koo si kɛ n'a m'o gundo yira a ka kiraw la, minw y'a ka baarakɛlaw ye.

8Ni jara sɔngɔra, jɔn lo te siran?

Ni Matigi, Masaba kumana, jɔn lo t'o kiraya kɛ?

Samari mara ɲagwanko

9Aw k'a wango la Asidɔdi masaluw kɔnɔ,

ani Ezipiti jamana masaluw kɔnɔ

k'u ka na lajɛn Samari kuluw kan!

Ɲagamini min be dugu kɔnɔ, u k'o filɛ,

fariya min be yen, u k'o ye.

10«Ɲumanya miiri te Samarikaw kɔnɔ fewu.»

Masaba le ko ten.

Fariyakow ni benkannifɛnw le y'u ka masasow fa.

11O kama, Matigi, Masaba ko:

«Aw juguw bena na aw ka jamana lamini

k'aw ka fanga bɔsi aw la,

k'aw ka masasow kɔnɔfɛnw ta.»

12Masaba ko:

«Begɛndɛndɛbaga be begɛn dɔ seen fila,

walima a tulo tɔɔ sama

ka bɔ jara daa la cogo min na,

o cogo kelen na, Isirayɛlidenw bena kisi,

olu minw siginin be Samari,

sigilan ni dilanɲumanw kan.

13«Aw ka mɛnni kɛ ka kuma nin fɔ Yakuba ka somɔgɔw ye k'u lasɔmi.» Matigi, Masaba, Setigi Ala le ko ten.

14- «Ne bena Isirayɛlidenw ka kojugu juru sara u la tuma min na,

ne bena Betɛli dugu sarakabɔyɔrɔw gosi,

sarakabɔyɔrɔ nɔnkɔnw bena kari ka ben.

15U ye soo minw lɔ nɛnɛ ni funteni kama,

ne bena olu ci,

ne bena u ka dakamanasow cɛn,

n bena u ka sobabaw halaki.»

Masaba le ko ten.

ALA KA KUMA

© 2008 Alliance Biblique du Burkina Faso

More Info | Version Index