Search form

Bar 3

1« ‹Matigi, Setigi, Isirayɛli ka Ala, an be kulera e nɔɔ fɛ, an dusu kasinin be kosɔbɛ, an jigi tigɛnin lo. 2Matigi, mɛnni kɛ an fɛ, makari an na bari an ye e hakɛ ta. 3Ele kɔni be yen tuma bɛɛ, nga anw tununin lo kudayi. 4Matigi, Setigi, Isirayɛli ka Ala, an ka dalili mɛn. An minw tun ma sɔn k'i ka ladiliw bato, an be i ko suuw, Matigi, an ka Ala, an minw ye u kɔmɔgɔw ye, an man fisa ni olu ye. O la, tɔɔrɔ tugura anw kɔ. 5Kana i hakili to an Faaw ka tilenbaliyakow la, nga bii, e k'i ka sebagaya n'i tɔgɔ le filɛ. 6E le ye Matigi ye, an ka Ala, an bena i tanu. 7I y'a kɛ an be siran e ɲa janko an ka dɛmɛ ɲini i fɛ. K'a to jamana wɛrɛ kɔnɔ an ka jɔnya la, an bena i tanu bari an faaw tun ye murutiko minw kɛ k'i hakɛ ta, an y'o koo bɛɛ bɔ an dusu la pewu. 8A filɛ, an yɔrɔ ka jan an faso la bii, i y'an jɛnsɛn yɔrɔ la janko o yɔrɔ mɔgɔw k'an nɛni ani k'an danga. O be kɛra an na an faaw ka tilenbaliyako bɛɛ kama, olu minw faranna ele Matigi, an ka Ala la.› »

Hakilitigiya koo

Mɔgɔ ɲinɛna hakilitigiya sɔrɔyɔrɔ la

9Isirayɛlidenw, sariya minw be sijan di, aw k'olu lamɛn.

Aw k'aw tulow malɔ janko aw ka se ka kɛ hakilimanw ye.

10Isirayɛlidenw, a kɛra di aw b'aw juguw ka jamana na?

Mun kosɔn aw be kɔrɔla jamana wɛrɛ kɔnɔ?

11Aw magara suuw la k'aw yɛrɛ nɔgɔ.

Aw be jati mɔgɔ minw ka kan ka taga lahara.

12O kɛra bari aw ye hakilitigiya sɔrɔyɔrɔ to yen.

13N'aw tun tugura Ala le kɔ,

aw tun bena to hɛrɛ la kudayi.

14O la, aw ka hakilitigiya, ni barika,

ani lɔnniya sɔrɔyɔrɔ ɲini k'a lɔn,

min seen fɛ sijan sɔrɔyɔrɔ be lɔn,

ani nisɔndiya, ani hɛrɛ.

Hakilitigiya te adamadenw bolo kɔrɔ

(Zɔbu 28.12-17; Tal 1.1-9)

15Jɔn ye hakilitigiya ka yɔrɔ lɔn?

Jɔn delila ka don a ka nafolo marayɔrɔ la?

16Siyaw kuntigiw wa?

Walima kongosogow kolobagaw?

17Walima minw be kɔnɔw mara wa?

Minw be warigwɛ ni sanu kafo ɲɔgɔn kan k'a mara,

mɔgɔw jigi be minw kan,

nafolo banbali be minw fɛ,

olu lo wa?

18Minw be warigwɛ baara k'a kɛ u haminako ye,

minw ka kɛwaliw be tɛmɛ mɔgɔ ka miiriya kan,

olu lo wa?

19U sara, u tagara lahara,

dɔ wɛrɛw wilila u nɔɔ na.

20Filankuru wɛrɛw nana diɲɛ kɔnɔ,

u y'u sii kɛ dugukolo kan,

nga u ma se ka hakilitigiya sɔrɔsira lɔn.

21U m'a sɔrɔsira lɔn fewu,

u ma hami n'a koo ye.

U tun ye sira min taama,

u wolodenw y'u yɛrɛ kɔlɔsi o ma.

22Hakilitigiya koo ma mɛn Kanaan jamana na,

a ma ye Teman.c

23Hali Agari kɔmɔgɔ minw tun be hakilitigiya ɲinina dugukolo kan,

Meran ni Teman jagokɛlaw,

ni siirinlabagaw, ni lɔnniya ɲinibagaw,

olu ma se ka hakilitigiya sɔrɔsira lɔn,

u ma u sɔbɛ don a sɔrɔsiraw la.

24Isirayɛlidenw, nin diɲɛ min ye Ala ka soo ye,

o ka bon dɛ!

A ka mara nin ka bon haali!

25A ka bon, daan t'a boɲa la.

A ka jan sanfɛ, a te se ka suma!

26Mɔgɔjan wolol'a kɔnɔ fɔlɔfɔlɔ,

u tɔgɔ bɔra.

U tun ka janjan u be se kɛlɛ la kosɔbɛ.

27Nga Ala ma olu woloma

k'a ka hakilitigiya sɔrɔsira yira u la.

28U sara hakilitanya kosɔn,

u halakira u ka miiribaliya kosɔn.

29Jɔn yɛlɛla ka taga sankolo la ka hakilitigiya minɛ

ka jigi n'a ye ka bɔ sanfɛ?

30Jɔn tagara kɔgɔji kɔfɛ ka hakilitigiya sɔrɔ

k'a falen ni sanu ye ka segi n'a ye?

31Mɔgɔ si t'a sɔrɔsira lɔn,

hali mɔgɔ kelen yɛrɛ t'a fɛ k'a sira taama.

Ala be hakilitigiya di Isirayɛlidenw ma

32Nga Ala min be koo bɛɛ lɔn,

ale sera k'a lɔn a hakili barika la.

A ye dugukolo labɛn k'a to kudayi,

a ye seen naani fɛɛnw kɛ a kan.

33A be yeelen wele, a yɛrɛyɛrɛtɔ be sɔn a ta ma.

A b'a ci, yeelen be bɔ ka taga.

34Lolow nisɔndiyanin be manamana u lɔyɔrɔw la.

35A b'u wele, u b'a jaabi ko: «Naamu!»

U be manamana u Danbaga ye nisɔndiya la.

36O Danbaga nin ye an ka Ala ye,

a ɲɔgɔn te yen fana.

37Sira min be taga hakilitigiya yɔrɔ la, ale lo b'o lɔn.

A y'a yira a ka baarakɛla Yakuba kɔmɔgɔw la,

a y'a yira a ka mɔgɔ kanunin Isirayɛli deenw na.

38K'a ta o waati le ma, mɔgɔw b'a ye dugukolo kan,

a nana to adamadenw cɛma.

ALA KA KUMA

© 2008 Alliance Biblique du Burkina Faso

More Info | Version Index