Search form

Bar 4

1Hakilitigiya be sɔrɔ Ala ka sariyaw kitabu le kɔnɔ.

Ala ka sariya lo,

min be seen kan kudayi.

Mɔgɔ minw bɛɛ be nɔrɔ a la,

olu be taga kisili yɔrɔ la.

Minw b'a ye k'a to yen,

olu bena sa.

Ladilikuma

2Yakuba kɔmɔgɔw,

aw ye segi ka nɔrɔ a la!

Aw ye yeelen sira ta!

Aw ye taga kɛnɛ faan fɛ!

3Aw kana aw ka kunkɔrɔtako to mɔgɔ wɛrɛw ye,

aw kana aw ka tɔnɔ di siya wɛrɛ ma.

4Isirayɛlidenw, an dagamunin lo

bari an be Ala sago lɔn!

Ala ka jama dususaaloko

Ladili Isirayɛlidenw ma

5Ne ka mɔgɔw, aw k'aw jaa gwɛlɛya,

Isirayɛli tɔgɔ be aw minw kan!

6Aw feerela siya wɛrɛw ma,

o kuun tun te aw halakiko ye.

Aw ye Ala dusu dimi le,

o kama, a y'aw don aw juguw bolo.

7Bari sanni aw ka saraka bɔ Ala ye,

aw y'o kɛ jinaw ye k'aw Danbaga darabɔ.

8Aw ɲinɛna waati bɛɛ Ala kɔ,

min y'aw balo.

Aw y'aw bamuso nii tɔɔrɔ kosɔbɛ,

min ye Zeruzalɛmu ye.

9O dugu nin ye Ala ka dimi sintɔ ye aw ma, a y'a fɔ ko:

Zeruzalɛmu b'a kɔnɔ mɔgɔw ladi

«Siyɔn laminiduguw, aw ye mɛnni kɛ,

Ala ye tɔɔrɔba la ne kan.

10Masaba ye ne deenw bila ka taga jɔnya la, ne y'o ye.

11Ne tun y'u lamɔ ni nisɔndiya ye!

Ne ɲanasisinin y'u taatɔ ye, n dusu kasinin.

12Ne kɛra i ko muso min cɛɛ sara,

ne bɔnɔna n deen bɛɛ la,

mɔgɔ si kana nisɔndiya o kosɔn!

U ka hakɛ kɛra sababu ye ne tora n kelen na,

u jɛngɛna ka Ala ka sariya to yen.

13U ma sɔn a ka fɔtaw ma,

u m'a ka kuma bato.

A ye siratilennin min yira u la,

u ma o taama.

14Siyɔn laminiduguw, aw ye na!

Aw k'aw hakili to a la

ko Masaba ye ne deenw bila ka taga jɔnya la.

15A ye siya dɔ ci u kama ka bɔ yɔrɔjan,

siya malobali minw be kaan wɛrɛ fɔ,

u te mɔgɔkɔrɔbaw boɲa,

u te makari denmisɛnw na.

16U ye ne, firiyamuso dencɛw minɛ ka taga n'u ye,

minw koo ka gwɛlɛ u bamuso ma.

U ye ne denmusow bɔsi n na ka n to n kelen.

Zeruzalɛmu b'a ka mɔgɔw jaa gwɛlɛya

17«N deenw, ne be se k'aw dɛmɛ cogo di?

18Min ye tɔɔrɔ nunu la aw kan,

ale lo bena aw bɔsi aw juguw bolo.

19N deenw, fɔɔ aw ka sira minɛ!

Ne kɔni, ne tora n kelen, mɔgɔ te ne fɛ yan.

20Ne ye hɛrɛlon fani bɔ n kaan na,

ne ye dusukasifani le don ko n be Ala daali.

Ne bena dɛmɛ ɲini Masaba fɛ n sii bɛɛ la.

21N deenw, aw k'aw jaa gwɛlɛya!

Aw ka dɛmɛ ɲini Ala fɛ.

A bena aw kisi ka bɔ aw tɔɔrɔbagaw bolo.

A bena aw bɔ aw juguw bolo.

22Ne kɔni jigi lanin be Masaba kan

ko a bena aw kisi.

Ala senuman y'a yira ne la ka n nisɔndiya

ko yanni dɔɔni a bena makari aw la.

23Ne ɲasisinin y'aw taatɔ ye,

n dusu kasinin.

Nga Ala bena aw segi ne ma nisɔndiyaba la,

aw bena to yan kudayi.

24Siyɔn laminiduguw ɲaa b'a la

ko aw minɛna ka taga jamana wɛrɛ la.

Nga yanni dɔɔni u ben'a ye,

Masa Ala bena aw kisi ni sebagaya kabakoman ni nɔɔrɔ ye.

25N deenw, aw ka Ala ka dimi muɲu.

Aw juguw b'aw tɔɔrɔla,

nga yanni dɔɔni aw ben'a ye k'u halakira,

aw bena aw seenw la u tɔngɔrɔ kan.d

26N deen barikatanw,

aw taamana sira kan,

kabakuru ka ca min kan,

u y'aw minɛ ka taga n'aw ye i ko begɛnw,

juguw ye minw soɲa.

27N deenw, aw jaa kana tigɛ!

Aw ka dɛmɛ ɲini Ala fɛ.

Ale min y'a kɛ aw tagara o yɔrɔ la,

ale hakili bena to aw la.

28Aw tun y'a latigɛ ko aw bena jɛngɛ ka bɔ Ala ka sira la.

N'aw nimisara tuma min na,

aw ka jija k'a ɲini kosɔbɛ ka tɛmɛ fɔlɔ kan!

29Bari min ye tɔɔrɔ nunu la aw kan,

ale bena na aw kisi, k'aw nisɔndiya kudayi.»

Zeruzalɛmu dususaaloko

30Zeruzalɛmu, i jaa gwɛlɛya!

Ala bena i dusu saalo,

ale min y'i tɔgɔ la.

31Mɔgɔ minw ye kojugu kɛ i la,

ka nisɔndiya i benni la,

bɔnɛ ye u ta ye!

32I deenw kɛra jɔɔnw ye dugu minw kɔnɔ,

bɔnɛ ye u ta ye!

Dugu min mɔgɔw y'u minɛ,

bɔnɛ ye o ta ye!

33Bari, a nisɔndiyara i benni la

k'a yɛrɛ tanu i cɛnko la.

A dusu fana bena kasi a yɛrɛ halakiko la.

34A kɔnɔ mɔgɔw ka ca,

o ye kunkɔrɔta sababu ye a fɛ.

Nga ne Ala ben'a kɛ a be bɔnɔ o la,

a ka yɛrɛboɲa bena yɛlɛma ka kɛ dusukasi ye.

35Ne Masaba bena tasuma mana a la,

o ben'a halaki,

a bena to ten fɔɔ waatijan.

A bena kɛ jinaw ka sigiyɔrɔ ye

waatijan kɔnɔ o kɔfɛ tugu.

36Zeruzalɛmu, filɛli kɛ kɔrɔn fɛ,

Ala be nana ni nisɔndiya min ye, i k'o ye.

37I deenw natɔ filɛ,

i tun ye minw taatɔ ye.

U be nana ka bɔ faan bɛɛ,

k'a ta kɔrɔn fɛ fɔɔ ka ta'a bila tileben fɛ.

U lajɛnna Ala ka kuma barika la,

u nisɔndiyanin, Ala ka sebagaya kosɔn.

ALA KA KUMA

© 2008 Alliance Biblique du Burkina Faso

More Info | Version Index