Search form

Sad 24

Furusako

1- «Ni cɛɛ dɔ ye muso dɔ furu, o kɔfɛ, muso nin nigɛ nana bɔ a la, bari a ye koo dɔ kɛ min y'a maloya, n'a ye furusasɛbɛ dilan k'a d'a ma, ani k'a gwɛn ka bɔ a ka soo kɔnɔ, 2ni muso nin bɔr'a fɛ ka taga furu cɛɛ wɛrɛ fɛ, 3n'a nigɛ fana nana bɔ o tigi la fana, n'o ye furusasɛbɛ dilan k'a d'a ma, k'a gwɛn ka bɔ a ka soo, walima n'o cɛɛ nin sara, 4cɛɛ fɔlɔ min tun y'a gwɛn, ale te se k'a ta tugu, bari a nɔgɔnin lo o cɛɛ nin faan fɛ. O koo ɲɔgɔn man di Masaba ye fewu. Masaba aw ka Ala be jamana min dira aw ma, aw kana hakɛ kɛ a kɔnɔ.

Kɔɲɔcɛ ka koo

5«Kɔɲɔcɛ man kan ka taga kɛlɛ la, ani a man kan ka ta forobabaara si la. A ka kan ka to a ka soo kɔnɔ saan kelen k'a muso nisɔndiya.

6«Kana mɔgɔ wajibiya k'a ka wugu, walima a ka wuguden minɛ i ka juru kama, bari o be kɛ sababu ye o tigi te balo.

7- «Ni aw Isirayɛlidenw dɔ y'a balima dɔ minɛ k'a kɛ jɔɔn ye, walima k'a feere, o tigi ka kan ka faga. O la, aw bena kojugu bɔ aw cɛma.

8- «Aw k'aw yɛrɛ kɔlɔsi farisogobana koo la: ne ye kuma minw fɔ sarakalasebagaw ye, minw ye Levi kɔmɔgɔw ye, ni u bena o fɔ aw ye, aw k'o bɛɛ bato. 9- Masaba aw ka Ala ye fɛɛn min kɛ Miriyama na k'aw to sira kan aw bɔnin kɔ Ezipiti jamana na, aw k'aw hakili to o la.

10- «N'i ye fɛɛn dɔ juru don i tɔɲɔgɔn na, kana don a ka soo kɔnɔ k'a ka fɛɛn dɔ ta i ka juru nɔɔ na. 11To kɛnɛma, i ye juru don mɔgɔ min na, ale lo bena bɔ k'a bololafɛn dɔ d'i ma juru nɔɔ na.

12«N'o tigi ye fantan ye, i ye fani min ta juru nɔɔ na, o kana si e fɛ. 13Taga o fani nin d'a tigi ma tile bentuma na, waasa a ka se ka la ka ɲa. O la, a bena duba kɛ i ye, Masaba aw ka Ala bena o jati fana kotilennin ye.

Baaradenw ka koo

14- «Kana i ka baaraden dɛsɛbagatɔ fantan tɔɲɔ, i balima lo wo, walima lonan wo, min siginin be aw ka duguw dɔ la. 15I b'a ka sara d'a ma loon o loon sanni tile ka ben, bari fantan lo, a kɔrɔtɔnin be k'a ka sara sɔrɔ. N'o tɛ, a bena i jalaki Masaba ɲana, o bena kɛ hakɛ ye i fɛ.

Bɛɛ n'a kunko

16- «Faaw tena faga u deenw nɔɔ na, deenw fana tena faga u faaw nɔɔ na. Mɔgɔ kelen kelen bɛɛ bena faga a yɛrɛ ka hakɛ le kosɔn.

Fantanw dɛmɛko

17- «Aw ka lonan, ni falatɔ minɛ ni tilenninya ye, aw kana firiyamuso ka fani ta aw ka juru nɔɔ na. 18Aw k'aw hakili to a la ko aw tun ye jɔɔnw ye Ezipiti jamana na, ko Masaba aw ka Ala y'aw hɔrɔnya. O kosɔn, ne b'a fɔ aw ye ko aw ka kuma nin bato.

19- «N'i b'i ka suman tigɛra foro kɔnɔ, n'i tɛmɛna dɔ kan, n'i m'o ta, i kana segi ka taga o ta tugu. O bena kɛ lonan, ni falatɔ, ani firiyamuso ta ye, janko Masaba aw ka Ala be barika don i ka baara bɛɛ la. 20N'i y'i ka olivuyiriw yuguyugu, deen minw tora yen, kana segi k'o tigɛ tugu. O bena kɛ lonan, ni falatɔ, ani firiyamuso ta ye. 21N'i b'i ka *ɛrɛzɛn bɔra foro kɔnɔ tuma min na, deen minw tora, kana segi k'u tigɛ. O bena kɛ lonan, ni falatɔ, ani firiyamuso ta ye. 22Aw k'aw hakili to a la ko aw tun ye jɔɔnw ye Ezipiti jamana kɔnɔ. O kosɔn, ne b'a fɔ aw ye ko aw ka kuma nin bato.

ALA KA KUMA

© 2008 Alliance Biblique du Burkina Faso

More Info | Version Index