Search form

Waa 6

1Ne ye kojugu dɔ wɛrɛ ye diɲɛ kɔnɔ, min be adamaden sigɛn kosɔbɛ. 2O ye nin ye: Ala b'a nɔgɔya mɔgɔ dɔ ye, ka nafolo d'a ma, a b'a boɲa fana, fɛɛn min ka d'a ye, a b'o bɛɛ sɔrɔ. Nga, Ala t'a to a b'o diya bɔ, fɔɔ mɔgɔ wɛrɛ. O fana ye kabako ye. Koo lo min be digi adamaden na.

Sijan sɔrɔ

3Mɔgɔ min ye deen caaman wolo, ka sijan sɔrɔ, nga a sii n'a jaɲa bɛɛ, a ma hɛrɛ sɔrɔ a kɔnɔ. Kaburu yɛrɛ t'a fɛ. Deen min sanin wolola, ne ko ale ta ka fisa n'o tigi ta ye. 4Bari deen nin woloko ma foyi ɲa, a wolola, a ma kɛnɛ ye, a tɛmɛna. A tɔgɔ fana tununa. 5A ma tile ye, a ma koo lɔn fana. Ale be lafiɲɛ na ka tɛmɛ dɔ nin kan. 6Hali n'a tun ye saan waa fila kɛ sii la, n'a ma hɛrɛ sɔrɔ, nafa jumɛn b'o la? U bɛɛ bena taga yɔrɔ kelen na.

Adamaden ka wasabaliya

7Adamaden be baara minw bɛɛ kɛ,

a b'o kɛ a kɔnɔbara le kama.

A daa nin do tena fa ka ye.

8Ne ko, hakilitigi ka fisa ni naloman ye cogo di?

fantan ka se a yɛrɛ minɛcogo la mɔgɔ tɔw cɛma,

o be mun ɲa?

9I bololafɛn k'i wasa,

o ka fisa ni miiri caaman ye.

O fana ye kabako dɔ ye,

a be i n'a fɔ mɔgɔ min b'a fɛ ka fɔɲɔ mara.

10Fɛɛn o fɛɛn be yen,

o bɛɛ be n'u tɔgɔ ye ka ban.

Adamaden ye fɛɛn min ye,

o lɔnnin lo.

A te se ka sɔsɔli kɛ ni fangatigi ye.

11Ni kuma cayara,

a faamubali be caya fana.

Adamaden ka tɔnɔ ye jumɛn ye o la?

12Ne ko, fɛɛn min ka ɲi adamaden ma a sii la, jɔn b'o lɔn? A be min na ten n'a tɛmɛcogo te faamu, i n'a fɔ suma. Koo minw bena kɛ a kɔfɛ diɲɛ na, jɔn be se k'o fɔ a ye?

ALA KA KUMA

© 2008 Alliance Biblique du Burkina Faso

More Info | Version Index