Search form

Waa 7

Hakilitigiya nafa

1- Tɔgɔɲuman ka fisa ni tulu kasadiman ye.

Mɔgɔ salon ka fisa n'a wololon ye.

2Ka taga sangayɔrɔ la,

o ka fisa ka taga ɲanagwɛyɔrɔ la.

Bari, o ye bɛɛ labanyɔrɔ ye.

Mɔgɔw ka kan ka miiri o la.

3Dusukasi ka fisa ni nisɔndiya ye.

A be mɔgɔ ɲaa kumu,

nga a b'a ladi.

4Hakilitigi be miiri saya la,

nga naloman be miiri nisɔndiya le la.

5Ka mɛnni kɛ hakilitigi ka ladili la,

o ka fisa k'i tulo malɔ naloman ka dɔnkili la.

6Kala be mankan min kɛ tasuma bolo daga kɔrɔ,

o ni naloman yɛlɛkan bɛɛ ye kelen ye.

O fana ye kabako ye.

7Tɔɔrɔ be se ka hakilitigi kɛ naloman ye.

Bonyafɛn fana be se ka hakilitigi ka hɔrɔnya bɔsi a la.

8Ka koo laban ye,

o ka fisa n'a daminɛ ye.

Muɲuli ka fisa ni yɛrɛboɲa ye.

9- Kana kɔn k'i dusu gwan,

bari dusugwan ye nalomanw ta ye.

10Kan'a fɔ ko:

«Mun na fɔlɔfɔlɔ tile ka fisa

ni sisan ta ye?»

Bari, o te hakilitigi ka ɲiningali ye.

11Hakilitigiya ka ɲi, i ko cɛɛn.

Mɔgɔ minw be nii na,

olu be tɔnɔ sɔrɔ a la.

12Bari, hakilitigiya be mɔgɔ sutara i ko wari.

O la, hakilitigi ka lɔnniya b'a sii sabati.

O y'a ka tɔnɔ ye.

13Ala ka baara jati minɛ:

A ye fɛɛn min kuru,

jɔn be se k'o tilen?

14Hɛrɛ loon na, i ka nisɔndiya.

Bɔnɛ loon na, i ka sigi ka miiri.

O koo fila bɛɛ be bɔ Ala fɛ,

a kɛra ten, adamaden kana foyi faamu a yɛrɛ kɔfɛko la.

15Ne ka diɲɛlatigɛ kabakoman nin na,

ne ye koo bɛɛ ye:

mɔgɔtilennin be sa joona,

mɔgɔjugu n'a ka juguya bɛɛ,

a be sijan sɔrɔ.

16Kana i yɛrɛ jati mɔgɔtilennin ye ka tɛmɛ.

Kana i yɛrɛ kɛ lɔnnikɛlaba fana ye.

Mun na i b'i yɛrɛ halakira?

17Kana juguya ka dama tɛmɛ.

Kana kɛ naloman fana ye.

Mun na i b'i yɛrɛ faga n'i sawaati ma se fɔlɔ?

18A ka ɲi, e be o koo minɛ ka ɲa dɛ!

Nga i kan'a to dɔ nin be bɔ i bolo.

Bari n'i be siran Ala ɲa,

i ben'a fila bɛɛ kɛ ka kɛɲɛ.

19Lɔnnikɛla ka lɔnniya be see d'a ma

ka tɛmɛ dugu kɔnɔ fangatigi tan kan.

20Mɔgɔ te dugukolo kan min tilennin lo,

n'a be koɲuman dama kɛ, n'a te kojugu kɛ ka ye.

21O la, i kana i tulo malɔ mɔgɔw ka fɔtaw bɛɛ la,

waasa i ka baaraden ye kumajugu min fɔ i kosɔn,

i kana o mɛn.

22Bari, ele yɛrɛ b'a lɔn ko siɲɛ caaman na,

i ye dɔw tɔgɔjugu fɔ.

Lɔnniya sɔrɔ man di

23Ne ye koo nunu bɛɛ jati minɛ ni hakilitigiya ye. Ne y'a fɔ ko ne bena kɛ lɔnnikɛla ye. Nga, o yɔrɔ ka jan n na.

24Koo min be yen, a kɔrɔ ka bon,

a ka dun.

Jɔn be se k'a kɔrɔ lɔn?

25Ne ko ne bena lɔnniya ɲini

ka koo kɛtaw sɛgɛsɛgɛ, k'u filɛ ka ɲa,

ka se k'u kuun lɔn.

Ne y'a faamu ko ka kɛ mɔgɔjugu ye,

o ye hakilitanya ye,

ko nalomanya ye fatɔya ye.

26Ne y'a kɔlɔsi k'a ye ko

musoe min be i ko jaan,

n'a kɔnɔnako be i ko jɔɔ,

a be mɔgɔ siri i ko jɔrɔkɔ,

o ka jugu ni saya ye.

Mɔgɔ min koo ka di Ala ye,

o tigi be se k'a yɛrɛ bɔsi a bolo.

Nga a be kojugukɛla kɔni sɔrɔ.

27Waajulikɛla ko: «Ne ye min lɔn, o ye nin ye. Ka koow jati minɛ kelen kelen ɲɔgɔn kɔ waasa k'u kɛkun lɔn.

28O ye koo ye n be min na kudayi, n t'a lɔnna.

Nga n y'a ye ko cɛɛ waa kelen cɛma,

n ye mɔgɔ kelen sɔrɔ.

Musow bɛɛ cɛma, n ma foyi sɔrɔ.

29Ne ye min ye, o filɛ nin ye:

ko Ala ye adamaden dan k'a kɛ mɔgɔtilennin ye.

Nga ale yɛrɛ tora k'a ka koow ɲagami.»

ALA KA KUMA

© 2008 Alliance Biblique du Burkina Faso

More Info | Version Index