Search form

Waa 8

Lɔnnikɛla kɛcogo, masacɛ ɲakɔrɔ

1Jɔn ye hakilitigi ye n'a be koo kɔrɔ lɔn?

Lɔnniya be mɔgɔ ɲaa yɛlɛ,

k'a ɲada cogo yɛlɛma.

2Ne ko: sɔn masacɛ ka fɔta ma. Bari, e y'i daa di Ala ma o la. 3Kana kɔrɔtɔ ka ban a ka koo la. Kana i kuun gwɛlɛya ka kojugu kɛ. Bari, koo o koo y'a diya, a bena o kɛ. 4Sabu, a ka kuma ye faamakuma ye. Jɔn be se k'a fɔ a ma ko: «I be mun le kɛra?»

Adamaden te foyi lɔn siniko la

5Mɔgɔ min be sariya bato,

o tigi te don kojugu la.

Hakilitigi b'a lɔn ko kiti tigɛwaati be yen.

6Bari koo bɛɛ n'a kitiwaati lo.f

Adamaden ka kojugu kɛra doni gwiliman ye a kunna.

7Fɛɛn min bena kɛ, a t'o lɔn.

Jɔn be se k'a fɔ a ye ko koow bena kɛ ten, walima ten?

8Adamaden si te se k'a yɛrɛ nii bɔko bali.

A te se k'a yɛrɛ kisi a salon ma.

Kɛlɛden te se ka labila kɛlɛ waati la.

Mɔgɔjuguw ka juguya tena se k'u kisi fana.

Adamaden ka nisɔndiyako

9Koo minw bɛɛ be kɛra dugukolo kan, ne y'o bɛɛ jati minɛ k'a ye ko waati dɔ, adamaden le be kuntigiya kɛ a tɔɲɔgɔn kan k'a tɔɔrɔ.

10Ne ye mɔgɔjuguw ye, u y'o suu don ka ɲa. U tun be to ka taga Ala ka soo kɔnɔ. Dugumɔgɔw ɲinɛna u ka kɛwaliw kɔ. O fana ye kabako ye.

11Ɲagwan min ka kan ka kojugu juru sara, o t'a tigi sɔrɔ a kɛtuma na, o la, kojugukɛ nigɛ be to adamaden dusu la tuma bɛɛ. 12- Mɔgɔjugu be se ka kojugubaba caaman kɛ, a fana be sijan sɔrɔ. O bɛɛ n'a ta, ne y'a lɔn ko mɔgɔ minw be siran Ala ɲa, k'olu bena hɛrɛ sɔrɔ u ka Alaɲasiran kosɔn. 13Nga mɔgɔjugu kɔni tena hɛrɛ sɔrɔ. A sii tena taga ɲa, a ka koo bena tɛmɛ i n'a fɔ suma. Bari a te siran Ala ɲa.

14Kabako wɛrɛ be kɛra dugukolo kan. Mɔgɔtilennin dɔw be yen, o b'u minɛ i n'a fɔ mɔgɔjuguw, ka mɔgɔjugu dɔw minɛ i n'a fɔ mɔgɔtilenninw. Ne k'o fana ye koo faamubali le ye. 15O la, ne b'a fɔ tuma bɛɛ ko ka nisɔndiya, o le ka ɲi. Bari, fɛɛn min ka ɲi adamaden ma dugukolo kan, o ye a ka dumuni kɛ, ka minni kɛ ka nisɔndiya. O n'a ka baara be taga ɲɔgɔn fɛ a sii la, Ala ye min d'a ma dugukolo kan.

Adamaden ka lɔnniya danyɔrɔ

16Ne tun b'a fɛ ka lɔnniya ɲini tuma min na ni n dusu bɛɛ ye, ka adamadenw ka kɛwaliw jati minɛ dugukolo kan. Suu fara tile kan, adamaden te sinɔgɔ. 17Ne ye Ala ka koo kɛnin bɛɛ jati minɛ k'a ye ko koo minw be kɛra dugukolo kan, ko adamaden te se k'o lɔn. A b'a yɛrɛ sigɛn o lɔnko la, a do ten'a lɔn. Hali ni lɔnnikɛla y'a fɔ ko a b'a lɔn, a bena to a faamubaliya la.

ALA KA KUMA

© 2008 Alliance Biblique du Burkina Faso

More Info | Version Index