Search form

Zeb 1

Yɛrɛ kɔlɔsi joko ma

Babilɔnikaw ka masacɛ tun bena mɔgɔ minw minɛ ka taga n'u ye Babilɔni, Ala tun y'a fɔ Zeremi ye ko a ka min fɔ u ye, Zeremi y'o kɛ bataki ye k'o ci u ma. O filɛ nin ye ko:

1Aw ye hakɛ kɛ Ala faan fɛ. O kosɔn, Babilɔni masacɛ Nabukodonozɔri bena aw minɛ ka taga n'aw ye Babilɔni. 2N'aw sera o yɔrɔ la, aw bena to yen saan caaman kɔnɔ, ka waatijan kɛ yen, fɔɔ saan kɛmɛ fila ni bi seegi ɲɔgɔn. Nga o kɔ, ne ben'a kɛ aw be bɔ o yɔrɔ la hɛrɛ la. 3Aw k'a lɔn sisan ko aw bena batofɛnw ye Babilɔni, minw dilanna ni yiri ye, ni warigwɛ ani sanu ye, ni mɔgɔw b'u ta u gaman kan, batofɛn nunu be siranya bila siyaw la. 4O la, aw k'aw yɛrɛ kɔlɔsi aw ka koo bɛɛ la, aw fana kana kɛ i n'a fɔ o siya nunu. Aw kan'a to o batofɛn nunu siranya k'aw minɛ. 5N'aw ye jama ye tuma min na n'u be biri u ɲafɛ ani u kɔfɛ, aw k'a fɔ aw dusu la ko: «An ka kan ka biri e Matigi le ɲakɔrɔ!» 6Bari ne ka mɛlɛkɛ bena to aw fɛ k'aw kɔlɔsi ani k'aw tanga.

Joko man kan ka zuwifuw fili

7Baarakɛla dɔ le ye batofɛn nunu nɛnkun lɛsɛ. Siga t'a la, batofɛn nunu mɔnna ni sanu, ani warigwɛ ye. Nga namarafɛnw lo, u te se ka kuma. 8Sunguru b'a yɛrɛ lalaga ka ɲa cogo min na, o cogo kelen na mɔgɔ nunu bɛ sanu kɛ 9ka fugulan dilan k'a biri u ka batofɛnw kuun na. Tuma dɔ la, sarakalasebagaw yɛrɛ be sanu ni warigwɛ soɲa u fɛ k'u yɛrɛ makow ɲa n'o ye. 10U yɛrɛ be dɔ di joso kɔnɔ kakalamusow ma. O batofɛn minw dilanna ni yiri ye, ni warigwɛ ani sanu ye, u be fani don u kaan na i n'a fɔ mɔgɔw. 11Nga u te se k'u yɛrɛ tanga soon ni bagabaga ma. Ni u ye fani ɲanaman don u kaan na, 12joso kɔnɔ gwangwan be la o kan, n'u ɲada, o tigi be to k'o jɔsi. 13Masabere b'u bolo, i n'a fɔ mara kuntigiw, k'a sɔrɔ hali ni mɔgɔ dɔ donna u gasi la, u te se k'o tigi faga. 14Murujan ni jende b'u kinibolo la, o bɛɛ n'a ta, u tɛ se k'u yɛrɛ tanga kɛlɛdenw, walima soonw ma. A be lɔn o le la k'u te batofɛn ɲanamanw ye. O la, aw kana siran u ɲa!

15Minan min cira, o te foyi ɲa cogo min na, 16u ka batofɛnw be ten fana, n'u y'u bila soow kɔnɔ. O soo nunu donbagaw seen be gwangwan min wili, o be sigi u ɲaa kan. 17Ni mɔgɔ min ye kojugu kɛ masacɛ la, u b'o tigi datugu cogo min na k'a fagalɔn kɔnɔ, sarakalasebagaw be bɔ ka jobon datugu k'a sɔgɔ ka ɲa ten fana janko soon kana don k'u ta. 18Olu yɛrɛ mako be yeelen min na u yɛrɛ ka soo, u be fitinɛw mana u ka josow kɔnɔ, nga u ka batofɛnw te se ka foyi ye. 19U be i n'a fɔ joso tutunan, a be fɔ min ma ko a kɔnɔna tolila. Bagabaga be bɔ duguma k'u dumu, olu n'u ka faniw, u te bɔ o kala ma! 20Sisi min be bɔ joso kɔnɔ, o y'u ɲada fin. 21Toolen ni naganaganiw, ani kɔnɔ wɛrɛw, hali jakumaninw be na sigi u kan, u kuun kan yɛrɛ. 22O la, aw k'a lɔn ko batofɛn gwansanw lo, aw kana siran u ɲa!

23U y'u mɔn ni sanu min ye janko k'u masiri, n'u ma u jɔsi k'a nɔgɔ bɔ, olu tena manamana cogo si la. Bari mɔgɔ y'u yelen k'u dilan tuma min na, u ma bɔ o kala ma. 24Mɔgɔ b'u san sɔngɔgwɛlɛn na, k'a sɔrɔ ninakili t'u la haali dɔɔni. 25Seenw t'u fɛ minkɛ, wajibi lo u b'u ta u gaman kan. O le b'a yira mɔgɔw la ko nafa t'u la. Hali u sɔnbagaw be maloya. 26Tiɲɛ na, ni batofɛn benna duguma, u ka kan k'a kɔrɔta. N'u y'a lɔ, a te se ka taga yɔrɔ si a yɛrɛ ma. N'u y'a la, a tɛ se ka wili fana. N'u b'u sɔnna, a be i n'a fɔ u be fɛɛnw dira suu ma. 27Fɛɛn minw be faga batofɛnw ye, sarakalasebagaw yɛrɛ b'u feere janko ka nafa sɔrɔ o la. Sarakalasebagaw musow b'o dɔ mara yan n'u b'o di fantanw ni banabagatɔw ma. 28Hali muso minw be landa la, walima jigibagatɔ, olu b'u jaa gwɛlɛya ka maga sarakafɛn nunu na. O koow b'a yira ko batofɛn ɲanamanw tɛ, aw kana siran u ɲa!

Batofɛnw tɛ

29Mun na u b'u wele batofɛnw? K'a sɔrɔ musow le b'u sɔn, fɛɛn yirilaman ni warigwɛlaman, ani sanulaman nunu. 30Sarakalasebagaw be sigi batofɛn nunu ka soow kɔnɔ, u ka fani faranfarannin, u kunlakolon, u kuun n'u bonbosi linin.a 31U be kule ka mankan kɛ u ka batofɛnw ɲakɔrɔ i n'a fɔ mɔgɔ minw be sanga dumuni kɛra. 32Sarakalasebagaw be fani minw bɔ batofɛnw kan, u b'o di u musow n'u ka denmisɛnw ma. 33I be koɲuman kɛ u la wo, i be kojugu kɛ u la wo, u tena se k'o ɲɔgɔn segi i ma. U te se ka mɔgɔ kɛ masa ye, u tɛ se k'a jigi ka bɔ fanga la fana. 34O cogo kelen na, u te se ka wari di mɔgɔ ma k'a kɛ nafolotigi ye. Ni mɔgɔ dɔ m'a ka dajuru sara u ye, u tena o tigi ɲininga o la fana. 35U te se ka mɔgɔ kisi saya ma, u te se ka barikatan bɔsi k'a bɔ setigi bolo fana. 36U te se ka fiɲɛntɔ ɲaa yɛlɛ. Mɔgɔ min be gwɛlɛya la, u te se k'a bɔ o la. 37U te makari firiyamuso la, u te koɲuman kɛ falatɔ ye. 38O minan yirilaman minw mɔnna ni sanu ani warigwɛ ye, u bɔnin be kabakuruw fɛ minw cira ka bɔ kulu la. U sɔnbagaw bena maloya. 39I be se k'u jati batofɛn ɲanamanw ye cogo di, walima k'u koo fɔ ko batofɛn lo?

40Ka fara o kan, Babilɔnikaw yɛrɛ b'u dɔgɔya do. U be taga ni bobo ye u ka batofɛn Bɛli fɛ, k'a daali ko a k'a to bobo nin ka se ka kuma, k'a sɔrɔ Bɛli te se ka foyi faamu. 41Mɔgɔ nunu yɛrɛ t'a faamu k'a ye ko batofɛn nunu te se ka foyi ɲa, k'u ka kan k'u fili. 42Musow b'u cɛɛ siri ni juru ye ka taga sigi siraw daa la janko ka sumanbugu jɛni wusulan ye.b 43Ni tɛmɛbaga dɔ y'u dɔ wele ka jɛn n'a ye, o muso nin be yɛlɛ a tɔɲɔgɔn na bari mɔgɔ si m'ale wele, k'a ka juru foni. 44Batofɛn nunu ka koo bɛɛ ye galon le ye. O la, i be se k'u jati fɛɛn ɲanamanw ye cogo di, walima k'a fɔ n'i daa ye ko batofɛn ɲanamanw lo?

45Baarakɛlaw ni sanufagalaw le y'u dilan. Bololabaarakɛla nunu b'a fɛ ka fɛɛn min jaa dilan, u be kɛ o dɔrɔn le ye. 46Minw yɛrɛ y'u dilan, olu sii tena caya ka tɛmɛ tɔw ta kan we! 47U ye minan minw dilan, olu be se ka kɛ batofɛn ɲanamanw ye cogo di? O la, u be namarako ni maloyako dɔrɔn le to u kɔmɔgɔw ye. 48Ni kɛlɛ wilila joo nunu kama, walima gwɛlɛya wɛrɛw, murutigiw be ɲɔgɔn ye janko k'a lɔn u bena taga yɔrɔ min na k'u yɛrɛ dogo n'u ka joow ye. 49Nunu te se k'u yɛrɛ kisi kɛlɛ ma, walima gwɛlɛyaw ma, mun na mɔgɔ te se k'a lɔn ko batofɛn ɲanamanw tɛ? 50Yiriminanw lo, minw mɔnna ni sanu ni warigwɛ ye. A be lɔn o le la k'u ye namarafɛnw dɔrɔn le ye. A bena gwɛ siyaw bɛɛ n'u ka masacɛw ye ko batofɛn ɲanamanw tɛ, mɔgɔ bololabaara lo, ko alaya si t'u la. 51A gwɛnin lo ko batofɛn ɲanamanw tɛ. Jɔn be se ka ban o la?

52U te se ka mɔgɔ kɛ masa ye jamana kunna, walima ka sanji di mɔgɔw ma. 53U te se k'u yɛrɛ ka koow ɲanabɔ. Ni mɔgɔ dɔ y'a tɔɲɔgɔn tɔɲɔ, u te se k'o tigi dɛmɛ fana. U te foyi ɲa. 54Kɔnɔnin minw be tɛmɛ sanfɛ, barika t'olu la cogo min na, u fana be ten. Batofɛn yirilaman nunu, minw mɔnna ni sanu ni warigwɛ ye, ni tasuma ye o josow dɔ ta, murutigiw be boli k'u yɛrɛ kisi, nga olu be jɛni pewu i n'a fɔ soo nin tutunanw, tasuma kɔnɔ. 55U te se ka wili masacɛ kama, walima u juguw kama. 56O la, mɔgɔ be sɔn cogo di k'a fɔ k'u ye batofɛn ɲanamanw ye, ani k'u jati ten?

See te batofɛn nunu ye

Batofɛn yirilaman minw mɔnna ni warigwɛ ni sanu ye, olu tɛ se k'u yɛrɛ kisi soonw ma, walima benkannikɛlaw ma. 57Mɔgɔw b'u ta ka sanu ni warigwɛ bɔ u la, ka taga n'u kannafani ye, u te se k'u yɛrɛ dɛmɛ fewu! 58Masacɛ min b'a ka jagwɛlɛya yira kɛlɛ la, ale ka fisa ni batofɛn namaratɔ nunu ye. Sokɔnɔfɛn nafaman fana ka fisa n'u ye. Bonda min be sokɔnɔfɛnw tanga soon ka don ma, walima masaso kɔnɔ tutunan yirilaman fana ka fisa n'u ye. 59Bari tile ni kalo, ani lolo minw be manamana, baara min dira u ma, u b'o kɛ a cogo la. 60Ni saan be manamana fana, a yeli ka nɔgɔ. Fɔɲɔ fana koo be ten, min be fiyɛ yɔrɔ bɛɛ. 61Ni Ala y'a fɔ sankabaw ka kɛ yɔrɔ bɛɛ tuma min na, u b'o kɛ ten. 62Tasuma min cira ka bɔ sanfɛ ka jigi kuluw ni yirituw halakili kama, min fɔr'a ye, a fana b'o kɛ. Nga batofɛn nunu te se ka suma ni fɛɛn nunu cogoya n'u fanga ye. 63I be se k'a lɔn o le la ko i man kan k'u jati batofɛnw ye, walima k'a fɔ n'i daa ye ko batofɛn ɲanamanw lo. Bari u te se ka mɔgɔ sara a ka kɛwaliw la, walima ka koɲuman kɛ mɔgɔ ye. 64Aw b'a lɔn ko batofɛn ɲanamanw tɛ, aw kana siran u ɲa!

65U te se ka masacɛw ta ɲa, u te se k'u ta cɛn fana. 66U te se ka kabakow yira siyaw la sankolo kɔnɔ, walima ka manamana i n'a fɔ tile, walima ka yeelen bɔ i n'a fɔ kalo. 67Kongosogow ka fisa n'u ye, olu be se ka boli ka taga dogo yɔrɔ dɔ la k'u yɛrɛ sutara. 68Ayiwa, fɛɛn bɛɛ b'a yira an na k'u te batofɛn ɲanamanw ye cogo si la. O kosɔn, aw kana siran u ɲa!

69Sulagwɛnnan be jeforo kɔnɔ cogo min na n'a te se ka foyi kɛ, o mɔgɔ nunu ka batofɛn yirilamanw fana be ten, minw mɔnna ni sanu ni warigwɛ ye. 70U be se ka suma ni ŋɔniyiri ye fana, kɔnɔw be sigi min kan nankɔ kɔnɔ. U be se ka suma ni suu ye, u ye min fili dibi la. 71Ni aw y'a ye tuma min na ko u ka fani ɲanamanw cɛnna, k'u cɛɲa bɔra u la, aw ben'a faamu k'u te fɛɛn ɲanamanw ye. A laban, bagabaga bena u dumu, u bena tila ka kɛ jamana ka maloyako ye. 72Mɔgɔtilennin, batofɛn te min fɛ, ale ka fisa bari maloya tena ale sɔrɔ.

ALA KA KUMA

© 2008 Alliance Biblique du Burkina Faso

More Info | Version Index