Search form

Bɔk 39

Sarakalasebagaw ka faniw dilanko

1U ye Yɔrɔ Senuman baarakɛfaniw dilan ni jese kɔlɔbolaman ye, ni jese wulenman, ni jesewulen cɔncɔn. U ye Arɔn ka sarakalasefaniw dilan, i ko Masaba tun y'a fɔ Musa ye cogo min na.

2U ye sarakalasebagaw kuntigi ka fani dilan ni jese kɔlɔbolaman, ni jese wulenman, ni jesewulen cɔncɔn, ani jese ɲanaman ye, ka sanu kɛ a la, 3U ye sanu gosi k'a pɛnpɛrɛn k'a tigɛtigɛ k'a kɛ i n'a fɔ jese, k'o ni jese kɔlɔbolaman, ani jese wulenman, ni jesewulen cɔncɔn, ani jese ɲanaman don ɲɔgɔn na, baaralɔnbaga ɲanaman y'u dan. 4U ye fɛɛn fila dɔw kɛ minw be fani daa fila nunu tugu ɲɔgɔn na a gamanw sanfɛ. 5Sarakalasebagaw kuntigi ka fani n'a cɛsirilan dancogo tun ye kelen ye. A tun baarala ni sanujese le ye, ni jese kɔlɔbolaman, ni jese wulenman, ni jesewulen cɔncɔn, ani jese ɲanaman, i ko Masaba tun y'a fɔ Musa ye cogo min na. 6U ye kabakuru kɔlɔbolaman dɔw dilan k'u don sanu kɔnɔ, ka Isirayɛli dencɛw tɔgɔw ɲɛgɛn u kan, i n'a fɔ u be taamasiɲɛ lafɛn kɛ cogo min na, 7k'o nɔrɔ sarakalasebagaw kuntigi ka fani gaman kan, a ka kɛ hakilijigifɛn ye Isirayɛli kɔmɔgɔw koo la, i ko Masaba tun y'a fɔ Musa ye cogo min na.

Disilafani dilanko

8U ye disilafani dilan ka kɛɲɛ ni sarakalasebagaw kuntigi ka fani ye. Baaralɔnbaga ɲanaman dɔ le y'o dilan ni sanujese ye, ni jese kɔlɔbolaman, ni jese wulenman, ni jesewulen cɔncɔn, ani jese ɲanaman. 9A faan naani bɛɛ tun ye kelen ye. A jaɲa n'a kɔnɔ boɲa bɛɛ bɛnna santimɛtɛrɛ mugan ni duuru ma. A tun kurunin be ka la ɲɔgɔn kan. 10U ye kabakuru sɔngɔgwɛlɛnw nɔrɔnɔrɔ a la, fɔɔ sira naani. Kabakuru minw tun be sira fɔlɔ kan, o tun ye kabakuru wuleman cɔncɔn ni kabakuru nɛrɛmuguman ani kabakuru binkɛnɛman ye. 11Sira filanan ta tun ye kabakuru bulaman sifa fila ani diyaman ye. 12Sira sabanan ta tun ye kabakuru bulaman ni kabakuru ɲɛgɛɲɛgɛnin ani ametisiti ye. 13Sira naaninan ta tun ye kabakuru binkɛnɛman, ni kɔlɔbolaman, ani kabakuru binkɛnɛman sifa wɛrɛ ye. U bɛɛ nɔrɔla sanu kɔnɔ. 14Kabakuru nunu tun ye tan ni fila ye ka kɛɲɛ ni Isirayɛli dencɛw daa ye. U ye Isirayɛli deen tan ni fila nunu kelen kelen bɛɛ tɔgɔ le sɛbɛn kabakuru nunu kelen kelen kan, i n'a fɔ taamasiɲɛ lafɛn be cogo min na. 15U ye jɔrɔkɔw dilan ni sanu yɛrɛ yɛrɛ ye i n'a fɔ juru, k'u kɛ disilafani na. 16U ye minɛfɛn fila dɔ kɛ ni sanu ye, ani ka bololanigɛ sifa dɔ dilan fila, o fana ye sanu ye, k'u siri disilafani dakun fila la. 17U ye sanujɔrɔkɔ fila nunu don bololanigɛ fila nunu na, disilafani dakunw na, 18ka jɔrɔkɔ dakun fila dɔ nunu don minɛfɛn fila nunu la, o minw be sarakalasebagaw kuntigi ka fani gaman kan a ɲafɛla la. 19U ye bololanigɛ sifa dɔ dilan deen fila ni sanu ye, k'u siri disilafani dakun fila dɔ nunu na kɔnɔna, sarakalasebagaw kuntigi ka fani kan, 20k'o ɲɔgɔn fila kɛ tugu ni sanu ye, k'u don sarakalasebagaw kuntigi ka fani gaman kɔrɔ faan fila la ɲafɛla la, a kalansira gɛrɛfɛ, a cɛsirilan sanfɛ. 21U ye juru kɔlɔbolaman siri disilafani nigɛ nunu na ka taga siri sarakalasebagaw kuntigi ka fani taw la, janko disilafani ka to sarakalasebagaw kuntigi ka fani cɛsirilan sanfɛ, a kana foni ka bɔ a ka fani na. U y'o bɛɛ kɛ i ko Masaba tun y'a fɔ Musa ye cogo min na.

Sarakalasebagaw ka fani tɔw

22Forocadennin min be sarakalasebagaw kuntigi ka fani jukɔrɔ, u y'o bɛɛ dan ni jese kɔlɔbolaman ye. 23U y'a kaan tigɛ cɛmancɛ la i n'a fɔ nigɛdeleke ta, k'a kaan nin sɔgɔ janko a kana faran. 24U ye gerenadiyiriden bisigiw dilan ni jese kɔlɔbolaman, ni jese wulenman, ni jesewulen cɔncɔn, ani jese ɲanaman ye, k'u siri foroca nin dagolo la, 25ka welenninw dilan ni sanu yɛrɛ yɛrɛ ye k'o don yiriden jaa nunu ni ɲɔgɔn cɛ foroca dagolo la k'a lamini. 26N'u ye welennin kelen don, u be yiridenbisigi kelen don, k'a kɛ ten, fɔɔ ka foroca nin dagolo bɛɛ lamini, u bena to ka min don ka baara kɛ, i ko Masaba tun y'a fɔ Musa ye cogo min na.

27U ye forocabaw dan Arɔn n'a dencɛw ye ni jese ɲanaman ye, 28ka sarakalasebagaw kuntigi ka kunmelekefani n'a ka fugulan masirifɛn kɛ ni jese ɲanaman ye, ani kurusi min danna ni jese ɲanaman ye. 29U ye cɛsirilan dan ni jese ɲanaman ye, ani jese kɔlɔbolaman, ni jese wulenman, ani jesewulen cɔncɔn, k'a ɲɛgɛn, i ko Masaba tun y'a fɔ Musa ye cogo min na.

30U ye yirifeerenbisigi dilan ni sanu yɛrɛ yɛrɛ ye ka sɛbɛnni kɛ a kan, taamasiɲɛ lafɛn cogo la ko: «Nin ye Masaba ta ye,» 31k'a siri kunmelekefani ɲafɛ ni juru kɔlɔbolaman ye, a ka to yen i ko Masaba tun y'a fɔ Musa ye cogo min na.

Fanibugu baara banko

32A kɛra ten, u ye Ɲɔgɔnkunbɛn fanibugu baara bɛɛ kɛ ka ban. Masaba tun ye min fɔ Musa ye, Isirayɛlidenw y'o bɛɛ kɛ tigitigi.

33O kɔ, u nana ni fanibugu n'a minanw bɛɛ ye Musa fɛ: a fani minɛfɛnw, n'a lɔgɔw, ani a banabiriw, n'a tutunanw, ani u jusigilanw, 34n'a kuun birifɛnw, sagajigi golo, u ye min wulen, ni golo dɔ minw ka kɛnɛ, n'a cɛtigɛfani, 35ani kɛsu, walakaw be min kɔnɔ, Masaba ka sariya sɛbɛnnin be minw kan, ani kɛsu talɔgɔw, n'a datugulan, 36ani tabali n'a minanw bɛɛ, ni buru min dira Masaba ma, 37ani fitinɛbilayɔrɔ sanu yɛrɛyɛrɛ, ni fitinɛdagaw, ni fitinɛ tulu, an'a minanw bɛɛ, 38sarakabɔyɔrɔ sanulaman, ni tulu mɔnta, ni wusulan kasadiman, ni fanibugu dalafani, 39ani sarakabɔyɔrɔ ziralaman n'a kɔnɔna ziratɛmɛ n'a talɔgɔw, an'a minanw bɛɛ, ni dagaba n'a jusigilan, 40ani luu laminifaniw, n'a lamini tutunanw, ani u jusigilanw, ani fanibugu dalafani, ni jurukisɛw, n'a gweenw, ani Ɲɔgɔnkunbɛn fanibugu minanw bɛɛ ye, 41ni Yɔrɔ Senuman baarakɛfaniw ye: sarakalasebaga Arɔn taw, ni a dencɛw ka kan ka fani minw don k'u ka sarakalasebaara kɛ.

42Masaba tun ye min fɔ Musa ye, Isirayɛlidenw y'o bɛɛ kɛ. 43Musa y'o baara bɛɛ filɛ ka ɲa k'a ye ko Masaba tun y'a fɔ cogo min na, k'u y'o bɛɛ kɛ ten. O kɔ, a ye duba kɛ u ye.

ALA KA KUMA

© 2008 Alliance Biblique du Burkina Faso

More Info | Version Index