Search form

Eze 25

Kirayakuma, amoniw kosɔn

1Masaba kumana ne fɛ ko: 2- «Adamaden, i ɲaa sin amoniw ma ka kiraya kɛ u kama. 3A fɔ u ye ko u k'u tulo malɔ ne Matigi, Masaba ka kuma na. Ne ko: Ne ka sigiyɔrɔ nɔgɔra tuma min na, ani Isirayɛli jamana lakolonyara tuma min na, ani Zuda mara mɔgɔw tagara jɔnya la loon min na, o waati la, aw y'a fɔ u koo la ko: ‹Aha!› 4O le kosɔn, ne bena aw don kɔrɔn fɛ mɔgɔw bolo k'aw kɛ u ta ye. Olu bena u ka fanibuguw lɔ aw ka yɔrɔ la ka kɛ u sigiyɔrɔw ye. U bena aw ka yiridenw dumu k'aw ka nɔnɔ min. 5Ne bena Araba dugu kɛ ɲɔgɔmɛw ka ɲiminikɛyɔrɔ ye, ka amoniw ka jamana kɛ sagadɛndɛnyɔrɔ ye. O tuma na, aw ben'a lɔn ko ne ye Masaba le ye.

6«Ne Matigi, Masaba ko: ‹Aw ye tɛgɛrɛ fɔ ka panpan ka nisɔndiya ni kɔnɔnajuguya ye Isirayɛlidenw ka bɔnɛ kosɔn minkɛ, 7o la, n bena wili aw kama k'aw don siya wɛrɛw bolo, u k'aw bololafɛnw cɛ. Ne bena aw bɔ siyaw cɛma. Jamana tena sɔrɔ aw tɔgɔ la tugu, ne bena aw halaki. O tuma na, aw ben'a lɔn ko ne ye Masaba le ye.› »

Kirayakuma, mowabuw kosɔn

8- Matigi, Masaba ko: «Mowabuw ni *Seyirikaw y'a fɔ ko Zuda ka soo kɛra i n'a fɔ siya tɔw. 9O la, ne bena Mowabu danyɔrɔw dugubabaw Bɛtiyesimɔti, ni Baalimeyɔn, ani Kiriyatayimu ci, olu minw ye u ka dugu ɲanamanw ye, k'u halaki. 10Ne bena jamana nin di kɔrɔn fɛ mɔgɔw ma k'a kɛ u ta ye, ka fara amoniw kan, ani k'a to amoniw tɔgɔ be tunu. 11Ne bena mowabuw ɲaa gwan. O tuma na, u ben'a lɔn ko ne ye Masaba le ye.»

Kirayakuma, edɔmuw kosɔn

12- Matigi, Masaba ko: «Edɔmuw y'u mɔnɛ bɔ Zuda ka soo la ka jalaki ben u yɛrɛ kan kosɔbɛ minkɛ, 13o la, ne Matigi, Masaba ko: Ne bena wili Edɔmu mara kama k'a mɔgɔw n'a begɛnw bɛɛ faga. K'a ta Teman fɔɔ ka taga se Dedan, ne bena o bɛɛ kɛ tomo ye. U bena faga ni murujan ye. 14Ne bena n mɔnɛ bɔ edɔmuw na ne ka jama Isirayɛli barika la. Olu bena edɔmuw sara ka kɛɲɛ ni ne ka dimikojugu ye. O tuma na, ne be n mɔnɛ bɔ cogo min na, u ben'o lɔn. Ne Matigi, Masaba le ko ten.»

Kirayakuma, filisiw kosɔn

15- Matigi, Masaba ko: «Filisiw tun b'a fɛ k'u yɛrɛ mɔnɛ bɔ. U y'a kɛ ni kɔnɔnajuguya ye, k'u jugukɔrɔw tɔɔrɔ kojugu k'u halaki minkɛ, 16o la, ne Matigi, Masaba ko: Ne bena wili filisiw kama k'u bɛɛ faga, mɔgɔ minw tun bɔra Kafitɔri,h n'u siginin be kɔgɔjida la. 17Ne bena n mɔnɛ bɔ u la k'u ɲaa gwan. Ni ne ye n mɔnɛ bɔ u la tuma min na, u ben'a lɔn ko ne ye Masaba le ye.»

ALA KA KUMA

© 2008 Alliance Biblique du Burkina Faso

More Info | Version Index