Search form

Eze 27

Dusukasidɔnkili, Tiri kosɔn

1Masaba kumana ne fɛ ko: 2«Adamaden, i ka dusukasidɔnkili la Tiri dugu kosɔn. 3A fɔ Tiri ye ko: Ne Matigi, Masaba ko:

E min siginin be kɔgɔjida la,

e min be jago kɛ ni mɔgɔw ye dugukolo caaman kan,

jii cɛma,

e Tiri, i y'a fɔ ko i ka ɲi haali.

4I ka mara daan be fɔɔ kɔgɔji cɛma i ko kurun.

I sigibagaw y'i cɛɲa haali.

5U ye Seniri kuluj sipɛrɛyiri dɔw tigɛ

k'i dilan n'o lɔgɔw ye.

U ye Liban yiriba dɔ tigɛ k'o kɛ

i ka kurunfani sirifɛn ye.

6U y'i ka jifasananw dilan ni *Basan mara joyiribabaw ye,

u y'i kɔnɔna yɔrɔ dilan ni sipɛrɛyiriw ye

ka bɔ Sipɔrɔ dugukolo kan, jii cɛma,

ka samaɲin dondon u la.

7Ezipiti fani ɲanaman tun ye i ka kurunfani ye,

ka kɛ i ka darapo ye.

Fani minw tun birinin be i ka minanw sanfɛ,

o tun ye fani bulaman ni wuleman ye

ka bɔ Elisa dugukolo kan, jii cɛma.

8Sidɔnkaw ni Aribadikaw tun ye

i ka kurunbolilaw ye.

E Tiri, i yɛrɛ ka setigiw tun ye

i ka kurunɲatilenbagaw ye.

9Gebalik cɛkɔrɔba baaralɔnbagaw tun ye

i ka kurun lalagabagaw ye.

Kɔgɔji kan kurunw bɛɛ n'u kɔnɔ baarakɛlaw

tun be na i fɛ k'u ka jagofɛnw falen.

10Pɛrɛsiw ni Ludikaw ni Putikaw tun ye

i ka kɛlɛdenw ye,

U y'u ka nigɛkunbɛnnanw n'u ka nigɛfugulanw dulon i kɔnɔ,

k'a kɛ i tɔgɔ bɔra.

11Aribadikaw n'i yɛrɛ ka kɛlɛdenw tun b'i laminikogo kan.

Gamadikaw tun b'i ka sangasow kɔnɔ.

U y'u ka nigɛkunbɛnnanw dulon i laminikogo la,

u y'i ka cɛɲa dafa.

Tiri, jagokɛdugu

12«Tarisisikaw tun be jago kɛ n'i ye, bari fɛɛn sifa caaman tun b'i fɛ. U tun be warigwɛ ni nigɛ sifa caaman falen i ka jagofɛnw na. 13Yabankaw ni Tubalikaw ani Mɛsɛkikaw tun be jago kɛ n'i ye ka jɔɔnw ni ziraminanw falen i ka jagofɛnw na. 14Bɛtitogarimakaw tun be sɛnɛkɛsow ni kɛlɛkɛsow, ani sofaliw falen i ka jagofɛnw na. 15Dedankaw ni dugukolo caaman kan mɔgɔw, jii cɛma, tun be jago kɛ n'i ye. Olu tun b'i ka jagofɛnw san ni samaɲin, ni yiri gwɛlɛmanw ye. 16Sirikaw tun be fɛɛn caaman falen i fɛ, ka dɔw falen kabakuru binkɛnɛmanw na, ni fani wulemanw, ni fani ɲanaman wɛrɛw, ni kolonkisɛ, ani kabakuru wulemanw. 17Zuda ni Isirayɛli mara mɔgɔw fana tun be jago kɛ n'i ye ka suman dɔ falen ka bɔ Miniti, ni ɲɔɔn, ani lii, ni tulu, ani fɛɛn kasadiman sifa dɔ. 18Damasikaw tun be jago kɛ n'i ye ka Ɛlibɔn duvɛn ni Saari sagasi falen i ka jagofɛn caaman na an'i ka fɛnɲuman sifaw bɛɛ la. 19Wedankaw ni Yabankaw ka bɔ Uzali mara la, olu tun be taga ni nigɛw ye minw tun baarala, ani kanɛlifara kasadiman, ni kala kasadiman sifa dɔ ye k'u falen i ka jagofɛnw na. 20Dedankaw tun be taga ni soow ka birifaniw ye i fɛ. 21Arabu jamana mɔgɔw ni Kedari mara ɲamɔgɔw bɛɛ tun be sanni kɛ i fɛ. U tun be taga ni sagadenw ni sagajigiw, ani bakɔrɔninw ye k'u feere i fɛ yen. 22Saba ni Arayema jagokɛlaw tun be taga i fɛ ni fɛɛn kasadiman sifaw bɛɛ ɲanamanw ye, ani kabakuru sɔngɔgwɛlɛn sifa bɛɛ, ni sanu, k'u falen i ka jagofɛnw na. 23Aran ni Kane ani Edɛn duguw, ani Saba ni Asiri ni Kilimadi jagokɛlaw tun be jago kɛ n'i ye. 24U tun be taga i ka lɔgɔ la ni dakamanafaniw ye, ni faniwulenw, ni fani ɲanamanw, ani fani ɲɛgɛɲɛgɛninw, ani juru minw danna ka ɲa.

Dusukasidɔnkili dɔ wɛrɛ, Tiri kosɔn

25- «Kurunbabaw tun be to ka i ka jagofɛnw ta.

I tun fanin be jagofɛn gwilimanw na

i ko kurun, kɔgɔji cɛma.

26I ka kurunbolibagaw tagara n'i ye kɔgɔji kan.

Fɔɲɔ bɔra kɔrɔn fɛ k'i cɛn kɔgɔji cɛma.

27I ka nafolow n'i ka jagofɛnw bɛɛ,

i ka kurun kɔnɔ baarakɛlaw n'i ka kurunbolilaw,

ani kurun lalagabagaw, n'i ka jagokɛlaw,

an'i ka kɛlɛdenw bɛɛ,

ni mɔgɔ tɔw bɛɛ, minw b'i kɔnɔ,

olu bɛɛ bena ben kɔgɔji kɔnɔ i halakilon na.

28I ka kurunbolilaw kulekan ben'a kɛ

jidaw bena yɛrɛyɛrɛ.

29Kurunbolibagaw bɛɛ bena bɔ kurun kɔnɔ,

kurun kɔnɔ baarakɛlaw ni kurunbolilaw bɛɛ

bena taga lɔ jida la.

30U bena kule ka kasi kosɔbɛ i kosɔn.

U bena buguri seriseri u kuun na

ka kolonkolon bugurigwɛ la.

31U bena u kuun li ka dusukasifani don i kosɔn.

U nii tɔɔrɔnin bena kasi e kosɔn,

u dusukasininba bena kasi i kosɔn.

32U nii tɔɔrɔnin bena dusukasidɔnkili la i kosɔn.

K'u to dusukasi la,

u bena dɔnkili la k'a fɔ ko:

‹Tiri, dugu barikaman min tun be kɔgɔjida la,

o bɔɲɔgɔn be min?

33U tun be taga n'i ka jagofɛnw ye

kɔgɔji kan tuma min na,

i ye jamana caaman mako ɲa.

I ye dugukolo kan masacɛw kɛ nafolotigiw ye

n'i ka nafoloba an'i ka jagofɛnw ye.

34Ayiwa, i cɛnnin filɛ kɔgɔji kɔnɔ sisan sa,

i jigira fɔɔ jii jukɔrɔ.

I ka jagofɛnw n'i kɔnɔ baarakɛlaw bɛɛ jigira n'i ye.

35Jii cɛma dugukolo kan mɔgɔw bɛɛ kabakoyara i koo la.

U ka masacɛw be yɛrɛyɛrɛ jatigɛ fɛ,

u ɲada cogo yɛlɛmana siranya fɛ.

36Siya wɛrɛ jagokɛlaw b'i cuurula.

I kɛra siranyafɛn ye,

i halakira pepewu.› »

ALA KA KUMA

© 2008 Alliance Biblique du Burkina Faso

More Info | Version Index