Search form

Eze 32

Dusukasidɔnkili, Ezipiti jamana n'a masacɛ kosɔn

1Isirayɛlidenw minɛnin kɔ ka taga jamana wɛrɛ la, o saan tan ni filanan kalo tan ni filanan tile fɔlɔ loon, Masaba kumana ne fɛ ko: 2«Adamaden, dusukasidɔnkili la Ezipiti masacɛ kosɔn k'a fɔ a ye ko:

‹E tun be i ko jara, siyaw cɛma.

I tun be i ko banba.

I tun be firinfirin i ka bajiw kɔnɔ,

i seenw tun be jii ɲagami k'a duuru.› »

3Matigi, Masaba ko:

«Siya caaman bena ɲɔgɔn lajɛn tuma min na,

ne bena n ka jɔɔ fili i kan.

Olu bena i sama ka bɔ jii la ni ne ka jɔɔ nin ye.

4Ne bena i fili dugukolo kan,

k'i fili kongo kɔnɔ.

Ne ben'a to kɔnɔw bɛɛ be sigi i kan,

waraw bɛɛ bena i ɲimi ka fa.

5Ne bena i faribugu lala kuluw kan,

ne bena kulu furancɛw datugu n'i tɔɔ ye.

6Ne bena dugukolo ɲigi n'i joli ye

min bena woyo kuluw kan.

Kɔdingɛw bena fa o la.

7- Ni ne y'i ka ɲanamaya ban tuma min na,

ne bena sankolo datugu k'a kɛ lolow te manamana tugu.

Ne bena tile datugu ni sankaba ye,

kalo tena yeelen bɔ.

8Ne bena sanfɛ yeelenbɔlanw bɛɛ kɛ dibi ye e kosɔn,

ne bena i ka jamana kɛ dibi ye.

Ne Matigi, Masaba le ko ten.

9Siya caaman hakili bena ɲagami

tuma min na ne bena i halakiko fɔ siyaw cɛma,

jamanaw na i te minw lɔn.

10Ne bena min kɛ i la,

o bena u kabakoya haali.

Ni ne ye n ka murujan fifa u ɲakɔrɔ tuma min na,

u ka masacɛw bena yɛrɛyɛrɛ jatigɛ bolo i kosɔn.

I benlon na, u bɛɛ bena to ka yɛrɛyɛrɛ

ka jɔɔrɔ u yɛrɛ nii la.»

11Matigi, Masaba ko:

«Babilɔni masacɛ ka murujan bena wili i kama.

12Ne ben'a kɛ i ka jama be sa

kɛlɛdenw ka murujan fɛ,

minw ka fari ni siya tɔ bɛɛ taw ye.

U bena Ezipiti ka yɛrɛboɲa ban,

k'a jama bɛɛ faga.

13Ne ben'a ka begɛnw bɛɛ faga

a ka jiba daa la.

A ka jii si tena ɲagami tugu mɔgɔ seenw fɛ.

O tena duuru tugu begɛn seenw fɛ.

14O tuma na, ne ben'a to Ezipiti jiiw be ɲamalɔ,

ka woyo i ko tulu.

Ne Matigi, Masaba le ko ten.

15Ni ne ye Ezipiti kɛ yɔrɔkolon ye,

ni n ye jamana kɔnɔ fɛɛnw bɛɛ cɛ ka bɔ yen,

ni n y'a kɔnɔ mɔgɔw bɛɛ faga tuma min na,

o tuma na, u ben'a lɔn ko ne ye Masaba le ye.

16«Dusukasidɔnkili min bena la, o filɛ nin ye. Siya musow bena o dɔnkili nin la Ezipiti n'a kɔnɔ mɔgɔ bɛɛ kosɔn. Ne Matigi, Masaba le ko ten.»

Dusukasidɔnkili dɔ wɛrɛ

17Isirayɛlidenw minɛnin kɔ ka taga jamana wɛrɛ la, o saan tan ni filanan kalo tile tan ni duurunan loon, Masaba kumana ne fɛ ko: 18«Adamaden, kasi Ezipiti jama kosɔn. A mɔgɔw ni siya barikamanw bila ka jigi lahara, u ka fara o yɔrɔ mɔgɔw kan. 19A fɔ u ye ko: ‹Aw ka fisa ni siya wɛrɛw ye wa? Aw ka jigi ka la ni kɛnɛkɛnɛbaliw ye dugukolo jukɔrɔ, lahara.›

20«Mɔgɔ minw fagara ni murujan ye, u bena ben ni olu ye. Murujanw bɔra forokow la. U ka Ezipiti n'a kɔnɔ jama bɛɛ faga. 21K'u to lahara, kɛlɛdenŋanaw n'u dɛmɛbagaw bena kuma Ezipitikaw fɛ. Alalɔnbali minw fagara ni murujan ye, o mɔgɔ nunu jigira, u lanin be kaburu kɔnɔ.

22«Asiri masacɛ be yen n'a ka kɛlɛdenw bɛɛ. A lamininin be n'a ka kɛlɛdenw kaburuw ye, minw bɛɛ fagara ni murujan ye. 23U kaburuw be fɔɔ dugukolo jukɔrɔ, a ka kɛlɛdenw lanin be k'o kaburu lamini. Mɔgɔ minw bɛɛ tun ye mɔgɔw jaa tigɛ diɲɛ na, olu bɛɛ fagara ni murujan ye.

24«Elamu masacɛ be yen. A kaburu lamininin be n'a ka kɛlɛden bɛɛ taw ye. U bɛɛ fagara ni murujan ye. O mɔgɔ minw tun ye mɔgɔw jaa tigɛ diɲɛ na, o Alalɔnbaliw jigira dugukolo jukɔrɔ. U sɔnna u ka maloya ma ni lahara mɔgɔ tɔw ye. 25Layɔrɔ dira Elamu masacɛ ma suuw cɛma, a lamininin be n'a ka kɛlɛden bɛɛ kaburuw ye. Mɔgɔ nunu bɛɛ ye Alalɔnbaliw ye, u bɛɛ fagara ni murujan ye. Minw tun be mɔgɔw jaa tigɛ diɲɛ na, u sɔnna u ka maloya ma ni lahara mɔgɔ tɔw ye.

26«Mɛsɛki ni Tubali masacɛw be yen. U kaburuw lamininin be n'u ka kɛlɛden bɛɛ kaburuw ye. U bɛɛ ye kɛnɛkɛnɛbaliw ye, minw fagara ni murujan ye bari u tun ye mɔgɔw jaa tigɛ diɲɛ na. 27U ma u suu don ni fɔlɔfɔlɔ kɛlɛdenŋanaw ye. Minw jigira lahara n'u ka kɛlɛkɛminanw ye, n'u ka murujanjanw lanin be u kuun kɔrɔ. U ka tilenbaliyakow be u kolow kan hali ni kɛlɛdenŋana nunu ye mɔgɔw jaa tigɛ diɲɛ na. 28E Ezipiti masacɛ fana bena sa, u bena i suu don kɛnɛkɛnɛbaliw cɛma minw fagara ni murujan ye.

29«Edɔmuw n'u ka masacɛw n'u ka ɲamɔgɔw bɛɛ be yen. Hali ni barika tun b'u la, u lanin be ni mɔgɔw ye minw fagara ni murujan ye, kɛnɛkɛnɛbaliw cɛma, lahara.

30«Kɔgɔdugu ɲafan ɲamɔgɔ bɛɛ, ani Sidɔnka bɛɛ be yen. U maloyanin jigira suuw cɛma, hali k'a sɔrɔ u tun ye mɔgɔw jaa tigɛ. O kɛnɛkɛnɛbali nunu lanin be suuw cɛma minw fagara ni murujan ye. U sɔnna u ka maloya ma ni lahara mɔgɔ tɔw ye.

31«Ezipiti masacɛ bena u ye, a dusu bena saalo a ka kɛlɛdenw sako la, minw bɛɛ fagara ni murujan ye. Ne Matigi, Masaba le ko ten. 32Ne tun y'a to Ezipiti masacɛ ye mɔgɔw jaa tigɛ kosɔbɛ diɲɛ na. O bɛɛ n'a ta, a yɛrɛ n'a ka kɛlɛden bɛɛ bena la kɛnɛkɛnɛbaliw cɛma, minw fagara ni murujan ye. Ne Matigi, Masaba le ko ten.»

ALA KA KUMA

© 2008 Alliance Biblique du Burkina Faso

More Info | Version Index