Search form

Oze 6

Isirayɛlidenw ko u be segi Ala ma

1Aw b'a fɔ ko:

«Aw ye to an ka segi Masaba fɛ!

Ale lo y'a kɛ joli bɔra an na,

ale lo bena an joli furakɛ.

Ale lo y'an bugɔ,

ale lo bena an furakɛ.

2Tile fila tɛmɛnin kɔ,

a bena barika don an na,

a bena an wili tile sabanan loon,

an bena balo ale ɲakɔrɔ.

3An ka jija ka Masaba lɔn.

A nako ye wajibi le ye,

i ko tilekun bɔko.

A bena na an fɛ i ko sanji,

i ko tilemana sanji min be na dugukolo ɲigi.»

4«Ne bena mun le kɛ aw la sa,

Efarayimu kɔmɔgɔw?

Zuda mara mɔgɔw,

ne bena mun kɛ aw la sa?

Aw ka kanuya kɛra i ko sɔgɔma kabaforoko,

i ko komiji min be tunu joona.

5O kama, ne ye kiraw ci k'aw kɛlɛ ni kuma ye,

ne y'aw fagako fɔ.

Ne ka kiti bena tigɛ kɛnɛ kan.

6- Bari, ne be ɲumanya le fɛ,

ne te saraka fɛ.

Aw ka n lɔn,

o ka di n ye ka tɛmɛ saraka jɛnita kan.

Juguya sara

7«Bɛɛn min tun be yen,

aw y'o cɛn adamadenya la.

Aw ye ne janfa le.

8Galaadi kɛra mɔgɔjuguw ka dugu ye.

Joli bɔnnin be a yɔrɔ bɛɛ.

9Sarakalasebagaw ka jɛnkulu dɔw

be mɔgɔw faga Sisɛmu sira kan,

i ko benkannikɛlaw.

Tiɲɛ na, u be baarajugu kɛ!

10Ne ye kojuguw le ye Isirayɛli mara kɔnɔ.

Efarayimu kɔmɔgɔw ye kakalaya kɛ

ka Isirayɛli mara nɔgɔ.

11Ne be sara labɛnna aw Zuda mara mɔgɔw fana ye.

Ne b'a fɛ ka hɛrɛ kɛ n ka mɔgɔw ye tuma min na,

ALA KA KUMA

© 2008 Alliance Biblique du Burkina Faso

More Info | Version Index