Search form

Oze 7

1ne b'a fɛ ka Isirayɛli ka tɔɔrɔ ban tuma min na,

o waati yɛrɛ la,

Efarayimu kɔmɔgɔw ka tilenbaliyakow be ye,

Samari ka juguyakow be bɔ kɛnɛ kan.

Tiɲɛ na, u be namarakow kɛ.

Soonw be don boonw kɔnɔ,

benkannikɛlaw fariyanin be kɛnɛma.

2U t'a miiri ko u ka kojuguw bɛɛ maranin be ne fɛ.

Sisan, u ka kojuguw le kɛnin be k'u siri,

ne ɲaa b'o la.

Janfa

3«U be masacɛ n'a ka ɲamɔgɔw nisɔndiya,

k'a sɔrɔ u kɔnɔ finnin lo.

4U bɛɛ ye kakalaw ye.

U be i ko dibi gwannin.

Kabini a tigi y'a ka mugu nɔɔni k'a bila,

a ma tasuma lalaga tugu fɔɔ a fununa.

5An ka masacɛ ka loon na,

ɲamɔgɔw be minni kɛ fɔɔ ka bana.

Masacɛ b'a bolo di a ka mɔgɔkolonw ma.

6U kɔnɔ be i ko dibi gwannin,

namarako dama le b'u kɔnɔ.

Sufɛ, u dusu malanin lo,

dugu mana gwɛ,

u dusu be gwan i ko tasumaba.

7U bɛɛ fariyanin be i ko dibi,

u b'u ɲamɔgɔw halaki.

U ka masaw bɛɛ benna,

nga hali mɔgɔ kelen t'u cɛma

min bena kule ne nɔɔ fɛ.

Ɲumanlɔnbaliya

8«Efarayimu kɔmɔgɔw ɲagaminin lo ni siya tɔw ye.

U kɛra ŋɔmi ye, min ma yɛlɛma tasuma kan.

9Lonanw b'u fanga nagasira,

u yɛrɛ t'o kala ma.

U kunsigi be gwɛra,

u yɛrɛ t'o kala ma.

10Isirayɛlidenw ka yɛrɛboɲa b'u cogo yira.

Nga, u do te segira ne Masaba u ka Ala ma.

O bɛɛ la, u te ne yɔrɔ ɲini.

11Efarayimu kɔmɔgɔw kɛra i ko

tuganin nalonman, min te miiri.

U be Ezipitikaw wele k'u ka na u dɛmɛ,

u be taga Asirikaw fɛ.

12U taatɔ, ne be n ka jɔɔ fili u kan,

ne bena u minɛ i ko kɔnɔw.

Ni ne y'a mɛn k'u lajɛnna dɔrɔn,

ne b'u minɛ.

13Bɔnɛ y'u ta ye,

bari u be bolila ne ɲa!

U ta ye halakili ye,

bari u murutira ne ma!

Ne do ka kan k'u hɔrɔnya wa?

Minw be galonw tigɛra ka la ne kan.

14U be kulera ne nɔɔ fɛ fu,

a ma bɔ u dusu la.

Nga, u be to ka kasi u ka dilanw kan.

U b'u yɛrɛ fari tigɛtigɛ dumuni,

ani duvɛnkɛnɛ kama.

U b'u kɔɔ sin ne ma.

15Ne tun y'u ladi, ka barika don u la.

Nga u te foyi miiri ne koo la ni kojugu tɛ.

16Hali n'u kɔsegira,

u te kɔsegi ne Fɛɛn bɛɛ kuntigi ma.

U kɛra i ko kala min ɲanaman tɛ.

U ɲamɔgɔw bena halaki ni murujan ye

u ka dabayakuma kosɔn.

Ezipitikaw bena yɛlɛ u ma u ka jamana kɔnɔ.

ALA KA KUMA

© 2008 Alliance Biblique du Burkina Faso

More Info | Version Index