Search form

Eza 13

Babilɔni ciko

1- Kirayakuma min yirala Amɔsi dencɛ Ezayi la ka sin Babilɔni ma, o filɛ.

2Aw ka taamasiɲɛ dɔ tutu kululakolon sanfɛ.

Aw ka pɛrɛn k'aw bolo kɛ ka kɛlɛdenw wele,

janko u ka don mɔgɔbabaw ka dondaw fɛ.

3Ne ye sira di n ka mɔgɔw ma,

ne ye n ka cɛfariw wele, ne dimi bɔbagaw,

ne ka kunkɔrɔta be minw nisɔndiya.

4Aw k'aw tulo malɔ mankan na kuluw kan,

a bɔnin be jamaba mankan fɛ dɛ!

A y'aw tulo malɔ masaw ka mɔgɔw mankan na,

siyaw be ɲɔgɔn lajɛnna.

Masaba, Setigi b'a ka kɛlɛdenw lajɛn na k'u filɛ,

minw bena taga kɛlɛ la.

5U be nana ka bɔ jamanajan na fɔɔ diɲɛ daan na.

Masaba n'a ka dimi bɔbagaw be na jamana nin bɛɛ halaki.

6- Aw ka sangakasi kɛ!

Masaba ka loon surunyana,

halakili be nana ka bɔ Setigi fɛ.

7O kama, bɛɛ fari fagara,

mɔgɔ bɛɛ jaa tigɛra.

8Siranya y'u minɛ,

sɛgɛn ni tɔɔrɔ b'u kan.

U b'u yɛrɛ tɔrɔmina i ko muso tintɔ.

U kabakoyanin be ɲɔgɔn filɛra,

u ɲaa wulenna i ko tasuma.

9Masaba ka loon setɔ filɛ nin ye,

lonjugu, a ka fariya loon,

a ka dimi b'a daan na loon min.

A bena jamana kɛ yɔrɔlakolon ye

k'a kɔnɔ kojugukɛlaw halaki.

10- Lolow tena manamana,

tile ɲaa bena fin a bɔtɔ yɛrɛ,

Kalo yeelen tena bɔ.

11Masaba ko:

«Ne bena diɲɛ mɔgɔw ɲaa gwan

u ka juguya kosɔn,

ka mɔgɔjuguw ɲaa gwan

u ka kojuguw kosɔn.

Ne bena yɛrɛboɲalaw ni cɛfariw ka yɛrɛboɲa daa faga.

12Adamadenw yeko bena gwɛlɛya.

Ka tɛmɛ sanu yɛrɛ yɛrɛ yeko kan.

13Tiɲɛ na, ne bena sankolo wurubata,

dugukolo bena yɛrɛyɛrɛ a sigiyɔrɔ la,

ne Masaba, Setigi dimikojugu kosɔn, ne ka loon na.

14U be minan min gwɛnna,

ale be boli cogo min na,

dɛndɛbaga te saga minw na,

olu be cogo min na,

bɛɛ bena boli k'u ka siya yɔrɔ ɲini ten.

Bɛɛ bena girin k'a faso sɛgɛrɛ.

15U mana mɔgɔ o mɔgɔ sɔrɔ,

o tigi be sɔgɔ ni biɲɛ ye.

U mana min minɛ,

o tigi be faga ni murujan ye.

16U bena u ka denɲɛninw ɲɔɲɔ k'u faga u ɲana.

U bena u ka soow fon, ka fanga la u musow kan.

17Ne bena mɛdiw kɔnɔnasu k'u bila u la.

Olu mako te warigwɛ la,

sanu fana te foyi y'u fɛ.

18U ka kala bena kanbelenw halaki.

U tena hinɛ denɲɛninw la,

u tena makari denmisɛnw la.

19- Babilɔni min kɛra jamanaw bɛɛ la ɲanaman ye,

Babilɔnikaw ka kunkɔrɔtafɛn,

Ala bin'o halaki i ko Sodɔmu ni Gɔmɔri.

20Mɔgɔw tena sigi yen tugu fewu,

a lakolon bena to kudayi.

Hali arabuw yɛrɛ tena u ka buguw lɔ yen,

begɛndɛndɛbagaw tena lafiɲɛ yen

n'u ka begɛnw ye.

21- Kongofɛnw bena kɛ yen,

ginginw bena soow fa.

A bena kɛ kɔnɔsogolonw ka yɔrɔ ye,

bakɔrɔninw bena panpan yen.

22Surukuw bena to ka kasi u ka soɲumanw kɔnɔ,

kongowuluw bena to ka kasi u ka

masasoɲumanw kɔnɔ.

A ka loon surunyana.

Dɔ tena faria a ka loon jaɲa kan.»

ALA KA KUMA

© 2008 Alliance Biblique du Burkina Faso

More Info | Version Index