Search form

Eza 17

Kirayakuma, Damasi dugu kosɔn

1- Kirayakuma nin sinna Damasi dugu ma.

«Damasi tena kɛ dugu ye tugu,

a bena kɛ tomo le ye.

2A dafɛduguw mɔgɔw bena boli

k'u lakolonw to kudayi.

O dugu nunu bena kɛ begɛnw layɔrɔ ye,

hali mɔgɔ si tena u tɔɔrɔ.

3Dugu barikaman tena sɔrɔ Efarayimu mara la tugu,

masa tena sɔrɔ Damasi fana.

Sirikaw tɔɔ min bena to,

olu bena mafiɲɛya i ko Isirayɛlidenw tɔɔ.

Masaba, Setigi le ko ten!

4O loon na, Isirayɛlidenw ka nɔɔrɔ bena ban,

u ka nafolo bena tunu.

5A bena kɛ i ko suman tigɛtuma,

suman bɛɛ be cɛ ka ban cogo min na.

A bena kɛ i ko erefaw ka kɔkɛnɛ

a suman tigɛnin kɔ.

6Isirayɛlidenw tɔɔ bena kɛ i ko olivu

minw be to yiri kan a deenw bɔnin kɔ.

A deen tɔɔ be to suun kan cogo min na

kelen kelen a sanfɛbolow kan,

o cogo kelen na, olu bena kɛ ten.

A tɔɔ bena to bolo nunu kan,

deen naani, walima duuru.»

Masaba, Isirayɛli ka Ala le ko ten.

7O loon na, adamaden bena filɛli kɛ a Danbaga faan fɛ,

a ɲaa bena la Isirayɛli ka Ala kan.

8A ye sɔnnikɛyɔrɔ minw sigi,

a ɲaa tena bɔ olu si fɛ tugu.

A bolo ye joo minw dilan,

ani wusulan jɛniyɔrɔw,

walima *Asera jaaw,

a tena o si filɛ.

9O loon na, mɔgɔw bena boli ka dugu barikamanw lakolon to, i n'a fɔ iviw ni amoriw bolila k'u ka duguw to cogo min na Isirayɛlidenw natuma na jamana kɔnɔ. Yɔrɔ bena kɛ dusukasiyɔrɔ ye.

10Aw ɲinɛna aw Kisibaga Ala kɔ,

aw m'aw hakili jigi aw tangabaga barikaman la.

Aw ye nankɔw labɛn joow ye,

ka sɛnɛfɛnw dan yen siya wɛrɛw ka joow sɔnni kosɔn.

11Aw y'u dan loon min na,

o loon kelen na, aw y'a kɛ o falenna.

Aw ye min dan sɔgɔma,

aw y'a kɛ o feerenna.

Nga bɔnɛ loon na,

o suman be tunu.

Fura te o bɔnɛ nin na.

Juguw boliko

12Ee! Jamaba mankan ye!

Mankan nin be i ko jiba mankan!

Siya wɛrɛw ŋunuŋunukan be i ko jii woyokan!

13U mankan be i ko jiba mankan.

Nga Ala b'u bagabagara,

u be boli ka taga fɔɔ yɔrɔjan,

i ko fɔɲɔ be suman bugu ta cogo min na,

i ko sanfɔɲɔ be gwangwan ta cogo min na.

14Suu mana ko, siranya lo!

Yanni dugu ka gwɛ, u te yen tugu!

O le bena kɛ an tɔɲɔbagaw niyɔrɔ ye.

Mɔgɔ minw be benna anw kan,

o le bena kɛ u niyɔrɔ ye.

ALA KA KUMA

© 2008 Alliance Biblique du Burkina Faso

More Info | Version Index