Search form

Eza 27

1- O loon na, Masaba ben'a ka murujan belebeleba

dadiman ta Leviyatan kama,

sajugu min be tɔrɔmitɔrɔmi,

mɔgɔ te se ka min minɛ.

A bena o sogojugu nin faga,

min be kɔgɔji la.

Masaba n'a ka ɛrɛzɛnforo

2O loon na, aw ka dɔnkili la ka *ɛrɛzɛnforo tanu, duvɛn diman be bɔ min la.

3«Ne Masaba yɛrɛ le ye a kɔlɔsibaga ye,

n be to k'a sɔn jii la.

Ne b'a kɔlɔsi suu ni tile

janko mɔgɔ si kan'a cɛn.

4Ne diminin te tugu.

Nga ni ne ye ŋɔniw ye,

n be wili olu kama,

k'u bɛɛ jɛni ɲɔgɔn fɛ.

5Fɔɔ ni u y'u yɛrɛ kalifa ne ma,

fɔɔ u ka bɛn ni ne ye.

An ka bɛn.»

Isirayɛlidenw bena yafa sɔrɔ

6Waati dɔ bena se, Isirayɛlidenw bena lili sɔrɔ,

u bena nugu ka feeren kɛ.

U deenw bena diɲɛ bɛɛ fa.

7Masaba y'a ka jama ɲaa gwan

i ko a y'u juguw ɲaa gwan cogo min na wa?

A y'olu halaki u halakicogo la wa?

8A y'u kiti, k'u gwɛn.

A dalafɔɲɔ barikaman y'u ta

i ko fɔɲɔ, ka bɔ kɔrɔn fɛ.

9A kɛra ten, Isirayɛlidenw ka kojugu bɛɛ bena yafa u ma.

U ka hakɛw yafako bena na ni fɛɛn min ye, o filɛ:

U bena sɔnnikɛyɔrɔw kabakuruw bɛɛ mugumugu

i ko u be bɔgɔgwɛ kɛ cogo min na.

*Asera jaa si tutunin tena ye tugu,

wusulan jɛniyɔrɔ si tena to yen.

Zeruzalɛmu labilanin bena to

10Dugu barikaman lakolon bena to,

a labilanin bena to.

A bena kɛ yɔrɔlakolon ye i ko kongokolon.

Misidenw bena to ka na dumuni kɛ yen,

u bena la yen, ka wili ka yirifuraburuw ɲimi.

11Ni yiribolo jara, u b'o kari,

musow be na tasuma don u la.

Tiɲɛ na, siya nin te foyi lɔn.

O kama, u Danbaga te makarila u la,

u Danbaga t'u dɛmɛna tugu.

Isirayɛlidenw kɔsegiko

12O loon na, Masaba bena dugukolo yuguyugu k'a ta Efarati bada la ka n'a bila Ezipiti kɔda la. A bena aw Isirayɛlidenw tɔmɔ yen kelen kelen. 13O loon na, buruba bena fiyɛ. Minw tununin tun be Asiri jamana la, olu bena na, ani minw tun gwɛnna ka taga Ezipiti jamana la, u bena na u kunbiri gwan Masaba ɲakɔrɔ kulu senuman kan, Zeruzalɛmu kɔnɔ.

ALA KA KUMA

© 2008 Alliance Biblique du Burkina Faso

More Info | Version Index